Romans 6

Ísuwe tarúmaiya máyaunda-kwasai.

simátíménda ísáaro. maarán-áímbá íma seró. Áánútu úwoi súwaꞋnaa úmae iyínana anómba íníntaveta sáwíꞋa úmae kwéiyeta ménae íma seró. púwón-kwaasimo miwítí sáwí-mayaigomo ímo ókwaraꞋo tátotuwenamo kwáíntemba kentáávímbá sáwí-mayaigo íma tátotuwena kwáyáísata póta íma sáwíta úmaeta kwéiyeta ménaumne. maarán-áímbá ísaraawe. nombó pésinkaanta Ísu Káráísiti kweséya tarúsinkaisata kweséya pukáaraꞋnaraamba umáíya máyaunanaya kentáásí sáwí-imayaago íma tátoꞋmae kwéiyisata máyaumne. nombó pésinkaanta kesáá Ísu Káráísitiye puwúnasaya utaráaraꞋnaraanta kwéunanaya kentáásí sáwí-imayaago íma tátoꞋmae kwéiyiye. Áánútu kentáásivowa óꞋoran-asirayandei pukáimpinkemba usásinankaraintemba kentáá usásisinkaraaraꞋnaraamba uráisata aúnáiꞋa umáíya máyaumne.

Ísu Káráísitima pukáimba kwemó kwaásiti sáwí-mayaigomba usáyaaitaraintemba kweséya tarúmai máyaundayavenaya sáwí-mayaigo kentáá íma tátokaiye. miráumai Ísu Káráísitimo pukáimpinkembo usásinankaraintemba kweséya tarúmai máyaundayaveta aúnáiꞋa umáíya máyaumne. maarán-áímbá ísaraawe. púwówanamo imbá sáwí-imayaago íma tátotuwena kwáyáísana kentáásí sáwí-imayaagona asirayámbá ánásainana kesáámó sáwíꞋo úmae kwéiyundawaiya íma tátoꞋmae iyíníntavena Ísu Káráísiti taairaꞋá pukáisana kentáásí sáwí-imayaago kentáá íma tátokaiye. Ísu Káráísitiye pukáaraꞋnaraanta umáíya máyaundaya póta mináímbá árair-aimba isatá kweséya máyaumne. maarán-áíntá ísaraumne. Ísu Káráísiti pukáimpinkemba usásinkaisana puwí-ásíráyánkó íma tátoraisana ókwaraꞋa íma kwévuwiye. 10 sáwíꞋo kwéombo ánásanintavena mimbórá-táwai pukáimba póna mindáyavena íma ókwaraꞋa puwéna usásinena ména Áánútuntavena imáyáa kwéena máyáiye. 11 miráumai imáyáa éꞋa séꞋa pukáaraꞋnaraanta umáíya máyaunanaya sáwíꞋo kwéundawaiya íma tátotuwena kwáyáísata méta Ísu Káráísitiye tarúmaiya máyaundaya Áánútu aamoí ínkwáe-iꞋa umáíya máyaumne.

12 kentí sáwí-imayaayaveꞋa tirááíyaveꞋa ováínivo sáwíꞋo kwéowai keinárawaꞋa íma tátoraino. 13 kentúwawaaꞋneiye kentiyáánamaineiye íma owé simái sáwíꞋa kwéeꞋa pukáaraꞋnaraan-umai máyáawanamo usásintinkaisaꞋo máyáawai ÁánútumpaꞋa kentúwawaaꞋa améꞋa kwentávéꞋa owé simái kentúwawaaꞋneiye kentiyáánamaineiye kwená kaweꞋ-máyáíyé suꞋmai máyáaro. 14 Áánútu Mósesimbo simámakain-amaanko íma kárákwiyisana Áánútu úwoi túwaꞋnaa iwáí kárákwiyisana póna kentí sáwí-imayaago kentúraꞋa íma tátoraino.

Áánútu kwená mayáí-kwáásí-íꞋa umátínkáin-kwasai.

15 mináímbá imáyáa éꞋa simátíménda ísáaro. Áánútu Mósesimbo simámakain-amaanko kentááráꞋá íma kárákwiyisana Áánútu úwoi súwaꞋnaa iwáí kárákwiyisata mindáyaveta íma úwoi sáwíꞋa úmaeta íyóno. 16 kwená mayáí mayánaumnemo sembá kwemá kárákwiyisasa kwená mayáí-kwáásí máyáawe-aimba ísaraawe. miráumai sáwíꞋo íyanamo éna misáwí-ímáyáágó tátokainaꞋa misáwí-máyáí maimaé kwéiyeꞋa máyáawaina ááimba Áánútuna némpaꞋa maíꞋmaiꞋa ónááovo Áánútun-aaimo isáíyanamo éna kwemá kárákwirainaꞋa kwená mayáí maimaé kwéiyiyana kwenaúrankaꞋa arupí umátinkaniye. 17 ááémo sáwíꞋo uráam-bayaigo tátokowasa naaémba árair-aimba simátímaꞋmae íyówaꞋa iséꞋa kentirumpimbá asiramái tátokaawaꞋa mindáyaveꞋa ÁánútumpaꞋa súwi kwésune. 18 sáwíꞋo kwéum-bayaigo tátokompinkemba Áánútu iyátinkowaꞋa arupí-mayai kwémayaawana minárúpí-máyáígó tátokaiye. 19 íma asiramái máyáantaveꞋa kesáái isánááon-aimba simátimune. ááéma sáwíꞋa ónáe séꞋa óꞋon-oꞋon-tantaakwaraꞋa sáwíꞋa uwaná tátokombanivo ívéꞋa kaweꞋá ónáe séꞋa kaweꞋ-máyáíyé suꞋmai kwémaeꞋa Áánútundei-iꞋa oró.

20 ááémo sáwíꞋo um-báyáígó tátokonkaꞋa kaweꞋó ií-ímáyáá íma kwéeꞋa 21 sáwíꞋo uráamba ívéꞋa tigaemá kwéiye. sáwíꞋo untavéna íma kawe-tántááꞋá kentópaꞋa tiráiye. mirá-sáwíꞋó úmae íyómpinkemba máyáawaina ááimba Áánútuna némpaꞋa maíꞋmaiꞋa kwéowe. 22 Áánútu sáwíꞋo kwéumpinkemba iyátinkena kwená mayáí-kwáásí-íꞋa umátínkaraimba póꞋa Áánúntundei-iꞋa umái méꞋa aúnáiꞋa umái maíꞋmaiꞋa ónááowe. 23 sáwíꞋo kwéom-bayaigona anondá puwónááombanivo Áánútu kentáásí Ísóigo Ísu Káráísitina mayáí imáyáa éna aúnáitaamo umáíya maíꞋmaiꞋo ónaunda-ita kwéumasinkaiye.

Copyright information for `KZE