Romans 5
Áánútu arupíya umásínkáin-kwasai.
1 Ísu Káráísitin-aaiyaveta áraire súndayavenaya Áánútu kwenaúrankaꞋa arupíya umásínkarenaya Ísóigo Ísu Káráísitina mayáímá imáyáa éna paru kwéumasinkaisata mimbóráíꞋa umái kwémaumne. 2 Ísu Káráísitin-aaiyaveta áraire súndayavenaya Áánútu úwoi kwésuwaꞋnaa-ipata mósinkaraisata méta Áánútuwe ságayan-ayampata ménaundayaveta amuꞋmaréta máyaunanaya sirunkóyá aamoí kwéiye. 3 umbai-yántááꞋó kesópata kwáyáimba sirunkóyá aamoí isatá minúmbáí-yántááꞋá kwáyáintaveta asiramái méta íma sívón-káínta 4 mindáyavena Áánútu séna kaweꞋá umái máyáawe sisatá mindáyaveta kwesé ménaundayaveta amuꞋmaréta máyaunana sirunkóyá aamoí kwéiye. 5 kwesé ménaundayaveta amuꞋmaréta máyaundaya kentááyávéna íma awinkánímba póna íma sigaeyá íníye. Áánútu kwenamankómbá aiꞋmarówana keséya kumbéna Áánútumo kentááyávénamo anón-imayaamo imbá kwéagaraasinkaimba póta kwesémo ménaundayaveta amuꞋmaréta máyaunanaya póna íma sigaeyá kwéiye.
6 kesáá íma asiramái máyaawananaya Áánútumo siráin-kanaamo tiráimba kesáámó sáwíꞋo umáíyaamo máyaundavinkembo kusúwaꞋnaa índayavenaya Ísu Káráísiti kumpukáiye. 7 arupí-kwaasigombo áwaꞋnaa ónaundayaveꞋa puwónáe senkákáí umbaí taisinó. kawe-kwáásígómbó áwaꞋnaa ónaundayaveꞋa kwená anondá puwónáe sésa púwósino. íya púwósino. íma isáúmne. 8 ánivo kesáámó sáwítaamo umáíyaamo máyaundaya súwaꞋnaa índayavenaya Ísu Káráísiti kumpukáiye. Ísu Káráísiti pukáimpinkemba Áánútu arumbó símímba mindá kwéagaraasinkaintaawe. 9 Ísu Káráísiti kentááyávéna imáyáa éna pukáintavena Áánútu aúrankaꞋa arupí umásínkarainta pónaya Káráísiti áraiꞋa kentáásí sáwí-meyamba maisíyukaintavenaya Áánútu íma áwááꞋa siyíníye. 10 kesáá Áánútumbo síyámba umánkaraundaya kwenááninko kentááyávéna imáyáa éna pukáimba póta Áánútuwe mimbórá-ímáyáávátá máyaundaya miráumai Ísu Káráísiti úwoi ména póna áraiꞋa kawer-ámpáꞋó kwégundayavenaya kwégarakwiyiye. 11 íma mináíné suꞋmainivo maarán-áínkwáráꞋán-iye. Ísóigo Ísu Káráísiti Áánútunte mimbóráíꞋa umásínkáísanaya póna Áánútuntavena kesirunkóyá aamoí kwéiye.
Áándamunte Ísuntei kwaasái.
12 maarán-áímbá ísáaro. aiva-kwáásígó Áánútun-aai arááíraimba póna sáwíꞋo kwéon-amba paáruraiye. sáwíꞋa uráimba póna púwón-amba paáruraiye. amáparawai sáwíꞋa kwéomba pósa púwón-ampaꞋa kwégowe. 13 Áánútumo Mósesimbo ámáámbo ímo simámakonkaꞋa kwaási sáwíꞋa uráamba isaná Áánútu misáwíꞋó uráan-aimba íma agaimakáiye. 14 aivaꞋá Áándamu máyowasa matinka-matinka úmaesa tunkaꞋá Mósesi usá máúnka-kwaasiyomba pukáawe. Áándamu Áánútun-aai arááírowasa kwempínkén-kwáásí évakarawai íma mirá umbá sáwíꞋa umbá pósa pukáawe.
Áándamu naaémbo paáriniwaimo ínínteniꞋa éna Káráísitimo évaka-tantaaꞋo ínínteniꞋa íma uráivo 15 sáwíꞋa uráimbanivo Áánútu úwoi kwésuwaꞋnaa-intaawe. Áándamu Áánútun-aai arááíraimba pósa amáparawai puꞋmaé kwéiyomba árair-aimban-ivo Áánútu amáparawai úwoi túwaꞋnaa íníntavena moóráwaimba Ísu Káráísitimba aiꞋmarówana kuména kaweꞋá umátínkávaꞋa kwéiyimba minánkó usáyaaitaraiye. 16 Áándamu aiva-kwáásígó sáwíꞋa uráinkakemba amáparawaiya sáwíꞋa úmae kwéiyunanaya Áánútu íma mirá éna kaweꞋá kwéumasinkaintaawe. aiva-táwai aiva-kwáásígó Áánútun-aai arááírowana Áánútu séna sáwíꞋa ónda po puwíníyone séna naaémba sáwíva-kwaasi sáwíꞋa uwaná séna úwoi túwaꞋnaa eꞋa kesúrankaꞋa arupí umátinkanaumne siráiye. 17 Áándamu aiva-kwáásígó sáwíꞋa uráinkakemba amáparawai puwí-ámpáꞋá kwégwaraawana minánkó tátokaivo moóráwai Ísu Káráísiti maarán-ánón-káwéꞋ-máyáí mairáiye. Áánútuntavesa súwaꞋnaa uwo sewáí úwoi kaweꞋá umái kwétuwaꞋnaa-ena kwenaúrankaꞋa arupí umái kwéumatinkaisana Káráísiti túwaꞋnaa isasá asiramái mésa sáwí-mayaigomba kwéusayaaitaawe.
18 ánivo mináínkóná ááimba maarán-áímbán-iye. aiva-kwáásígó sáwíꞋa urónkakemba Áánútu amáparawaiyavena séna sáwíꞋa kwéesa puwónááowe siráimba póna moóráwai Ísu Káráísiti kaweꞋá urónkakemba sáwíꞋo uráampinkemba iyátinkena aúnáiꞋo umáímo maíꞋmaiꞋo ónááoniꞋa kwéumatinkaiye. 19 aiva-kwáásígó Áánútun-aai arááíronkakemba amáparawai sáwíꞋa uráambanivo moóráwai Ísu Káráísiti Áánútu siráiniꞋa urónkakemba Áánútu kwenaúrankaꞋa sáwívarawai arupí kwéumatinkaiye.
20 sáwíꞋa umbá Áánútu kwená ámáámba Mósesimba simámakomba mindáyavena miwítí sáwí-mayaigo anómba uráiye. mirá umbánivo Áánútu arumbá umátínkámae iyúwana anómba uráiye. 21 ááéma sáwíꞋo urón-imayaago tátokowasa pósa puwí-ámbá kwakáawe. mirá uráambanivo ívéꞋa Áánútumo arumbó kwéumasinkaiwaiya tátoraisata kwenaúrankaꞋa arupí umáíya máyaundaya kentáásí Ísóigo Ísu Káráísiti aúnáitaamo umáíya maíꞋmaiꞋo ónaunda-ita kwéumasinkaiye.
Copyright information for
`KZE
