Luke 14

Ísu aíyayaamba intorón-kwaasi asóvamankarain-kwasai.

moórá-tawai agándon-kanaaraꞋa Ísu ámáán-kawaa-kwaasi anón-kwaasigona naaúmpaꞋa toómbá náíndayavena umáyowasa agándai-kanaaraꞋo Ísumo nóramo índa awánanae sésa umésa awánowana moóráwai aíyayaamba kwéintoron-kwaasigo kwená egwaaꞋá máyowana Ísu minkwáásígómbá awánéna ámáán-kawaa-kwaasigo ámáámba sun-kwáásíyé tísaa ena séna agándaan-kanaaraꞋa kanaarárá áíꞋo in-kwáásí asóvamankanaundayaꞋiyo súwasa isésa íma aaí suwaná minkwáásígómbá áíꞋmai kaweꞋá umánkena séna ánivo kuwó súwana kóúwana tísaa ena séna keinárawapinkemba kentí iyámpóíyaꞋi. kentí pórááraꞋiyo. maipímbó pékainaꞋo éꞋa agándai-kanaaraꞋa ááéma mósá asinánááoo Ísu súwasa mináímbá íma kanaán-umai anondá siráawe.

kwaási íma kentúma maimaé iyí-kwásáí.

aaí íma anondá suwasá toómbó nánáesamo tun-kwáásí aivaꞋá uménaemo sumbá Ísu tuwánéna kwántámai-aimba séna moóráwai séna aaraimó tokwaa on-tánómbá tamandaaó sína íma aivaꞋá umaiyó. aivaꞋó uménanamo enáwíꞋo usáyaaitaraindawaimo tínanamo éna tááyaindawai entávéna séna usásinenana maankwáásígó maankáꞋá tamaíno sínana aigaemá umásuwe tínaaempaꞋa kumbéniyone. 10 ánivo tááyainamo tínaaempaꞋo uménanamo tááyainda-kwaasigomo kweyááríkaꞋo entávénamo séna kesí kwaásiyo usásine aivaꞋá umaiyó sínamo umáínasa awánésa enáwíꞋa mósá maránááowe. 11 anón-kwaasima úne síyawaima Áánútu miwí túwíꞋa móruna tiyuwánívo sáwíyan-kwaasima úne síyawaima Áánútu miwí túwíꞋa maimaé iyíníye Ísu siráiye.

12 Ísu simásuwena ááyarowaiyavena séna anón-tanomba kauvónáe sinda-táwai óísankwara-kwaasiye enamááraawe ená akúné ená kwaásiye suꞋmai íma tááyao. mirámó inasamó ésa naaémba ááyewa toómbá komandáníyonda mindá ená toónkóná anondáman-iye. 13 ánivo anón-tanomba kauvónáe sinda-táwai ímo óísambo makén-kwaasiye tíyayaamba sáwíꞋa urén-kwaasiye aúgavitan-kwaasiye tááyenasa tamandánááombanivo 14 ená toónkóná anondáma íma amíyambanivo enarunkó kaweꞋá ínana Áánútu ená toónkóná anondáma amíníye. naaémba arupí umái mén-kwaasi pukémpinkemba usásinaiya-tawai Áánútu amíníye Ísu siráiye.

anón-tanomba kauráin-kwasai.

Mátíyu 22:1-10

15 mináímbá súwasa Ísuwe toómbá kwénowai isésa uwaná moóráwai séna Áánútu kwená kwaási kawááipaꞋa toómbá nánááowai tirunkó aamoí íníye súwana 16 Ísu séna áraiꞋa simbánivo simátíménda imáyáa oró. moóráwai anón-tanomba kauvónáe séna sáwíva-kwaasi tááyamakena máyáísana 17 mintánómbó nánááon-kanaa sáwíyankaꞋa tínana kwená mayáí-kwáásígómbá aiꞋmáráísana tááyaraiwaiyavena séna toómbó naí kwétoꞋmayaan-ivo teró sisasá 18 miwí íma tií-áímbá sewaná moóráwai séna maramá meéyán-ureꞋa koawánanaumpo íma tanómba kauvópaꞋa kónaumne siyé kosimámiyo sisaná 19 moóráwai séna siyáánkai-poima meéyán-ureꞋa koawánanaumpo íma tanómba kauvópaꞋa kónaumne siyé kosimámiyo sisaná 20 moóráwai séna ívéꞋa aaraí mairáunda póꞋa tanómba kauvópaꞋa íma kónaumne siyé kosimámiyo sisaná 21 mimbáyáí-kwáásígó kwená anóndakonopaꞋa téna mirá sewé tasimámísana arunkó sáwíꞋa isaná séna avekáámbá naaóꞋ-naoꞋa kwénaae tíyayaamba sáwíꞋa uráinda-kwaasiye túramba kavíkáinda-kwaasiye óísamba íma makén-kwaasiye tivakáá-umai tíꞋmae tiyó séna aiꞋmáráísana 22 mimbáyáí-kwáásígó mirá kosimái koyauweréna taséna simásimendantemba kosimái tíꞋmaeꞋa túnda ená naaúmpaꞋa paaí karekóꞋa umái máyáawe sisaná 23 kwená anóndako séna amápa-kwaasi kesí naaúmpata sisipáá oró. amápar-ampaꞋa kwénaae kwaásimo tivakáá-e asiramái simái tíꞋmae tiyó siráiye. 24 Ísu séna simátimeꞋa séꞋa aivaꞋó tááyaraiwai íma tésa kwená toómbá íma tamandánááowe Ísu mináímbá kwántámai-aimba siráiye.

imáyáa kaweꞋá urésa Ísu-ánaaemba kwaránááon-kwasai.

Mátíyu 10:37-38

25 súwasa Ísuwe aampaꞋá kuwaná mégwantena simátimena séna 26 kesínaaemba kwaránáe síyawai aivaꞋá kembá imáyáa simésa naaémba anóvowiye awainínkówé kwená iyámpóíye kwenávárawaawe kwenáúnavare kwesáváíyé imáyáa oró. ímo mirámó íyamba uwóvíꞋa ónááovo mirámó ésamo ésa kesínaaemba kwarésa kesí kwayó-kwáásí-íꞋa ónááowe. 27 kemó puwónaunda-taimo súgwaataꞋmaeꞋo kondantembá kesínaaemba kwaránááowaima umbai-yántááꞋá timíyasa minúmbáí-yántááꞋó ímo maimaésamo sínaaembo kwáráamba uwóvíꞋa ombá pósa íma kesí kwayó-kwáásí-íꞋa ónááowe. 28 moórá-aimba ísáaro. ayáátááꞋ-namba ónáe síyawai aivaꞋá óntambo tuwésamo ónááon-imayaa ésa óntamba táámpamai awánáíyambo kanaamó ínasamo ésa mináyáátááꞋ-námbá ónááowe. 29 ímo táápamaimo awánaresamo mindámbó íyamba minóntámbá ánásagwinana mindámbá úwoi kwáyainasa kwaási awánésa íma áságwimai umásukaawe sésa tuwírááima sénááowe. 31 moórá-aimba ísáaro. moórá ááiꞋa tiyáívín-ánón-kwáásígó ááiꞋa tiyánáe séna aivaꞋá kwená i-kwáásí táámpainda sáwíva-kwaasi 10,000 kwaasi ínana óꞋon-i-kwaasiti anóndako kwená i-kwáásí táámpainda ávááraumai sáwíva-kwaasi 20,000 kwaasi ínana imáyáa éna kembá usáyaaitanaao. íya usáyaaitanaaoo séna 32 íma kanaán-umai usáyaaitanaumne-imayaamo énamo éna anón-kwaasi némpaꞋa máyainana aantá-kwaasi tiꞋmaréna séna íma ááiꞋa tiyánaundayaanivo úwoiya ménaum. nóraya ónaumno siyé kosimáméro síníye. 33 Ísu mináímbá simásuwena séna aivaꞋá ónááon-imayaa urésa naaémba síyantemba ónááowe. miráumai kesínaaemba kwaránáe síyawai aivaꞋá makáan-tantaatavesa imáyáa urésa íma mintántááꞋá tuwánaumnemo sésamo ésa kesínaaemba íma kwaránááovo mintántááꞋá tuwánaumnemo sésamo ésa kesínaaemba kwarésa kesí kwayó-kwáásí-íꞋa ónááowe Ísu siráiye.

uwígóná kwaasái.

Mátíyu 5:13, Mááka 9:50

34 Ísu simásuwena séna uwímá kawe-tántááꞋá imbánivo anómba ánásaisana ayáántámba kwáyáimbanivo óꞋa uwímó káíꞋa íma úmaranaaowe. 35 ayáántámba íma agámoꞋa maráíyana kaweꞋá ínívo úwoivaꞋa tuwánááowe. kwéisaawai ísámai kaweꞋá oró Ísu siráiye.

Copyright information for `KZE