John 4

Sámériyaavaken-ininkona kwaasái.

Yóni nombó pétinkarain-kwaasi Ísumo pétinkaraimba kóyaaitamai-kwaasi pétinkaraiye. ánivo Ísuma íma pétinkaraivo kwená kwayó-kwáásí pétinkaraawe. Yónimo kwévetinkain-kwaasi Ísumo kwévetinkaimba kóyaaitamai-kwaasi kwévetinkain-aimba ámáán-kawaa-kwaasimo ísón-aimba Ísu iséna Yútiyaa-ayampaꞋa tuwéna moórágwaraꞋa Káríri-ayampaꞋa kónáe séna Sámériyaa-ampaꞋa kónaumne séna kúmba Sámériyaa-ayampaꞋa Sáíkaa-naopaꞋa naaóváꞋó Yákópomo ááninko Yósépimbo ámakom-barama egwaaꞋá kwáyon-daopaꞋa kúmba Yákópo nombá uwíníyena uꞋmakóm-baiꞋa kwáyowana aampaꞋá kwéguwana Ísumba ávón-kówana mimbáíkáꞋá kwáyáꞋwái komáyowasa kwená kwayó-kwáásí toómbá meéyán-onae sésa naaópaꞋa kuwaná Sámériyaa-ininko nombá uwíníyena túwana Ísu séna nombá usimiyó súwana minínínkó séna emá Yútaa-kwaasi ómpo kemá Sámériyaa-inimba úmpo íma nombá usimiyó siyó siráiye. Yútaa-kwaasiye Sámériyaa-kwaasiye íma moórá-anavinkemba kwénaantavena íma nombá usimiyó siyó súwana 10 Ísu séna Áánútumo kanaán-umaimo amínín-tantaaꞋa íma awánaraane. nombá usimiyómó súnda-kwaasigona ááimba íma suwánáánda-kwaasi úne. kesí ááimba suwánáándawairaankasi kwántámai se aasiyaasí maíꞋmaiꞋa ónááon-domba simiyó sénaꞋa amúsino súwana 11 minínínkó séna maandómbá avéúmpáꞋó kunkwáyáimba náán-anavina maíꞋmaiꞋo ónááon-domba uwíníyono. 12 kentáá síkwáꞋnáoma Yákópoma maandóm-báíꞋá uꞋmaréna kwená sipisípiye kwená akúnté tímakaimba pósa maandómbá kwénaawe. kemó súnda emá timíníyonda-nonkoma Yákópo tímakain-donkomba íma usáyaaitaniye kwésune súwana 13 Ísu séna maandómbó kwénaiyawaimo éna ókwaraꞋa nontávéna tinkánívo 14 kemó tíménda-nombo náíyawaimo éna íma ókwaraꞋa nontávéna tinkáníye. kemó tíménda-nombo náíyawaimo éna tirumpimbá nonayumpinkémbó usausa intenkáámbá ínasa pósa aúnáiꞋa umái maíꞋmaiꞋa ónááowe súwana 15 minínínkó séna emó sénda-nomba símínaꞋa naananá nontávéna íma sinkáínaꞋa íma maampínkémbá tauwónaumne súwana 16 Ísu séna enawaikómbá koááyamai áíꞋmae tiyó súwana 17 séna kesuwairíyaaimba úne súwana Ísu séna emá áraiꞋa séndamanivo 18 évaꞋaasei-kwamba mairé miwísé maémaenda isamá ívéꞋo minkwáásígó emó máyaanda íma enawaiꞋá isamá po árair-aimba simásimene súwana 19 minínínkó séna kemó imáyáamo únda Áánútun-aai simátimendanaꞋa óne. 20 Sámériyaa-kwaasi kentáá síkwáꞋnáma sésa maanómákáꞋá Áánútuna imáyáa mósá máráaro siráawaꞋa keinárawaꞋa Yútaa-kwaasi séꞋa Yérúsaremu-naopaꞋa Áánútuna imáyáa mósá máráaro sewé súwana 21 Ísu séna kemó sendamá áraire siyó. moórá-kanaamo tínímba maanómákákwárá Yérúsaremu-naopakwarare suꞋmainivo amápaꞋ-mapakwaraꞋa kesivoná imáyáa mósá maránááowe. 22 keinárawaꞋa Sámériyaa-kwaasi kwená imáyáa máráambanivo kwená ááimba íma awánareꞋa owe. Yútaa-kwaasiya kwená imáyáa mósá maréta kwená ááinta awánaraumne. Áánútu séna moóráwai sáwíꞋo umáímo máyáampinkemba kawer-ámpáꞋá métinkanae síníwai Yútaa-kwaasivinkemba paáriniye siráiye. 23 kesivo séna kesí imáyáama mósá maráíyamba íma tóikakemba éꞋa áraiꞋa tirunkakémbá kesí imáyáa mósá máráaro siráimba miráumai moórá-kanaama kwétisasamo áraiꞋo kesivoná imáyáamo mósá kwémaraiyawaima tirunkakémbá arupí umái kesivoná imáyáama mósá maránááowe. 24 Áánútumba áúma íma kwáyáísana amankómá máyáísasa pósa íma túrandei aneꞋá kwéawanaavo miráráán-umai Áánútuna imáyáamo mósá máráambo ombá kwenamankó túwaꞋnaa isasá tirunkakémbá kwená imáyáa mósá máráaro súwana 25 minínínkó séna Áánútumo usásinankaiwaima Káráísitiye sewáí kumíníye. kumíndaraꞋa amápa-tantaatavena simátiminiye sewaꞋá ísaraumne súwana 26 Ísu séna mináímbó séndawaima maandá kemá úne Ísu siráiye.

27 Ísu mináímbá súwasa kwená kwayó-kwáásí koyauwerésa Ísumo Sámériyaa-ininkontavena súmba Yútaa-kwaasiti namuro-ínínkóntávéna kwésuwana póna tááꞋa kówasa tirumpin-ímáyáámá ésa minínínkóntávéna nóintavaiya kwéankaisana íyó-imayaa ésa Ísuntavesa nóra séna minínínkóe kwésiyo-imayaa ésa íma taáísaa uwaná 28 minínínkómá kwená sawei-ánámá tuwéna naaópaꞋa kwéna simátimena séna 29 amápaꞋa uráunda-yantaaꞋa paárurain-kwaasi máyáiye. Áánútumo usásinankaiwaiyaꞋiya taawánaaro súwasa 30 naaópaꞋa tuwésa ÍsunopaꞋa tumbá 31 Ísuna kwayó-kwáásí Ísuntavesa sésa anóndakoo toómbá naaó amatááráꞋá suwaná 32 Ísu séna kemá íma awánaan-tomba makáumne súwasa 33 kwená kwayó-kwáásí keáímbá sésa nááwa toómbá maimaéna máámakaiyo suwaná 34 Ísu séna toóntávénamo tááimo kwétinkaintemba siꞋmákaiwain-aai iséꞋa kwená mayáímá maimaéꞋa kwégweꞋa ánásanaundayavai kwésinkaiye. 35 kígauvaꞋa kwáyáin-tontaveꞋa éíyain-kwiyomba ánásainana ávuma káínata ákáꞋmai torupánaumne kwésevo kemá séꞋa awánaaaro. ívéꞋa maankánáámá toómbó ávumo kaintembá miráráán-umai kwaásiyomba tíꞋmai ÁánútunopaꞋa kwiyónááowe. 36 kwaásiyombo tíꞋmai ÁánútunopaꞋa kwitinkáíyan-kwaasimo ésa miwí kaweꞋ-méyámbá mayáíyasa ÁánútunopaꞋa tíyan-kwaasi aúnáiꞋa umái maíꞋmaiꞋa ónááowe kwésune. évakarawai kígau úmaraiyasa óꞋowima akaránááowe kwésewe. miráumai kígau íyawaigwara akaráíyawaigwaraꞋo ésarai aamoí ónááowe. 38 óꞋowima kígau úmakaamba isaꞋá kemá tiꞋmáráúnaꞋa óꞋowiti mayáívínkén-tómbá kwéakaraawe Ísu kwántámai-aimba simátímakaiye.

39 ánivo minínínkó séna amápaꞋa uráunda-yantaaꞋa paáruraiye siráin-aimba isésa pósa Sámériyaa-kwaasi mindáópaken-kwaasi Ísuntavesa sésa áraiꞋa Áánútumo usásinankaiwaiman-iye sésa 40 ÍsunopaꞋa tésa sésa kentáásí naaópaꞋa tamaiyó suwaná Ísu kae-táwai koména 41 aaí simátimuwasa isésa sáwíva-kwaasigwaraꞋa sésa áraiꞋa sáwíꞋo umáímo máyaundavinkenta kawer-ámpátá mésinkaniwaiman-iye sésa 42 minínínkómbá simámesa sésa íma enááiye suꞋmaiyavetaanivo kwenáái ísaraundayaveta séta marapá-kwáásí sáwíꞋo umáímo máyaundavinkemba kawer-ámpátá mésinkaniwaiman-iye siráawe.

Ísu moórá-iyampoi asóvamankarain-kwasai.

43 Ísu kaeꞋ-nóꞋwáámbá kwaéna mindáópaꞋa tuwéna Káríri-ayampaꞋa kónáe séna kwéna 44 séna Áánútun-aai simátímíwain-awiꞋa kwenamááraa íma mósá máráavo áꞋon-daopaken-kwaasi kwenáwíꞋa mósá máráawe súwasa 45 miráumai Káríri-ayampaꞋa kúwasa mináyámpákén-kwáásí aamoí umánkaraawe. ááéma tíyótaasa í-tánón-kánááráꞋá miwí Yérúsaremu-naopaꞋa komésa Ísuna mayáímó mairáimba awánaraamba pósa aamoí umánkaraawe.

46 aamoí umánkówana Ísu Káríri-ayampaꞋa kwénaaena Kéna-naopaꞋa non-úranko ándá-aran-dombo kasúkáin-daopaꞋa kúmba kámááni-kwaasi Kápénéamu-naopaken-kwaasigo ááninkomba áíꞋa kwéuwana 47 Ísu Yútiyaa-ayampakemba Káríri-ayampaꞋa tiráin-aimba iséna ÍsunopaꞋa téna séna kesááninko puwíndayavena kwéisaꞋa úmpo kesí naaópaꞋa kuré koasóvamankaniyono súwana 48 Ísu séna ímo óꞋom-bayai-awaameꞋo awánéꞋo éꞋa íma kesááiyaveꞋa áraire sénááowe súwana 49 anóndakoo kesáánimba puwíndayavena kwéimba avekáán-umai tiyó súwana 50 Ísu séna enáánimba asóvagwivo kwaaó súwana Ísun-aaiyavena áraire séna kúmba 51 aampaꞋá kúmba kwená mayáí-kwáásí tésa sésa enáánimba áíꞋa éránkaraiye suwaná 52 tísaa ena séna kesáánimba nósa-tawaiya áíꞋa éránkaraiyo súwasa sésa tíndauma kwáyáꞋwái kokotámba éránkaraiye suwaná 53 avowámá imáyáa éna séna mitáwai enáánimba asóvagwiyemo siráimba áraiꞋa siráiye súmba pósa kwená akúmpákén-kwáásí amápaꞋa Ísun-aaiyavesa áraire siráawe. 54 Yútiyaa-ayampakemba Káríri-ayampaꞋa komáyomba moóráma kaweꞋ-máyáí-áwááméꞋá uréna minkáꞋá miníyámpóígómbá asóvamankowasa kwená akúmbá áraire siráawe.

Copyright information for `KZE