Romans 15

Ísumo ímo kwesáváí-ímáyáámó uráintemba mirá oró-kwásái.

kesáá Áánútuna aampaꞋá asiramáíya kwégwaraundawaiya Áánútuna aampaꞋó ímo asiramáímo kwégwaraawai túwaꞋnaa ono. sirááímo tainíꞋo kwéundayaawe suꞋmai íma imáyáa éta kentáásí egwaaꞋó máyáawai Áánútuna aampaꞋá asirámae kónááontaveta miwíyáváígwáráꞋá imáyáa éta túwaꞋnaa ono. Ísu Káráísiti íma kwesáváí-ímáyáá éna kwaásiyavena imáyáa uráiye. mindáyavena naaóváꞋá Áánútun-aai aúváívimba agaimaréna séna Káráísiti Áánútuntavena séna

simái sáwíꞋo umánkaraawai pósa kembá
sáwíꞋa umásínkaraawe siráiye
agaimaréna siráiye.
naaóváꞋá Áánútun-aai aúváívimba agaimakáamba maarán-áíntávésa agaimakáawe. súwaꞋnaa ínanaya íma ááéma sívón-káínata Áánútun-aaiyaveta asiramái imáyáa kwéeta kwesé ménaundayaveta amuꞋmaréta máyaumne. mindáyavesa aúváíma agaimakáawe.

íma tívón-káínaꞋa asiramái máéro séna Áánútu kwétuwaꞋnaa-iye. Ísu Káráísitimo máyáintemba miráumai méꞋa keinárawapimba mimbórá-ímáyáá oró séna Áánútu kwétuwaꞋnaa-isaꞋa póꞋa mimbórá-ímáyáá kwéeꞋa mimbórá-áímbá kwéseꞋa Áánútu áwíꞋa Ísóigo Ísu Káráísiti avowa áwíꞋa mósá máráamba mindáyaveꞋa námúnaa kwésune.

Ísu Ísareri-kwaasiye óꞋonkaa-kwaasiye túwaꞋnaa uráin-kwasai.

Ísu Káráísitimo keinárawatavenamo aamoí kwéintemba keinárawapimba moórá-morawaiyaveꞋa aamoí kwéeꞋa mirámó kwéowana Áánútu áwíꞋa anómba kwéiye. naaóváꞋá Áánútu Yútaa-kwaasiya síkwáꞋnáyavenaya simái asirámarowana Áánútumo siráintembo íníntavena minásíráyán-áímbó paárinintavena Ísu Káráísiti kumbéna Yútaa-kwaasi túwaꞋnaa úwasa óꞋonkaa-kwaasi sésa Áánútu arumbá umásínkáísata kwenáwíꞋa mósá maráúmne sénááontavena Ísu Káráísiti kunkáiye. mináíntávéna Áánútun-aai aúváívimba agaimaréna séna

óꞋonkaa-kwaasivimba máyaunda enáwíꞋa mósá maréꞋa monor-ímó kwésunda enáwíꞋa mósá kwémaraumne
agaimaréna súwana
10 moórávaꞋa agaimaréna séna

óꞋonkaa-kwaasiyono. Áánútumo ítámakaiwaiye tirunkógwáráꞋá aamoí íno
agaimaréna súwana
11 moórávaꞋa agaimaréna séna

óꞋonkaa-kwaasiyono. Ísóigo áwíꞋa mósá máráaro. amáparawaise kwenáwíꞋa mósá máráaro
agaimaréna súwana
12 Áánútun-aai simátímakowai áwíꞋa Áísáya agaimaréna séna

Tévíti avowa áwíꞋa Yési kwenándárakemba moóráwai paárínana óꞋonkaa-kwaasiraꞋo kárákwiyinintavena Áánútu usásinankainasa kwembá amuꞋmarésa ménaaowe
agaimaréna Ísu Káráísitintavena siráiye.
13 kwesé ménaaomba amuꞋmaréꞋa máéro séna Áánútu kwétuwaꞋnaa-iye. kwesé aráápamai máyáantavena paru umátinkena tirumbá kaweꞋá umátínkáísana kwenamankó asiramátínkávaꞋa kwéiyisaꞋa kwesémó ménaaomba amuꞋmaréꞋa máyáamba mindáyaveꞋa námúnaa kwésune.

Áánútuna mayáí kwémayaundayavai aamoí kwéune siráin-kwasai.

14 kesí kwaásiyono. imáyáamo kwéunda-aimbo simátíménda ísáaro. kawe-kwáásí-úramba póꞋa kawer-ámbó kwégwaraan-aimba amápaꞋa iséꞋa kanaán-umai kwéagaraatinkaawe. keinárawataveꞋa mirán-ímáyáá kwéune. 15 maanáúváívímbá évakar-aimba asiramái simátimunda mináímbá imáyáa ónááontavena íma sááꞋa kwégaisaꞋa súne. óꞋonkaa-kwaasivimba Ísu Káráísitina mayáí mayánaundayavena Áánútu siꞋmákaimba póna íma sááꞋa kwégaisaꞋa asiramái maanáúváívímbá simátimune. ÁánútuntaveꞋa séꞋa maanóꞋónkáá-kwáásí ená kwaási owaná enamankó ená kwaási-iꞋa umátínkaraiye senaná Áánútu aamoí íníntaveꞋa kenáái áséi-kwasai kwésimatimune. 17 Ísu Káráísitiye tarúmai méꞋa Áánútuna mayáí kwémayaundayaveꞋa aamoí kwéune. 18 Ísu Káráísiti asirayán-ímáyáá símísaꞋa óꞋonkaa-kwaasi Áánútun-aaiyavesa áraire sénááontaveꞋa mayáí miwívímbá mairáunda mináímbá íma sááꞋa káínaꞋa póꞋa simátíménda ísáaro. aaí kwésimatimeꞋa mayáí kwémayaunda 19 Áánútun-amanko asirayámbá kwésimisaꞋa óꞋon-oꞋom-bayai ímo awánaraam-bayai maimaéꞋa kuráumne. Yérúsaremu-naopakemba óꞋon-oꞋon-daopaꞋa kwénaaeꞋa Káráísitin-aai áséi-kwasai simátímaꞋmaeꞋa iyéꞋa Írírikamu-maravaꞋa kuráumne. 20 kemá séꞋa naaóꞋ-naoꞋa Ísu Káráísitin-aaimo ímo ísaraan-daopaꞋa áséi-kwasai kosimátimenae. kosimátímakaan-kwaasivimba íma kosimátimenaumpo óꞋon-daopimpaꞋa kosimátímaꞋmaeꞋa naaónaumne séꞋa mináséí-kwásáí ímo ísaraan-kwaasivimba kosimátímakaumne. 21 naaóváꞋá Áánútun-aai aúváívimba mirán-áímbá agaimaréna séna

ímo simátíméwasamo ísaraawai naaémba Áánútuna aambá awánanaaowe. ímo ísaraawai naaémba
Áánútun-aai isánááowe
agaimaréna siráimba póꞋa Ísu Káráísitin-aaimo ímo ísaraan-kwaasivimba kosimátímakaumne.

Árómáa-naopaꞋa kónáe siráin-kwasai.

22 ímo ísaraan-kwaasi áséi-kwasai kwésimatimundaraꞋa kentópaꞋa kónáe séꞋa úmae iyúnda simátimunda-mayaigo sáwívakaꞋa kembá tátokaiye. 23 kentópaꞋa kónáe séꞋa úmae iyúnda sáwívar-ima maisuwéꞋa íma kanaán-umai kwégundayaveꞋa ívéꞋa maandáópímpáꞋá kesí mayáí ánásasuweꞋa 24 kentópaꞋa kónáe-imayaa kwéune. Sépéni-maravare séꞋa kwégweꞋa kentí naaópaꞋa kotuwánéꞋa komáyáanaꞋa súwaꞋnaa íyaꞋa Sépéni-maravaꞋa kónaumne. 25 aivaꞋá Yérúsaremu-naopaꞋa Áánútuna kwaási kotúwaꞋnaa ónaumne. 26 Áánútuna kwaási Másétóniyaa-maravakewaiye Ákáyaa-maravakewaiye sésa ayawaí taisasá Áánútuna kwaási Yérúsaremu-naopakewai toómbá íma makáawai túwaꞋnaa ónáe sésa miwítí óntamba torupámakaamba pósa simíyaꞋa maimaéꞋa YérúsaremuvaꞋa kwéꞋa mátimenaumne. 27 miwítí imáyáavinkembo mirámó kwéomba mindá kaweꞋán-iye. Yútaa-kwaasi óꞋonkaa-kwaasi Ísu Káráísitin-aai kosimátímakaamba pósa imáyáa ésa miwítí óntamba Yútaa-kwaasi toómbá íma makáawai kwétimemba mindá kaweꞋá kwéovo mirán-oro. 28 torupámakaan-ontamba maimaéꞋa kweémeꞋa amáparawai mátímatuweꞋa Sépéni-maravare séꞋa kwégweꞋa kentí naaóꞋa kóméꞋa minkákémbá Sépéni-maravaꞋa koónaumne. 29 kentí naaópaꞋa komáyáanana Ísu Káráísiti ávááraumai kaweꞋá umátinkaniye-imayaa kwéune.

30 kesí kwaásiyono. kentáásí Ísóigo Ísu KáráísitintaveꞋa imáyáa éꞋa Áánútun-amanko arumbá kwéumasinkaintaveꞋa imáyáa éꞋa asiramái simátimeꞋa séꞋa ÁánútumpaꞋa námúnaa kwésumpo keinárawakwaraꞋa súwaꞋnaa umai asiramái námúnaa seró kwésune. 31 Yérúsaremu-naopaꞋa kónaunda Yútiyaa-ayampaken-Yutaa-kwaasi Ísu Káráísitin-aaiyavesa íma áraire kwésewai sínkamovo séꞋa súwaꞋnaa umai námúnaa seró. miváꞋá Áánútuna kwaási máyáawai túwaꞋnaa on-óntántávésa aamoí ónááontaveꞋa námúnaa seró. 32 mimbáyáí ánásasuwaanana Áánútumo owémó sínaꞋo éꞋa aamoí éꞋa kentópaꞋa kweémeꞋa kotuwánéꞋa aúnáiꞋa umái ménaumne. 33 Áánútu paru kwéumasinkaiwaiya keinárawate máyáiye séꞋa námúnaa kwésunda árair-aimban-iye.

Copyright information for `KZE