Romans 11

Áánútu Ísareri-kwaasi arumbá kwéumatinkain-kwasai.

simátíménda ísáaro. áraiꞋa Áánútu kwená kwaási Yútaa-kwaasi íma ánaaemba umátímakaiye. kemá miwívínkéwáí éꞋa Ísareri-kwaasi póꞋa Ááváramu aísaavutantambo úndawai éꞋa Pénisamini minándárákéwáímá úne. naaóváꞋá Áánútu Yútaa-kwaasi ítámarena ánaaemba íma umátímakaiye. Íráiyaan-aai agaimakáimba ísaraawe. naaóváꞋá Íráiyaa Ísareri-kwaasiyavena íꞋái séna Áánútuntavena séna

Ísóigoo enáái simátímakaawaivinkemba sáwívarawai tínkamuwasa púwúwasa óntan-taareima tawísíyuwesa entávésamo imáyáamo ésamo póímo tuvúꞋmáímo agaimakáan-taareima tawísíyukaawe. enááimo simátímakaawaivinkemba keyáá máyaunda pósa kenkwáráꞋá sínkamonaaowe
Íráiyaa súwana
Áánútu simámena séna

ímanivo kesí kwaási ménaaontavena sáwívarawai 7,000 kwaasi tátokaunasa kampar-ísóígó áwíꞋo Páárimba kwenáwíꞋa íma mósá makáawe
Áánútu simámakaiye.
mirámó uráintemba ívékwaraꞋa Áánútu arumbá umátínkáíwaiyavena Yútaa-kwaasivinkemba évakarawai ítámakaisasa máyáawe. miwítí mayáíyávéna íma ítámakaivo arumbá umátinkenayavena ítámakaiye. miwímó kaweꞋ-máyáímó mairáawaina anondá íma ítámakaivo kwemá arumbá umátinkenayavena ítámakaiye.

miráumai Ísareri-kwaasi Yútaa-kwaasi Áánútumo kwenaúrankaꞋo arupímo kwéumatinkain-amba avakáá uwááesa owasá amáparawai íma awánaraavo Áánútumo ítámakaiwai évakarawai awánaraawe. Áánútu tááyaraimba tááꞋa káúnkurain-kwaasiraamba ésa íma ísáawasa évakarawai ísaraawe. naaóváꞋá Áánútun-aai aúváívimba agaimaréna séna

Áánútu séna tívón-kamátinkaumne súwana tívó kwégowasa íma kanaán-umai aaí ísaraamba mirámó uraántemba ívékwaraꞋa mirá kwéowe
agaimaréna siráisana
Tévíti agaimaréna séna

toóntávésawe suꞋmai anón-imayaa ésa sésa kaweꞋá umáíya máyaumne síyambanivo minímáyáágó kampaꞋá simátiyuwainasa sáwíꞋa umái mésa sáwí-meyamba mayánááowe.
10 miwí túramba kavíkurainasaraamba íma awánanaaowe. miwítí umbai-yántááꞋá kwaíkwaiꞋa éna íma ánásaniye
Tévíti siráiye.
11 mináímbá imáyáa éꞋa simátíménda ísáaro. Yútaa-kwaasi kampar-ámbá kwégwaraambanivo naaémba íma mirá ónááowe. Yútaa-kwaasi Áánútun-aai arááíraankaꞋa óꞋonkaa-kwaasi Áánútumo sáwíꞋo umáímo máyáampinkemba kawer-ámpáꞋó métínkáin-aimba isésa áraire kwésemba Yútaa-kwaasi isésa tirunkó sáwíꞋa ínasa kegwárátá miráumai kwaránáe sénááowe. 12 Yútaa-kwaasi sáwíꞋa ésa sáwí-amba kwégwaraamba mindáyavesa óꞋonkaa-kwaasi kawer-ámbá kwégwaresa kaweꞋá umái máyáawe. miráumai naaémba Yútaa-kwaasi Ísu Káráísitin-aaiyavesa áraire sésa kawer-ámbá kwaránááomba sáwívarawai tuwánésa ávááraumai kaweꞋá umái ménaaowe.

óꞋonkaa-kwaasi kawer-ámpáꞋá mégwétinkain-kwasai.

13 íma Yútaa-kwaasin-ovo óꞋonkaa-kwaasiyaveꞋa imáyáa éꞋa simátíménda ísáaro. Áánútu kentávéna séna óꞋonkaa-kwaasi kesáái kosimátímaꞋmae naauwó séna siꞋmákaimba mimbáyáí anóm-bayaiman-iye kwésune. 14 óꞋonkaa-kwaasi kwésimatimunda imáyáa éꞋa kesí kwaási Yútaa-kwaasi isésa tirumbá sáwíꞋa ínasa kegwárátá miráumai kwaránáe sénááowe-imayaa kwéune. Yútaa-kwaasi mirá íyana Áánútu kawer-ámpáꞋá métinkanintaveꞋa óꞋonkaa-kwaasi simátímaꞋmae kwéiyune. 15 Áánútu Yútaa-kwaasi ánaaemba umátímakainkaꞋa óꞋonkaa-kwaasi sáwívarawai kwená kwaási-iꞋa umátínkaraisasa miráumai naaémba Yútaa-kwaasi ÁánútumpaꞋa tíyana Ísu Káráísitina kwaási-iꞋa umátinkanimba pukésa usásinaaraꞋnaraamba ónááowe.

16 Yútaa-kwaasiyaveꞋa imáyáa éꞋa simátíménda ísáaro. évakarawaimo toómbó ayááímó topámbaimo Áánútumbo ámémba mintómbá mútúꞋa Áánútundeiman-iye. évakarawaimo sésamo mintáí-ánúꞋá Áánútundeiman-iye sembá mintáímá amápaꞋa kwendéímán-iye. 17 moórá-taigo áwíꞋa órívema kígauvaꞋa kwáyáin-taima mintáíráámbá umái Yútaa-kwaasi máyáawe. Áánútu minórívé-táígó ayáánamai arátuwena úmípakemba áváár-orive-taigo ayáánamai aráꞋmai máyavusumaraisana ávóiraken-anomba tamandéna anón-uraiye. áváár-orive-taigo ayáánamairaamba kemá óꞋonkaa-kwaasiman-owe. 18 mindáyaveꞋa kentúwíꞋa íma maimaé iyéꞋa arátukain-ayaanamaiyaveꞋa úwoisamba owatá kesáá anómba úne íma seró. mintáígó asirayámbá kwétimivo keinárawaꞋa mintáígómbá íma asirayámbá kwéamevo kentúwíꞋa íma maimaé íyóro.

19 kentúwíꞋa íma mósá maréꞋa séꞋa Áánútu kentáá máyavusumarinintavena ayáánamai arátukaiye íma seró. 20 maarán-áímbá árair-aimban-iye. Yútaa-kwaasi Ísu Káráísitin-aaiyavesa íma áraire siráantavena arátukaisaꞋa keinárawaꞋa áraire siráantavena miwí tinondá máyáawe. mindáyaveꞋa íma kentúwíꞋa mósá máréwana tááꞋa káínaꞋa kárákwiyoro. 21 Yútaa-kwaasi ayáánamai-uramban-ovo Ísu Káráísitin-aaiyavesa íma áraire sentávéna arátúwáísasa máyáamba póꞋa keinárawaꞋo mirámó íyanamo éna Áánútu mirá íníye. 22 Áánútu évakarawai arumbá umátinkena évakarawai sáwí-meyamba timínímba imáyáa oró. sáwíꞋo uráawai sáwí-meyamba tiména kembá kaweꞋá kwéumatinkaiye. kaweꞋó umátínkáípaꞋo ímo maíꞋmaiꞋo íyanamo éna ayáánamaimo arátukaintemba keinárawaꞋa mirá íníye. 23 Yútaa-kwaasimo sáwí-ambo tuwésamo Ísu Káráísitin-aaiyavesa áraire síyanamo éna Áánútu asirayámbá tokáiwai tiréna ááémo maémáémpaꞋa mótinkaniye. 24 óꞋonkaa-kwaasi áváár-orive-taigo ayáánamairaamba owaná Áánútu arátuwena kawer-órívé-táívímbá máyavusumakaimba mindá umbaí tairáiye. Yútaa-kwaasi kawer-órívé-táíráámbá owaná Áánútu minkáwé-táígó ayáánamai arátukaimbanivo ókwaraꞋa maimaí Yútaa-kwaasi máyavusumaranimba mindá íma umbaí téna kanaán-umai íníye.

Áánútu amáparawai arumbá kwéumatinkain-kwasai.

25 kesí kwaásiyono. kesáá anón-kwaasiya úne sevó séꞋa avoraꞋó simátíménda ísáaro. Ísareri-kwaasi Ísu Káráísitin-aaiyavesa íma áraire sembánivo íma mirá úmae iyésa naaémbo óꞋonkaa-kwaasimo Áánútumo ítámakaiwaimo ÁánútunopaꞋo tíyankaꞋa Ísareri-kwaasi Ísu Káráísitin-aaiyavesa áraire sénááowe. 26 miráumai Áánútu Ísareri-kwaasi sáwíꞋo umáímo máyáampinkemba kawer-ámpáꞋá métinkaniye. mindáyavena naaóváꞋá Áánútun-aai aúváívimba agaimaréna séna

sáwíꞋo umáímo máyáampinkemba kawer-ámpáꞋá métínkáiwai Sáíyono-naopaꞋa paáréna Yákópo aísaavutantamba uráawaiti sáwí-imayaa maitiyuwáníye.
27 sáwí-imayaa maitíyúwáandaraꞋa simáímo tarúmakaunda-aimba paáriniye Áánútu siráiye
agaimaréna Ísareri-kwaasi Yákópo aísaavutantamba uráawaiyavenawe miwítí anón-daopaꞋa áwíꞋa Sáíyono-naopatavenawe agaimaréna siráiye.
28 Yútaa-kwaasivinkemba sáwívarawai Ísu Káráísitin-aai arááíraamba pósa Áánútuna namuro-kwáásíráámbá ompínkémbá óꞋonkaa-kwaasi kwenáái iséꞋa áraire siráawe. Yútaa-kwaasi tíkwáꞋnáma Áánútu simái tarúmakaintavena miwí tísaavutantamba uráawai kwená kwaási-iꞋa umái ítámakaiye. 29 Áánútu kwená kwaási-iꞋa umái ítámakena kaweꞋá umátínkaraimba íma ivátiyuwena óꞋon-imayaa íníye.

30 ááéma kemá óꞋonkaa-kwaasi Áánútun-aai arááíraawasa naaémba Yútaa-kwaasi mirá uráamba póna ívéꞋa Áánútu keinárawaꞋa arumbá kwéumatinkaiye. 31 Yútaa-kwaasi Áánútun-aai arááíraawana keinárawaꞋo arumbó kwéumatinkaintemba naaémba miwí arumbá umátinkaniye. 32 amáparawai Áánútun-aai arááísúwana Áánútu séna sáwíꞋo kwéomba mindágo tátokaiye séna arumbá umátinkanintavena mináímbá siráiye.

Áánútu áwíꞋa anómba úmae kwéiyin-kwasai.

33 Áánútu ávááraumai arumbá umátinkena kawer-ímáyáá éna amápa-tantaatavena imáyáa isaná mirám-baaran-aimbo ÁánútunopaꞋo kwáyáimba íma kanaán-umaiya kwéisaunanaya mirám-baaram-bayaimo kwémayaimba íma kanaán-umaiya kwéawanaundayaawe. 34 Áánútun-aai aúváívimba agaimaréna séna

Ísóigomo imáyáamo kwéimba íma kanaán-umai kwéisaawe. Ísóigomo máyáim-bayai íma kanaán-umai táásá umai kwémayaawe.
35 moórá-yantaaꞋa simíyaꞋa kemá anondá tíménoma íma siwáímá póna kwemá ísarena kwétimiwaiman-iye
agaimaréna siráiye.
36 Áánútu amápa-tantaaꞋa úmáráísana kwená asirayámbá kwáyáintavena amápa-tantaaꞋa kwáyáimba pósa kwenáwíꞋa mósá maránááontavena amápa-tantaaꞋa kwáyáiye. mindáyaveta Áánútumo mayáímó kwémayaimba íma kanaán-umaiya amápaꞋa kwéawanasaundayaanivo kítokaꞋa kwéawanaundayaaniye. kwenáwíꞋo anómbo úmae kwéiyimba árair-aimban-iye.

Copyright information for `KZE