Revelation of John 3

mináímbá Sátisi-naopaꞋa simátímakain-kwasai.

Ísu simásímatuwena séna Sátisi-naopaꞋa Ísóigona kwaásiraꞋa kárákwiraindawaimba maanáímbá agaimái túwénana awánáíno. Áánútun-amamba avakaeté-asirayan-amamba toréꞋa avakaeté-oꞋa tokáundawai maanáímbá simámumpo simámiyo. mirá úndawai póꞋa kemó kwéomba áꞋa tuwánaraumne. keinárawatavesa sésa Áánútuna kwaásiman-owe sembánivo máyáawaina ááimba tuwánaraumne. Áánútun-aai tóikakene suꞋmai kwéseꞋa máyáawaina ááimba Áánútuna némpaꞋa máyáavo kentúraꞋa kárákwiyoro. Áánútun-aai tuwáúnavo séꞋa tátoꞋmai kaweꞋá oró. Áánútu aúrankaꞋa kentí mayáí íma arupí-mayain-ivo kentúraꞋa kárákwiyoro. Áánútun-aai ísámai tátokaan-aimba imáyáa éꞋa kesópaꞋa téꞋa mináímbá kwétaagwiyaveꞋa máéro. ímo mirámó íyaꞋo éꞋa kuméꞋa sáwí-meyamba timénaumpo umóyán-kwáásímó tembó ímo ísaraawasamo tentenkáán-umai íma ísarenkaꞋa kuméꞋa sáwí-meyamba timénaumne.

ánivo keinárawaꞋa Sátisi-naopaken-kwaasivinkemba évakarawai íma sáwíꞋa umái méꞋa kaweꞋó umáímo máyáan-kwaasi kwayán-únánkwátóiraamba umái máyáamba póꞋa kesé ménaaowe. sáwí-yantaakomba usáyaaitaraiyawai miráumai kwayán-únánkwátói úmaresa ménaaowe. Áánútu aúrankare kwíyómpaken-kwayoꞋnarawa túrankare miwí túwíꞋa téꞋa kesí kwaásiye séꞋa miwí túwíꞋa íma tawígáúvaranaumne. aúnáiꞋa umái maíꞋmaiꞋa ónááon-kwaasi túwíꞋa agaimakáin-auvai-kwandaaivinkemba íma tawígáúvaranaumne.

ísáawai póꞋa Áánútun-amanko Ísóigona kwaási amápaꞋa kwésimatimin-aimba ísámai kaweꞋá oró. mináímbá aúváívimba agaimái simátimiyo Ísu simásímakaiye.

mináímbá Vírátéoviyaa-naopaꞋa simátímakain-kwasai.

Ísu simásímatuwena séna Vírátéoviyaa-naopaꞋa Ísóigona kwaásiraꞋa kárákwiraindawaimba maanáímbá agaimái túwénana awánáíno. óꞋoran-kwaasi éꞋa árair-aine suꞋmai kwésundawai úne. Tévítimo kárákwironteniꞋa umái kárákwiyeꞋa ontarákén-kíráꞋá kárákwiraunda póꞋa usáveraaromo senda-kwáásímó ésa usáveranaaowe. íma usáveraaromo sendawáímó ésa íma usáveranaaowaꞋa maanáímbá simámumpo simámiyo. mirá úndawai póꞋa kemó kwéomba áꞋa tuwánaraumne. ísáaro. aambá kwitinkáúnda pósa íma aambá ítátinkanaaowe. sáwíyan-asirayamba mairéꞋa máyáambanivo kesáái íma tuwéꞋa taagwiyavéꞋa kwaási túrankaꞋa Ísuna kwaási úne sembá tuwánaraumne. évakarawai kampaꞋá sésa Yútaa-kwaasiya úne sembánivo Sáátáánigo aráái kwégwaraawai imáyáa tíménasa kentópaꞋa tésa kívairesa keinárawatavesa sésa Ísu arumbá tímakaiwaiman-owe sénááowe. 10 kemá séꞋa asiramái méꞋa simuꞋmáráaro siráunda póꞋa miráumai méraawe. amápaꞋ-maravaꞋa máyáan-kwaasivaꞋa umbai-yántááꞋá téna sáwíꞋa umátinkanimba asiramái méꞋa simuꞋmáráantaveꞋa kemá kárákwiyonaumne. 11 sáwíyankaꞋa kumónaunda póꞋa kesí imáyáa tavisimái sáwíꞋa umásinkaiyata kaweꞋ-méyámbá íma mayánaumpo séꞋa kesáái tirumpimbá tátoꞋmai kaweꞋá oró.

12 naamayáámbo naambó ésamo áyáántemba sáwí-yantaakomba kwéusayaaitaawai kesivo Áánútuna monoꞋ-náúmpáꞋá naamayáánkaamba aitínkáánasa aasiyaasí maíꞋmaiꞋa ónááowe. sáwí-yantaakomba kwéusayaaitaawai tineꞋá Áánútu áwíꞋa agaéꞋa kesúwíꞋa aúná-kwiꞋa agaéꞋa Áánútuna naaór-awiꞋa agaéꞋa ónaumne. mindáóꞋa Yérúsaremu-naopakaan-daoꞋa imbánivo aúná-naoꞋa kwíyómpakemba Áánútumpakemba kumínín-dao-kwiꞋa tineꞋá agayánaumne. 13 ísáawai póꞋa Áánútun-amanko Ísóigona kwaási amápaꞋa kwésimatimin-aimba ísámai kaweꞋá oró. mináímbá aúváívimba agaimái simátimiyo Ísu simásímakaiye.

mináímbá Áréótísiyaa-naopaꞋa simátímakain-kwasai.

14 Ísu simásímatuwena séna Áréótísiyaa-naopaꞋa Ísóigona kwaásiraꞋa kárákwiraindawaimba maanáímbá agaimái túwénana awánáíno. árair-ainkona ááimba kemá éꞋa Áánútun-aai arupí umái simátimeꞋa Áánútu tarórurain-tantaakona ááimba úndawai maanáímbá simámune. 15 mirá úndawai póꞋa kemó kwéomba áꞋa tuwánaraumne. kesáái íma siyúwáambanivo tirumpimbá íma asiramái tátokaawe. kesááimo tínaaembo umásiyuwaankakai mirán-kwáásímá éꞋa ombá kanaán-iye súsino. kesááimo tirumpimbó asiramáímo tátokaankakai mirán-kwáásímá éꞋa ombá kaweꞋán-iye súsino. 16 kesáái íma siyuwéꞋa kítokaꞋa tátokaavo íma anónkaꞋa tátokaamba póꞋa kesópakemba tiꞋmaránaumne. 17 keinárawaꞋa kampaꞋá séꞋa kaweꞋá umái méꞋa íma moórá-yantaaꞋa aáváán-tukáumne kwésembanivo kesúrankaꞋa sáwíꞋa umái méꞋa óísaniyaain-kwaasiraamba éꞋa unáánkwátóiyaain-kwaasiraamba éꞋa túramba kavíkain-kwaasiraamba méꞋa íma awánamai kawer-owaná sirumbá kwéiye. 18 kawer-áímbá simátíménda ísáaro. kesópaꞋa téꞋa kesópaken-tantaaꞋa mayánááontaveꞋa moórá-ontanko áwíꞋa kóri agaimáímo kaweꞋó úmakaan-ontamba meéyámbaranaaowe. unáánkwátóiyaain-kwaasi tigaeráámbá kwéiye séꞋa kesópakemba kwayán-únánkwátói meéyámbaranaaowe. túramba awánamai kawer-ónááontaveꞋa kesópakemba túrankona masawémba meéyámbaranaaowe. 19 kesirumbá timúnda-kwaasi kesáái kaweꞋá umái isáígwáe séꞋa asémbai kwéarupi-umatinkanaumne. mindáyaveꞋa sáwí-imayaa tuwéꞋa kesópaꞋa teró. 20 maísáaro. keinárawate ménae séꞋa kwétaaeꞋa timuꞋmaréꞋa máyaumne. kesimósámba iséꞋa ontá tisinkéꞋa iyuwó síyawai kemá kesé méꞋa toómbá naanaꞋá kesé méꞋa toómbá nánááowe. 21 sáwí-yantaakomba kwéusayaaitaiyawaiyaveꞋa séꞋa kesé kwaásiraꞋa kawáá ónááowe sénaumne. sáwí-yantaakomba usáyaaitareꞋa kesivowé kwaásiraꞋa kawáá úyantemba kwéusayaaitaiyawai kesé kawáá ónááowe. 22 ísáawai póꞋa Áánútun-amanko Ísóigona kwaási amápaꞋa kwésimatimin-aimba ísámai kaweꞋá oró. mináímbá aúváívimba agaimái simátimiyo avakaeté-onkona avumpimbá máyowai mináímbá simásímakaiye.

Copyright information for `KZE