Luke 18

moóráwai ketor-ínínkón-áái ísarain-kwasai.

Ísu séna aasiyaasí ÁánútumpaꞋa námúnaa kwésesa túwáavo séna kwántámai-aimba simátimena séna moórá-naopaꞋa aaimó isáí-kwáásígó ména íma Áánútu áároi inkaiséna íma kwaásiti imáyáa éna máyáísana mindáópaꞋa ketor-ínínkó ména aasiyaasí aaimó isáí-kwáásígónópaꞋa tóyo éna séna sáwíꞋa umásinkanaesa kwéovo aaí súwaꞋnaa umásinkaao sisaná ayáátáákaꞋa kwenáái íma ísarena naaémba imáyáa éna séna Áánútu ááꞋa íma inkaiséꞋa kwaásiti imáyáa íma éꞋa kwéunda póꞋa minínínkó kesópaꞋo timbá suwesaráánivaimpoꞋa áwaꞋnaa ónaumne siráiye. Ísóigo simásuwena séna aaimó isáí-sáwí-kwáásígón-áái imáyáa oró. Áánútuna kwaási kwempáꞋó námúnaamo símae kwéiyomba túwáavo séna íma ayáátáákaꞋa úwoi maéna miwí táái iséna sáwíꞋo umátínkénkaꞋa ááéma túwaꞋnaa íníye. naaémba kemá kwaási úrandako ókwaraꞋa kúmóndaraꞋa máyaiyan-kwaasivinkemba kesááiyavesamo áraire sésamo kesémo aráápai-iꞋa ónááo. íya ónááoo tuwánanaumne Ísu séna ÁánútumpaꞋo námúnaamo símae kwéiyomba túwáavo séna mináímbá siráiye.

ámáán-kawaa-kwaasigonte táákísi máyón-kwaasigontei kwaasái.

évakarawai kawe-kwáásí úne sésa kentúma maé iyésa óꞋon-kwaasi túma simái sáwíꞋa umátínkén-kwaasiyavena kwántámai-aimba Ísu simátimena séna 10 kae-kwáásígórai moóráwai ámáán-kawaa-kwaasigon-ivo moóráwai táákísi-ontamba máyáin-kwaasigo isasaráí anóm-bonoꞋ-naumpaꞋa námúnaa séyáe sésarai iyóyamba 11 ámáán-kawaa-kwaasigo kokuꞋá ména kwenáúma maé iyéna séna Áánútuwo kemá évakarawai ontembá íma kwéumpo entávéꞋa súwi kwésune. umóyámbó maésamo kampaꞋó kwésesamo aarai-úmóyámbá maésamo ombá kemá íma mirá kwéune. maa máyáiwai táákísi máyáin-umoyan-kwaasi intembá kemá íma mirá kwéune. 12 aasiyaasi-sóntááráꞋá kae-kae-táwai monotávéꞋa imáyáa éꞋa íma toómbá kwénaumne. aasiyaasi-kígáúgóná sontaaráꞋá mayáúnda-yantaaꞋa taaínkeꞋa kemá avaréíyaimba maéꞋa moóráma embá ámaꞋmaeꞋa kwéiyune sisaná 13 táákísi máyáin-kwaasigo moórávaꞋa kokuꞋá ména aigaemá éna kívairena séna Áánútuwo kempímbá sáwí-imayaa kwáyáivo arumbá umásinkaao siráiye. 14 Ísu mináímbá simátimena séna ísáaro. Áánútu táákísi máyáiwaina sáwí-imayaa mayáúwáísana Áánútuwe tágárotamai maéna kwená naaópaꞋa kwisaná ámáán-kawaa-kwaasigo kwempímbá sáwí-imayaa úwoi kwáyáísana kwená naaópaꞋa kuráiye. anón-kwaasi úne síyawaima Áánútu túwíꞋa móruna tuwánívo Áánútu aísamaivimba máyáawaima Áánútu túwíꞋa maimaé iyíníye Ísu siráiye.

Ísu iyámpói kaweꞋá umátínkarain-kwasai.

Mátíyu 19:13-15, Mááka 10:13-16

15 simátimuwasa évakarawai Ísu tátorena kaweꞋá umátinkainkwae sésa iyámpói tíꞋmaesa tuwasá kwená kwayó-kwáásí tuwánésa kóro suwaná 16 Ísu miníyámpóíyávéna tááyena séna teró. íma kóro séꞋa tiyuwáíyasa kesópaꞋa iyámpói úwoi teró. miníyámpóí kesópaꞋa tentembá Áánútu kwená kwaási kawááimba miráráán-umai kwégawaaimba iyámpói kesópaꞋa tí-amba íma ítátinkaaro. 17 áraiꞋa simátimeꞋa séꞋa Áánútuntavesamo sésamo iyámpóíraan-umai kenkáꞋá kwégawaa-onemo síyanamo éna miwíráꞋá kawááinivo ímo mirámó síyawaimo éna íma kawááiniye Ísu siráiye.

óísankwara-kwaasigona kwaasái.

Mátíyu 19:16-30, Mááka 10:17-31

18 súwana moóráwai Yútaa-kwaasiti anóndako ÍsunopaꞋa téna séna anóndakoo kaweꞋnáꞋá óne. nóra umáíya aúnáiꞋa umái kwíyómpaꞋa maíꞋmaiꞋa ónaumno súwana 19 Ísu séna kentáváí nóra séwa kaweꞋnáꞋá óne kwéseno. mimbóráwáí Áánútu kweyáá kaweꞋnáꞋán-iye. 20 Áánútuna ámáámba áꞋa ísaraane. minámáámbá aúváívimba agaimaréna séna íma aarai-úmóyámbá oró. kwaási tínkamiyasamo puwónááoniꞋa íma oró. íma umóyámbá máyáaro. íma kampar-áímbá simátinkaaro. kentinóvowi túwíꞋa anómba oró siráiye súwana 21 mindákó séna minámáámbá kesí iyámpóírakemba ísareꞋa póꞋa kaweꞋá úmae kwéiyune súwana 22 Ísu iséna séna kaweꞋá éma moórá-yantaaꞋa íma kaweꞋá uráampo ená náaindaamba óꞋon-kwaasi kwétime óntamba mairé ímo makéwai tímatuwenana ená kaweꞋ-méyámbá Áánútu kwíyómpaꞋa ankáníye. tímatuwemo e kesínaaemba kwaráníyone súwana 23 mináímbá iséna sáwívaꞋ-naaindaamba makóntavena anón-imayaa úwana arunkó sáwíꞋa uráiye.

24 arunkó sáwíꞋa kwéuwana Ísu awánéna séna sáwívar-oisambo makén-kwaasi Áánútumo kwená kwaási kawááipaꞋo kwíyamba umbaí táníye. 25 moórá-poigo áwíꞋa káámeri mimpóígó kwaigóná avaapimbá íma kanaán-umai kóveraniye. káámeri-poigomo kwaigóná avaapimbó kóverainkakai sáwívar-oisamba makén-kwaasi Áánútu kawááipaꞋa kosinó súwasa 26 mináímbá isésa áísaa esa sésa umbaí taintáváí nóran-kwaasiya Áánútu kawááipaꞋa ménaaoo suwaná 27 Ísu séna kwaási miwítí mayáínéí íma meéyámbaresa kónááovo Áánútu úwoi kanaán-umai mégwétinkaiye súwana 28 Pítaa séna isaaó. kentáásí naaópaꞋa tuwéta enánaaemba kwégwaraumne súwana 29 Ísu séna áraiꞋa simátimeꞋa séꞋa Áánútu kwená kwaási kwégawaaintavesa imáyáa ombá naambáruꞋa tuwésa tuwaínímbááꞋa tiyuwésa tuwaaísái tiyuwésa tinóvowi tiyuwésa táánimbaaꞋa tiyuwésa tiyáámúmbaaꞋa tiyuwésa miráumaimo túwáawaina anondáma 30 marapáꞋó máyáankaꞋa túwáán-tantaaꞋa mirán-tántááꞋá sáwívaꞋa mémaesa naaén-kanaa aúnáiꞋa umái kwíyómpaꞋa maíꞋmaiꞋa ónááowe Ísu siráiye.

Ísu kwemó puwíníntavena siráin-kwasai.

Mátíyu 20:17-19, Mááka 10:32-34

31 Ísu kwená kwayó-kwáásí sísamaivakemba kaeꞋá kumbaimái-kwaasi tíꞋmaena moórá-ayampaꞋa tínkarena simátimena séna maísáaro. Yérúsaremu-naopaꞋa konanayá naaóváꞋó Áánútun-aaimo simátímakowaimo kwaási úrandakon-aai agaimakáan-aimba paáriniye. 32 kembá síꞋmai óꞋonkaa-kwaasi timíyasa kanaárááꞋa kwésinkesa simái sáwíꞋa umásinkesa tuwirááíma kwisinkésa 33 súwírukuꞋa nésa sínkamiyaꞋa púwónasa utamásinkaiyaꞋa kaumbo-táwai maisuwéꞋa usásinanaumne Ísu súwasa 34 kwená kwayó-kwáásí nóin-aintavena siíyó sésa mináínkóná ááimbo aúpáꞋó kwáyontavesa íma ísámai kawer-ésa Yérúsaremu-naor-ampaꞋa kuráawe.

Ísu aúramba kavíkówaimba kaweꞋá umánkarain-kwasai.

Mátíyu 20:29-34, Mááka 10:46-52

35 Ísu aampaꞋá kúmba Yéríko-naor-egwaaꞋa kúwana moóráwai aúramba kavíkówai óntamba inaai simái mayánáe séna aanéivaꞋa kumbéna kwéinaai séna 36 sáwíva-kwaasimo tésamo kínkimbo sumbá iséna nááwiyaꞋo súwasa 37 Ísu Násáretivakewai kwétiye suwaná 38 anónkaꞋa séna Ísuwo Tévítin-andarakewai ómpo arumbá umásinkaao súwasa 39 aivaꞋá tun-kwáásí áwááꞋa aéésa sésa aaiseraaó suwaná mináímbá ivá kwétuwena óꞋomba anónkaꞋa séna Ísuwo Tévítin-andarakewai ómpo arumbá umásinkaao súwana 40 Ísu aampaꞋó kweémáyomba kwená egwaaꞋá kousásinena séna áíꞋmae teró súwasa áíꞋmaesa egwaaꞋá tuwaná Ísu áísaa ena séna 41 nóin-tantaara embó arááímo táínda-yantaaꞋa umánkanaumno súwana anóndakoo súramba kaweꞋá umásinkaao súwana 42 Ísu séna kentáváí kanaán-umai súwaꞋnaa íníwaiman-iye sénda póna aúramba kaweꞋá íno súwana 43 avekáámbá aúramba kaweꞋá umái awánéna Ísun-ánaaemba kwaꞋmái kwégwena Áánútu áwíꞋa mósá marówasa sáwíva-kwaasi awánésa Áánútu áwíꞋa mósá makáawe.

Copyright information for `KZE