Titus 2

áséi-kwasai arupí umái simátímaꞋmae iyuwó siráin-kwasai.

Táításiyo áséi-kwasaigona ááimba árair-aimbo simámakaunda simátímaꞋmae iyuwó. anónuꞋmaiyomba simátime se íma uwoꞋaóꞋ-nómbá námae naaéꞋa uwoꞋaóꞋá kwéeꞋa arupí umái méꞋa kentúraꞋa kárákwimai kawer-éꞋa ÁánútumpaꞋa agevamái asiramái méꞋa imáyáa timéꞋa asiramái maíyana íma tívón-káíno simátimiyo. áráankantomba simátime se ÁánútuntaveꞋa imáyáa kwéeꞋa méꞋa íma kwantánaanta-aimba kwéseꞋa íma uwoꞋaóꞋ-nómbá námae naaéꞋa uwoꞋaóꞋá kwéeꞋa ívér-inintaveꞋa kawer-ámbá agaráátínkáaro simátimiyo. mirámó íyasamo ésa ívér-inimba minkáwér-ámpáꞋá kwégwesa tuwaiꞋmááre iyámpóíye tirumbá timésa túraꞋa kárákwimai kawer-ésa kaweré suꞋmai kwéesa tuwaiꞋmáákare iyámpóírare naankaré kaweꞋá umái kárákwiyesa tuwaiꞋmáá táái isánááowe. mirámó íyasamo ésa tuwánésa sésa Áánútun-aai kawer-áímbán-iye sénááowe.

ívé-kwaasiyomba asiramái simátime se kentúraꞋa kárákwimai kaweꞋá oro siyó. amápa-tantaaꞋa kaweꞋá inasá awánésa emó óndantemba miwí mirá íya simátímaꞋmaemo íyínda íma óikakene suꞋmai simátime arunkakénkwáráꞋá simátimiyo. kawer-áíné suꞋmai simátímínasa kampar-áímbán-iye sésamo kampar-áímbó avakáá íyanamo éna íma kwáyainasa tigaeyávésa ésa íma simái sáwíꞋa umásinkanaaowe.

kárákwiraan-kwaasi évakarawai meéyámbakaawasa miwítí mayáí úwoi kwémaesa óntamba íma kwémayaawaiyavai maanáímbá simátimiyo. kárákwiraan-kwaasi táái iséꞋa aamoí umásinkaigwae séꞋa kaweꞋ-máyáí kwémaeꞋa miwíyávéꞋa íma anondá seró. 10 miwítí náaindaampinkemba íma umóyámbá éꞋa kaweré suꞋmaimo íyamba tuwánanaaowe se mirán-áímbá simátimiyo. mirámó íyanamo éna Áánútun-aai kentáásí sáwí-imayaavinkemba kwéiyasinkain-aaigo anómba íníye.

11 Áánútu úwoi súwaꞋnaa ena Ísu Káráísitimba aiꞋmarówana óꞋon-oꞋon-kwaasi miwítí sáwí-imayaavinkemba iyátinkanintavena marapáꞋá kunkáimba póna 12 Áánútu úwoi súwaꞋnaa ena kawer-ámpáꞋá kónaunda-anta agaráásínkaraiye. minánkómá maarán-ámbán-iye. Áánútuntavesa íma imáyáa kwéowai sáwíꞋo kwéomba sínaaemba umátimeta marapá-tántáátávéta sirááíyaveta úndaya sínaaemba umámeta marapátáámó máyaundaraꞋa kesúrata kárákwiyeta arupí umái méta Áánútuntaveta imáyáa éta méta 13 amuꞋmaréta Áánútu asirayánkwáráwáíyé Ísu Káráísiti kentáásí sáwí-imayaavinkemba kwéiyasinkaiwaiye ságayankogwaraꞋa paároyaaoiyantaveta timuꞋmaréta méta paároyaaoiyan-kanaa sirunkóyá kawetá íníye. 14 Ísu kentáásí sáwí-imayaaomo tátokaimpinkemba iyásinkenaya kawe-kwáásí-íꞋa umásinkenaya kwená kwaási-iꞋa kwéumasinkaiwaiya méta kaweꞋ-máyáí mayánáe séta máyaundayavenaya mindáyavenawe séna Ísu Káráísiti pukáiye.

15 Táításiyo mináímbá simátime Áánútuna asirayándéí miwítí imáyáa kaweꞋá umátínkénana aaí íma kwéisaiyawai mináínkó tirumbá kwantáínasa aaí ísáaro. sénda-aimba íma ísáavainivo asiramái simátimiyo.

Copyright information for `KZE