John 3

Níkótimasima Ísumba áísaa uráin-kwasai.

moóráwai ámáán-kawaa-kwaasi Yútaa-kwaasiti kawáánáꞋá áwíꞋa Níkótimasi kwemá moórá-noꞋwaamba ÍsunopaꞋa téna séna anóndakoo Áánútun-aai simásiminiyondayavena embá aiꞋmáráísama tamáyaanata awánaraumne. Áánútumo embó asirayámbó ímo ámakainkakai óꞋon-oꞋon-kaweꞋ-mayai íma kanaán-umai mayáásino súwana Ísu séna áraiꞋa simámeꞋa séꞋa ímo ókwaraꞋo aúnáraan-umai matinkáiyawaimo ésa Áánútumo kawááipaꞋa íma ménaaowe súwana Níkótimasi séna anón-umáguraavo nóraumai aúnáiꞋa ónááoo séna tinóisai tirumpimbá íma óꞋa komáíyasa matinkánááowe súwana Ísu séna áraiꞋa simámeꞋa séꞋa kwaásimo matínkáamba mindá kwaásiman-ovo Áánútun-amankomo umátínkáimba mindá Áánútun-amankogwaraꞋa aúnáiꞋa kwéowe. ímo nonkwárá Áánútun-amankogwaraꞋo aúnáraaniꞋo umáímo ménaaoniꞋa umátínkáawai Áánútumo kawááipaꞋa íma ménaaowe. ókwaraꞋa aúnáraan-umai matinkáníyemo súnda-aintavena íma ááꞋa kaíno. maarán-áímbá imáyáa uwó. úndáoma kwená imáyáavinkemba kwénaaisasa aneꞋá íma kwéawanesa sésa náávakena náávara kwénaaiyo kwésewe. mirámó intembá Áánútun-amankoma miráráán-umai kwaási kwéumatinkaiye súwana Níkótimasi séna nóra ena mirá íníyo súwana 10 Ísu séna Ísareri-kwaasivimba aaí kwésimatimendawai óndanivo mináímbá íma isááne. 11 áraiꞋa simámeꞋa séꞋa kesáá awáraunda-yantaa ísaraunda-yantaataveta kwésimatimunda isaꞋá íma kwéisaawe. 12 mirá kwéon-tantaa marapáꞋó kwéon-tantaataveꞋo kwésimamunda íma áraire séndanivo kwíyómpa-tantaataveꞋo simáméndamo e nóra e áraire síníyono. 13 íma kwíyómpaꞋa irésa kunkáavo keyáá kwíyómpakemba kunkéꞋa kumpaáruraundawai kwíyómpa-tantaaꞋa kanaán-umai agaráátinkaumne. 14 naaóváꞋá Mósesi óntandei iraankavayaambá tarórumai taairaꞋó mósá marówasa puwónáesamo un-kwáásí awánésa íma pukáawe. mirámó uráintemba kembá kwaási úrandaꞋa kumpaáruraundawaimba sínkambai taairaꞋá mósá maránááomba pósa 15 kesááiyavesamo árairemo síyawaimo ésa aúnáiꞋa umái aasiyaasí maíꞋmaiꞋa ónááowe Ísu siráiye.

16 Áánútu marapáꞋá máyáan-kwaasiyavena ávááraumai aruntávéna éna póna kwenáánimba kímborawaimba aiꞋmarówana kunkáimba pósa kwenááiyavesamo áraire síyawaima kwaási máyáawaina ááimba Áánútuna némpaꞋa íma maíꞋmaiꞋa ónááovo kwená egwaaꞋá aúnáiꞋa umái maíꞋmaiꞋa ónááowe. 17 marapá-kwáásí aavimbá maitinkaaó séna Áánútu ááninkomba íma aiꞋmarówana kunkáivo marapá-kwáásí sáwí-imayaavimba máyáawima kuntíꞋmai kawer-ámpáꞋá métinkaao séna Áánútu ááninkomba aiꞋmarówana kunkáiye. 18 Áánútu ááninkon-aaiyavesa áraire kwésewai íma aaivimbá maitinkánívo ímo árairemo kwésewaima áꞋa aaivimbá maitínkaraiye. Áánútu kímbora-aaninkon-aaiyavesa árairemo ímo kwésentavena áꞋa aaivimbá maitínkaraiye. 19 sámo kamátinkaiwaima marapáꞋá kunkáimbanivo kwaási sáwíꞋa kwéesa pósa túnín-ayampatavesa imáyáama ésa sámo kamátinkaiwainopaꞋo ímo tentávéna aaivimbá kwémaitinkaiye. 20 sáwíꞋo kwéowai sámo kamátinkaiwaintavesa íma kwétinkaisasa kesí mayáímá paárivo sésa íma sámo kamátinkaiwainopaꞋa tagwémaewe. sáwíꞋo kwéowai mirá kwéovo 21 arupímo kwéowai sámo kamátinkaiwainopaꞋa tamáyáamba pósa Áánútu siráiniꞋo kwéomba kwétuwanaawe.

Ísuna kwaasái Yóni simátímakain-kwasai.

22 minkákémbá Yútiyaa-ayampaꞋa Ísuwe kwená kwayó-kwáásíyé komésa nombá kwévetinkowana 23 minkánáávímbá Yóni íma ándávaꞋa máankaronkaꞋa Ínóni-ayampaꞋa Sérími-naokona egwaaꞋ-nónayumpaꞋa Yóni ména sáwívaꞋ-nomba kwáyopaꞋa máyowasa kwaásiyomba tóyo uwaná Yóni nombá kwévetinkowasa 25 Yónina kwayó-kwáásíyónté moórá Yútaa-kwaasigoe mésa monoꞋ-nómbó pétinkon-aintavesa kwesimá kwesiman-esa 26 Yónina kwayó-kwáásíyómbá kwenópaꞋa tasimámesa sésa anóndakoo Yóntáni-nonkona menávápáꞋá esé méraiwaimba kwenáwíꞋa mósá makáawaima kwemá nombá kwévetinkaisasa sáwíva-kwaasi kwétoyo owe suwaná 27 Yóni séna Áánútumo tímísasamo ombá mindá miwínéímán-iye. 28 kemó siráunda Áánútumo usásinankaiwaima íma kemá úmpo siꞋmarówaꞋa kwená aivaꞋá tiráumne siráunda-aimba ísaraawe. 29 maarán-áímbá imáyáa oró. aúná-ininkomo awaikónópaꞋo tisanamá awaikó amááraanarawaꞋo aamoimó onten-umái ÍsunopaꞋa tewaꞋá aamoí kwéune. 30 kwemá anón-kwaasi imbá póna kwenáwíꞋa iyínívo kemá kíto-kwaasima únda póna kesúwíꞋa kumíníye Yóni siráiye.

31 kwíyómpakewaima amáparawai usáyaaitaraiye. maankákén-kwáásí marapá-kwáásí pósa marapáꞋó kwéon-tantaatavesa kwésevo kwíyómpaken-kwaasi usáyaaitarain-kwaasi póna 32 awánarain-tantaa ísarain-tantaatavena kwésisasa íma kwéisaambanivo 33 kwenááiyavesa áraire kwésewai sésa Áánútu árair-ainkona ááimban-iye sisasá tuwánésa sésa Áánútu árair-ainkona ááimban-iye kwésewe. 34 Áánútu aiꞋmákaiwaimba kwenamankómbá ámatukaimba póna Áánútun-aai kwésisasa mináíntávésamo árairemo kwésewai sésa Áánútu árair-ainkona ááimban-iye kwésewe. 35 Áánútu avowámá éna ááninkomba arumbá aména séna amápa-tantaaꞋa kawááumai taviyiyó siráiye. 36 ááninkon-aaiyavesamo árairemo sésamo kwesé aráápamai maíyawai aúnáiꞋa umái maíꞋmaiꞋa ónááovo kwenááimo ímo ísámaimo kaweꞋó kwéiyawai íma aúnáiꞋa umái méwana Áánútumo áwááꞋo tíyímba miwísé aasiyaasí kwaíkwaiꞋa isasá kwémaewe.

Copyright information for `KZE