John 15

áraiꞋa ándáma kemá úne Ísu siráin-kwasai.

Ísu simátimena séna áraiꞋa ándáma kemá úne. kesivomá minándáráꞋá tavíkáiwaiman-iye. ándáma kemá úne. ándágo amaimá kemán-owe. ímo arambó iyáínda-amaimo éna ayááisiyuwaniye. arambó iyáínda-amaimo éna ayááeꞋmarainana aráságáyó agaimái arambá iyáníye. ayááeꞋmaraintemba simátímakaunda-ainkoma mirá kwéena tirumbá arupí kwéiye. kesé tarúmai maíyaꞋa kemá kempáꞋá tarúmai máéno. amaiyé suꞋmaigomo éna íma arambá iyáníye. mirámó intembá kesémo ímo tarúmaimo maíyambo éna íma arambá iyáníye. kemá kesé tarúmai máénaꞋa póꞋa kesémo tarúmaimo maíyawaimo éꞋa sáwívar-aramba imái ménaaowe. kembó iváꞋó siyuwésamo ésa íma arambá imái ménaaowe. amaimó ayááisuwainda-amaimo aáyánkáíndamo éna aúꞋmái agaisuwáníye. kesémo ímo tarusíyawaima mirá íníye. kesémo tarúmaimo maíyawai kesááimo kentirumpimbó tátoꞋmaraiyawaima áísaa íyana póna mirá umátinkaniye. sáwívar-arambo imáímo maíyan-kwaasimo tuwánésamo ésa sésa Ísu arááíma kwáráan-kwaasin-owe síyana kesivo áwíkomo éna anómba íníye. kesivomó arumbó símakainten-umai kesirumbá kembá kwétimune. kemó éꞋa misírúntáváíyé simái máéro. 10 kesivoná ámáámba ísámai kwenaruntaváíyé simái máyaundantemba kesí ámáámbo iséꞋo éꞋa kesiruntaváíyé simái ménaaowe. 11 mináímbá simátímakaunda póꞋa kesí aamoi-yántáákó kentirumpimbá anómba kwáyainaꞋa aamoí umái máéro. 12 kesirumbó timúndantemba moórá-mora-umai tirumbá tíméro. mindá kesí ámáámba kwétimune. 13 kentí kwaásiyavaiye simái kwétuwaꞋnaa-eꞋa puwónáe sésamo puwíyamba íma moórá-aimba simái usáyaaitamai tirumbá timénááowe. 14 kesááimo isémáyayawaimo éꞋa kesí kwaási-iꞋa ónááowe. 15 anón-kwaasigona kwayó-kwáásí anóndakona mayáí íma awánaraambanivo kwenávárawaisai kwená mayáí awánaraawe. mirámó ontávéꞋa póꞋa kesivomó amápar-aimbo simásímakaimba simátimunda póꞋa íma kesí kwayó-kwáásíyé sendá kesívárawaisaiye sénaumne. 16 keinárawaꞋa íma kembá ításinkaawaꞋa kemá keinárawaꞋa ítátinkaunda póꞋa kwégweꞋa asirayán-árámbá koimái sáwívase umái máéro. kesí imáyáamo éꞋo kesivompáꞋó áísaa íyanamo éna mirá umátinkaniye. 17 moórá-mora-umai tirumbá tíméro séꞋa mirán-ámáámbá simátímakaumne Ísu siráiye.

marapá-kwáásí tíyámba umátínkaraan-kwasai.

18 Ísu mináímbá simátimena séna marapá-kwáásímó keinárawatavesamo tíyámbo umátinkaiyaꞋo éꞋa táákaꞋa maréꞋa séꞋa aivaꞋá kentáásí Ísóigomba áyámba umánkaraawe sénááowe. 19 kemá marapá-kwáásívínkémbá kembá ítátinkeꞋa kendéín-owe súnda pósa marapá-kwáásí tíyámba kwéumatinkaawe. kembó úwoimo marapá-kwáásímó onkákáí kentávésa sésa kenkáán-kwáásín-owe sésa tirumbá timésino. 20 kwayó-kwáásí miwítí anón-kwaasigomba íma usáyaaitaraawemo súnda imáyáama oró. kentí anóndako únasa pósa marapá-kwáásí akáꞋáámba simásinkesa sáwíꞋa umásínkáanten-umai keinárawaꞋa akáꞋáámba simátinkesa sáwíꞋa umátinkanaaovo kesááima ísámai kaweꞋá íyawai kentááima isánááowe. 21 keinárawaꞋa kesí kwaási-iꞋa ombá pósa marapá-kwáásí akáꞋáámba simátinkesa sáwíꞋa umátinkanaaowe. siꞋmákaiwaimba íma awánaamba pósa sáwíꞋa umái mirá ónááowe. 22 kemó ímo kusimátimundarakai marapá-kwáásítí sáwí-imayaa úwoi aúpáꞋá kwáísino. kusimátimunasa miwítí sáwí-imayaama iváꞋá túwááraamba íma iváꞋá túwáawana úwoi kwáyáiye. 23 tíyámbo masinkáíyawai kesivonkwáráꞋá tíyámba kwéumankaawe. 24 kemó óꞋowimo usáyaaitamaimo ímo óꞋon-oꞋom-bayaimo mayáúndarakai marapá-kwáásítí sáwí-imayaa úwoi aúpáꞋá kwáísino. kesí mayáímá awánésa kenté kesivonté tíyámba kwéumasinkaawe. 25 Áánútun-aai aúváívimba agaimaréna séna úwoiyavesa kembá tíyámba kwéumasinkaawe siráinkaꞋa póna mináímbá ívéꞋa kwévaariye. 26 kesivonópaꞋa iyéꞋa kentí karááꞋá tutinkáníwaimba aiꞋmáráanana kesivonópakemba kwenamankó keinárawate kumbéna kwemá áraikona ááindaꞋa póna kentávéna amápa-tantaaꞋa kusimátiminiye. 27 kemó mayáímó ááimbo asááwándarakemba áꞋa suwánaraamba póꞋa kentáváígwárá kesí mayáíyáváígwáráꞋá simátímapaꞋa kónááowe.

Copyright information for `KZE