Revelation of John 6

Ísu misánómbá tátukain-kwasai.

kwená imáyáa mósá márówaꞋa awánaawanda sipisípi-araakaawai kentáásí sáwí-meyambo mairáiwai aiva-sánómbá tátuwowana minéíyáímbó túvamaimo máyówaivinkemba moóráwai anónkaꞋa kwíyónaairaamba umái séna tiyó súwaꞋa iséꞋa awánaawanda moórá-poigo áwíꞋa ósimba kwayán-ósínkómá moóráwaimba ayááꞋmaena túwana imá ayáámpimba tokówana moóráwai usáyaaitaraiwaina kánumoꞋa ámakowana usáyaaitaraiwai namuro-kwáásí usáyaaitanae séna kúwaꞋa awánaraumne.

minkákémbá kentáásí sáwí-meyambo mairáiwai minkáké-sánómbá tátuwowana minéíyáímbó túvamaimo máyówaivinkemba moóráwai séna tiyó súwaꞋa isááwánana moórá-poigo áwíꞋa ósimba naaeyayán-ósínkómá moóráwaimba ayááꞋmaena túwana taánasatama aména asirayámbá amúwana taumó karáí-yántááꞋá ivá kwétuwowasa ááiꞋa tiyésa tínkankaawe.

minkákémbá kentáásí sáwí-meyambo mairáiwai minkáké-sánómbá tátuwowana minéíyáímbó túvamaimo máyówaivinkemba moóráwai séna tiyó súwaꞋa iséꞋa awánaawanda moórá-poigo áwíꞋa ósimba avután-ósínkómá moóráwaimba ayááꞋmaena túwana sikerimá tokówana minéíyáímbó túvamaimo máyówaivinkemba moóráwai ayawaimá táínana sáwíyan-tomba kwénintavena séna moórá-tawai-kigaugona meéyán-tómbá sáwíyan-tomba maésa moórá-mora-umai mayánááowe. masawémbo atíyén-taeramba mintáímá íma sáwíꞋa íníyone. ándágo arampinkémbá anombá kwénaan-kigau íma sáwíꞋa íníyone siráiye.

minkákémbá kentáásí sáwí-meyambo mairáiwai minkáké-sánómbá tátuwowana minéíyáímbó túvamaimo máyówaivinkemba moóráwai séna tiyó súwaꞋa iséꞋa awánaawanda moórá-poigo áwíꞋa ósimba terávu áúmaisan-osinkoma moóráwaimba ayááꞋmaena túwasa minkwáásígó áwíꞋa púwówe suwaná kwenánaaemba túwai áwíꞋa púwón-ayampare siráawe. amápaꞋ-marama éíyainkaꞋa taaínkaar-éna asirayámbá timúwasarai moórávaꞋa kwégwesarai tínkambae kuyasá púwúwana ayawaimá tówana toómbá íma úwasa púwúwana tíꞋa kwéuwasa púwúwana aváá-póíyónkó kwaási kwévowasa púwúmba tuwánaraumne.

minkákémbá kentáásí sáwí-meyambo mairáiwai minkáké-sánómbá tátuwowaꞋa awánaawanda Áánútuntavesa ísámaimo póímo tuvúꞋmáímo agáyón-onta-taareigona améndaampaꞋa kwaási timankó méraawe. minkwáásíyómbá Áánútun-aai kwésimatimaꞋmaesa kwéiyuwasa áwááꞋa tiyésa tínkamuwasa pukésa 10 anónkaꞋa sésa Ísóigoo asirayán-úramba mé óꞋoran-kaweꞋa umái mé árair-ainkona ááimba po marapá-kwáásí sínkankaawai nósa-tawai anondá aaí simátinke sáwí-meyamba timíníyono suwaná 11 moóráwai kwayán-únákwátói moórá-mora-umai kwétimena séna sáwíyankaꞋa timuꞋmáréwasa keinárawaꞋo Áánútuna mayáímó mairáantemba Áánútuna kwaási mirá kwéomba tínkamiyasa puwíyana ánásainaꞋa miwítí sáwí-meyamba timénaumne siráiye.

12 minkákémbá kentáásí sáwí-meyambo mairáiwai minkáké-sánómbá tátuwowaꞋa awánaawanda anóm-barima tówana aaváúmá avuwúwana avután-ampaantaraamba úwana kwíyómba naaeríríꞋa úwana 13 anón-unda torówana taaéramba ímo ávumo karón-taeramba kútúmaena marapáꞋá kumúnten-umai oꞋá kásímaena marapáꞋá kunkáiye. 14 kwátóimo tavú úmáráantemba sokón-tawaai tavú úmarena aúyokuwana amápar-omare nonavuvumpaꞋ-máráwé moórávaꞋ-moravata uráiye. 15 marapáꞋá kwaásiraꞋa kawáá uráawaiye anón-kwaasiye i-kwáásítí anón-kwaasiye óísankwara-kwaasiye asirayánkwárá-kwáásíyé óꞋowiti mayáí kwémaesa íma meéyámbá kwémayaawaiye úwoi kwénaaon-kwaasiye amáparawaiye omákare óntampine muri-áívíné aúpáꞋá mésa 16 omákontavaiye óntankontavaiye sésa kawááin-avaraꞋa máyáiwaiye sipisípi-araakaawaiye suwánésarai áwááꞋa siyéyavaiyaanivo augwímae siráápaaro. 17 áwááꞋo siyí-kánáá tisatá íya aseránaumpo augwímae siráápaaro sumbá ísaraumne.

Copyright information for `KZE