John 9

Ísu aúramba kavíkówaimba kaweꞋá umánkarain-kwasai.

Ísu kúmba moóráwaimba anówama aúgavitamba maránkarowaimba awánésa kwená kwayó-kwáásí áísaa esa sésa anóndakoo nááwana sáwí-yantaakona anondáwa aúramba kavíkáiyo. kwendéígówáꞋi. anóvowineigowaꞋiyo suwaná Ísu séna íma kwená sáwí-yantaakon-ivo íma anóvowiti sáwí-yantaakon-ivo Áánútuna kaweꞋ-máyáí kwenaneꞋá paárínasa awánanaaontavena aúramba kavíkáiye. siꞋmákaiwaina mayáíyá máyáano. sámo kainkáꞋó mayáímó kwémayaawanamo noꞋwáámbo aúráísanamo mayáímó máyáan-kanaamo ánásaintemba miráumai mayáímá mayáúnda-kanaama ánásanimba póta ívéꞋa Áánútuna mayáíyá mayánaumne. marapáꞋó maúnda kwaási sáma kamátinkainaꞋa úne séna mararáꞋá awirááíma kwiꞋmaréna mindánei toiraambá úmarena aúrankaꞋa aꞋmaréna simámena séna nonkwaaúnkó áwíꞋa Síróamu-kwaaumpimba awaaꞋá koyoraaó súwana mirá uráiye. Síróamuwemo súmba kwenááivinkemba kwántámai séna aiꞋmaráí-kwáúné súwana koyotuwéna aúramba awánamai kaweꞋá éna túwasa kwená naaópaken-kwaasiye ókwaasiye awánésa sésa kwemá aampaꞋó ména óntantemo inaai síma simaꞋa indaráꞋiyo suwasá évakarawai sésa owé kwemán-iye suwasá évakarawai sésa ímanivo mimbórá-óíkwáráráꞋiyo suwaná kwemá séna ímanivo kemá úne súwasa 10 áísaa esa sésa nóra ónana aúramba kaweꞋá iíyo suwaná 11 moóráwai áwíꞋa Ísuma kwemá awirááíma kwiꞋmaréna mindánei toiraaníꞋa úmarena súrankaꞋa aꞋmaréna simásimena séna Síróamu-kwaaumpimba awaaꞋá koyoraaó sisaꞋá iséꞋa suwaaꞋá koyoráúnana súramba kaweꞋán-iye súwasa 12 áísaa esa sésa náávara kuráiyo suwaná íma awánáúmne siráiye.

13 simátimuwasa áíꞋmaesa ámáán-kawaa-kwaasitopaꞋa máánkówana Ísuma toimá aúrankaꞋa aꞋmaréna aúramba kaweꞋá umánkaron-kanaama Yútaa-kwaasi monor-áímbá kwéison-kanaa mayáímá aambá áúmbakon-kanaama úwasa aúramba kaweꞋá umánkarowaimba áíꞋmaesa ámáán-kawaa-kwaasitopaꞋa máánkówasa 15 áísaa esa sésa nóra ónana aúramba kaweꞋá iíyo suwaná toimá súrankaꞋa asínkáisaꞋa suwaaꞋá koyoráúnana súramba kaweꞋá umásínkáiye súwasa 16 ámáán-kawaa-kwaasi évakaꞋa sésa agándaan-kanaaraꞋo mirá uráintavena íma Áánútunopakemba kunkáiye suwasá évakarawai sésa sáwí-imayaa-kwaasimo énaraankasi íma kanaán-umai kaweꞋ-máyáí-áwááméꞋá isinó suwasá imáyáama taaínkaaꞋa ésa 17 sésa enaúramba kaweꞋá umánkaraivo kwentáváí nóin-imayaawa kwéono áísaa esa suwaná Áánútun-aai simátímíwaiman-iye súwasa 18 ánivo miYútáá-ánón-kwáásí aúrambo kaweꞋó umánkontavesa íma imáyáa umbá anóvowi tááyowasa 19 tuyasá tísaa esa sésa kenkáítí tááninaꞋiyo. ánivo aúgavitana maránkaraayanaꞋiyo. nóra ena aúramba awánamai kaweꞋá kwéiyo suwasaráí 20 kesááninkain-iye. maránkarauyamba aúgavitane. 21 ánivo ívéꞋa nóra isaná aúramba kaweꞋá umái kwéawanaiyompo kwemá anómban-ivo áísaa íyana kweyááríkaꞋa simátimino sirááiye. 22 ááéma Yútaa-anon-kwaasi sésa Ísuntavesa Áánútumo usásinankaiwai kwéamuꞋmaraundawaiman-iye síyawai monoꞋ-náúmpáꞋá íma iyónááowe sumbá póna minánóvówí Yútaa-anon-kwaasiyavena tááꞋa kówasarai 23 sésarai anón-umaguraivo kwembá áísaa oro sirááiye.

24 simásúwóyasa ókwaraꞋa aúramba kaweꞋá umánkarowaimba ááyowana túwasa sésa minkwáásígó sáwí-imayaa kwéiye sewatá ísaraunda po Áánútu aúrankaꞋa arupí umái simásimiyo suwaná 25 sáwí-kwaasiyaꞋi. kawe-kwáásíyáꞋiyo. kemá íma isáúmne. moórá-yantaataveꞋa isáúnda súramba kavíkwimbanivo ívéꞋa súramba awánáúmne súwasa 26 nóraumai aúramba kaweꞋá umánkaraiyo áísaa esa suwaná 27 áꞋa simátimundanivo íma ísáawe. ókwaraꞋo simátimenaꞋo éꞋa isánááoo. kwenaráái kwaránáemo séꞋa kwená kwayó-kwáásí-íꞋa ónááowe súwasa 28 akáꞋáámba simánkesa sésa emá kwenaráái kwaráampo kesáámá Mósesi arááíya kwégwaraumne. 29 Áánútu Mósesimba aaí simámakaivo minkwáásí náávaken-kwaasiyaꞋiyo suwaná 30 mindáꞋá mirá séna kemá mirá sembánivo minkwáásí óꞋoran-kwaasin-iye. kemá súramba kaweꞋá umásínkaraisaꞋa súne. 31 kwemó ímo Áánútunopakembo kunkénaraankasi íma mirá uráisino. Áánútuma sáwí-imayaa kwéowai tááima íma kwéisaivo kwená mayáímó máyáawai tááima kwéisaiye. Áánútu áwíꞋo mósá maráawai tááima kwéisaiye. maambárámó úmaronkakemba íma moórá-augavitan-kwaasi máyáísana kaweꞋá umánkaraiye sewaꞋá kwéisaumne súwasa 34 enanóma aampaꞋá maránkaraisa po úwoivaken-kwaasima éma enáái kentáá kawe-kwáásíyá kwésimasimendayaanivo monoꞋ-náúmpákémbá kunákárúwaao suwaná kunákárúwaraiye.

35 minkákémbá Ísu aiꞋmátukaan-aimba iséna avakáá-umai awánéna áísaa ena séna kwíyómpakemba kwaási úrandakona arááíya kwégwaraano súwana 36 Ísuntavena séna anóndakoo emó sénda nááwawaꞋiyo. simásímínaꞋa kwenaráái kwáráano súwana 37 Ísu séna áꞋo aúrambo suwánáánda kemá úne súwana 38 emá Ísóigoma óne séna kívairena kwená imáyáa mósá makáiye.

39 kwená imáyáa mósá marówana Ísu séna marapáꞋá kunkáunda pósa kwaási avuntambá taaínkaaꞋa ónááowe. túrambo kavíkáindawai túramba kaweꞋá umái awánáíyasa túrambo awánemayaiyawai túramba kaviyíníye súwasa 40 ámáán-kawaa-kwaasimo évakaꞋo máyówai isésa áísaa esa sésa ewá séwa kentááyavaiya túramba kavíkáiwai owéwá seénó suwaná 41 Ísu séna túrambo kavíkáawaimo máyáankakai kentí sáwí-imayaagona meéyámbá íma kwáyáisino. áta awánáúmne sentávéna kentí sáwí-imayaagona meéyámbá kwáyáiye Ísu siráiye.

Copyright information for `KZE