John 14

ÁánútunopaꞋa iyónááon-amba kemá úne Ísu siráin-kwasai.

Ísu simásuwena simátimena séna kentirumbá íma sáwíꞋa éꞋa íma anón-imayaa oró. Áánútuwe aráápamai méꞋa kesé aráápamai máéro. kentí imáyáa ÁánútumpaꞋa tuwéꞋa Áánútuna imáyáa éꞋa ánivo kesí imáyáa oró. kesivoná naaópaꞋa sáwívaꞋ-maruꞋa kwéraiye. ímo mirámó uráinkakai íma simátimusino. kemó iyúnda kentí maruꞋá utoꞋmayaa umátinkanaeꞋa iyúne. usauwéꞋmaeꞋo kuntíꞋmaeꞋo íyónda kemó máyaundaraꞋa uménaaowe. mirá onaꞋá kesé ménaaowe. kemó iyúnda-amba áꞋa awánaawe súwana Tómáasi simámena séna anóndakoo emó iyónda-naopaꞋa íma awánáúmne. nááraumai minámbá awánanaumno súwana Ísu séna ÁánútunopaꞋo iyónááon-amba kemá úne. kemá áraikona ááimba úne. kemá maíꞋmaiꞋa ónááowaina ááimba úne. kesivoná naaópaꞋa íma úwoi iyónááomba póꞋa kemá minámbá únda póꞋa iyónááowe. kesí ááimbo kwésuwanekai kesivombá awánaasino. ívéꞋa kwéawanaawe súwana Vírípi séna anóndakoo enavombá agaráásínkénanaya kentáá kanaa íno súwana Ísu séna ayáátáákaꞋa keséma máyaundanivo emá kesí ááimba íma kwésuwanaane. kesí ááimba suwánaawaima kesivombá áꞋa kwéawanaavo nóra isa enavombá agaráásinkaao seénó. 10 kemá kesivoé tarúmai máyaunana kesivomá kesé tarúmai máyáiye. mináíntávéꞋa áraire seró. íma kesí imáyáavinkemba súmpo kesivomá kesé ména kwená mayáímá isaꞋá súne. 11 kemá kesivoé tarúmai máyaunana kesivomá kesé tarúmai máyáimba póꞋa mináíntávéꞋa áraire seró. ímo mirámó séꞋo éꞋa kesí mayáímá awánéꞋa séꞋa áraiꞋa kwíyómpakemba Áánútunopakemba kunkáiye seró. 12 áraiꞋa simátimeꞋa séꞋa kentávéꞋa áraiꞋa Áánútunopakemba kunkáiye síyawaima kemó úndantem-bayai miwígwáráꞋá mayánááowe. kesivonópaꞋa iyéꞋa Áánútun-amamba aiꞋmáráándayavena miwítí mayáígó kesí mayáígómbá usáyaaitaniye. 13 kesí imáyáamo éꞋo sísaa íyaꞋo éꞋa mirá ónaumpo kentávéꞋa ísámai kesivo áwíꞋa mósá maránááowe. 14 kesí imáyáamo éꞋo sísaa íyaꞋo éꞋa kemá mirá ónaumne Ísu siráiye.

Áánútun-amamba aiꞋmáráanana kumíníye siráin-kwasai.

15 Ísu mináímbá simásuwena séna kentirumbó símakaambo éꞋa kesáái ísámai kaweꞋá ónááowe. 16 kesivombá áísaa onaná karááꞋá tutinkáníwaimba aiꞋmaráínana kumbéna kesé aasiyaasí maíꞋmaiꞋa íníye. kwemá áraikona ááimban-iye. 17 marapá-kwáásí kwembá íma awánésa kwenáái íma ísáamba pósa íma kanaán-umai sésa kesé tamaiyó sevó kesé ména kentirumpimbá maíꞋmaiꞋa imbá póꞋa kwembá kwéawanaawe. 18 sáwíyankaꞋa tiyuwáúndanivo íma megusaamó ontembá ónááovo usauweránáumne. 19 sáwíyankaꞋa marapá-kwáásí kembá íma suwánanaaombanivo keinárawaꞋa ókwaraꞋa suwánanaaowe. kesé ménaunda póꞋa kemá aúnáiꞋa umái ménaaowe. 20 minkánáámá tínímba póꞋa séꞋa áraiꞋa avowáe ména kesé máyáísata kwesé máyaumne mirá sénááowe. 21 kesááimo taagwiyavésamo kaweꞋó kwéowai tirumbá kwésimewe. tirumbá simíyawaima kesivoé kesé sirunkáí timéyauye. kesirumbó timúndawaiyavaiye simái avoraꞋá paárumai ménaumne súwana 22 Yútási Isakéríóti aráámáómá áwíꞋa Yútási séna Ísóigoo nóintavaiye séwa úwoi-kwaasiyavaiye simái íma avoraꞋá paárumai ménaumne seénó. kentááyáváíyé simái avoraꞋá paárumai ménaumne seénó súwana 23 Ísu séna tirumbá símakaawaima kesáái ísámai kaweꞋá íyana kesivomá arumbá miwí timínakai kesé kesivoé miwísé kumbéyauye. 24 kesáái ísámai íma kaweꞋá kwéowai tirumbá íma símakaawe. súnda-aimba íma kesí imáyáavinken-aimban-ivo kesivo siꞋmákaiwaina imáyáavinken-aimban-iye.

25 kesé máyaundaraꞋa mináímbá kwésimatimune. 26 ánivo kesivomá kwenamambá kentí karáákómbá aiꞋmaráínana kumbéna kesí anondá éna amápa-tantaaꞋa agaráátinkena súnda-aimba timínaꞋa táákaꞋa maránááowe. 27 tiyuwéꞋa paru kwéumatinkeꞋa kentirumbó kwempaꞋó maráí-yántááꞋá kwétimune. marapá-kwáásí íma kwétimewaꞋanivo kesirumbó kwempaꞋó maráúndantemba miráumai kwétimune. mindáyavena kentirumbá íma sáwíꞋa éna íma tááꞋa kaíno. 28 tiyúwáandanivo kentópaꞋa usauweránaumnemo súnda áꞋa kwéisaawe. kentirumbó símakaambo éꞋa kesivonópaꞋa íyóndayaveꞋa aamoí ónááowe. kesivomá kembá usáyaaitaraintavaiye simái aamoí ónááowe. 29 íma paáruraisaꞋa simátimunda póna paárínaꞋa kentávéꞋa séꞋa áraiꞋa siráiye sénááowe. 30 Sáátáánigo maambáráráꞋá sáwí-kawaanaꞋa kwétimba póꞋa íma ayáátáákaꞋa aaimá simátimundanivo kwená asirayánkó íma kembá tátoraniye. 31 kesivomá simásímakaimba mirá únda suwánésa sésa avowámbá arumbá ámakaiye sénááowe. usásinaiyata konó Ísu siráiye.

Copyright information for `KZE