Titus 3

Áánútuntavai imáyáa éꞋa arupí umái máéro simátimiyo siráin-kwasai.

Táításiyo Ísóigona kwaásiraꞋa kárákwiraandawai ómpo maarán-áímbá simátimiyo. marapáꞋ-máyáíráꞋó kárákwiraan-anon-kwaasi tísamaivimba méꞋa miwí táái iséꞋa kaweꞋ-máyáíyávéꞋa toꞋmayaa umái amuꞋmaréꞋa méꞋa íma kampaꞋá simái sáwíꞋa umátinkeꞋa íma aaisan-áímbá séꞋa paru umái méꞋa amáparawai kawer-áíné suꞋmai kwéseꞋa máéro. ááéma sáwí-imayaagwara-kwaasiya méta aaí íma iséta sáwí-ampaꞋa kwégweta sáwí-yantaataveta sirááíyaveta kwéeta máyaawanana misáwí-yántáákó tátorowata sáwí-imayaayaveta sirááíyaveta kwéeta sáwíꞋa umái méta óꞋowiti náaindaantaveta súran-anda kwéeta síyánta kwéumatinkaawanasa kentáá tíyámba kwéumasinkowata méraumne. ánivo Áánútu kentáásí sáwí-imayaavinkemba kwéiyasinkaiwaiya séna sirumbá umátinkaunda póꞋa túwaꞋnaa ónaunda agaráátinkanaumne sirónkaꞋa Ísu Káráísitimba aiꞋmarówana marapáꞋá kumúwana Áánútu kawer-ámpátá mésínkaraiye. kesáámó kaweꞋó ówándayavenaya ímanivo arumbá umásinkenaya kawer-ámpátá mésínkaraiye. nombá pésinkowata aúnáiꞋa umái máyaawananaya Áánútun-amanko aúnáita umásinkontavena kawer-ámpátá mésínkaraiye. Ísu Káráísiti sáwí-imayaavinkemba kwéiyasinkaiwaiyavena Áánútu imáyáa éna kwenamankó kentáávímbá úwoi anómba kwéumasinkainta póna úwoi súwaꞋnaa umásinkenaya séna arupí-kwaasiman-owe. áraiꞋa aúnáiꞋa umái máiꞋmaiꞋa ónááoniꞋa umátinkanaumne kwésisata amuꞋmaréta máyaumne. mináímbá árair-aimban-iye. miráumai kárákwiraan-kwaasi táái isésa kaweꞋ-máyáí maésa máéro.

Táításiyo mináímbá asiramái simátiminiyonda sirááíma kwétaiye. mirámó inasamó ésa Áánútun-aaiyavesa áraire sewáí asirayán-ímáyáá ésa kaweꞋ-máyáí mayánááowe. mináímbá kawer-áínkó póna kwaási túwaꞋnaa íníye.
ánivo úwoi-aintavesa sáwívar-aimba kwésesa tíkwáꞋnáwe tináávúwísáiye túwíkwaraꞋa kwétesa aaisan-áímbó kwésesa Mósesimo sirón-amaantavesa aaisan-áímbá kwésemba mirán-áímbá úwoi-ainkoma póna íma túwaꞋnaa ínívo ánaaemba umátimiyo. 10 évakarawaimo sáwí-aimbo simáímo taaínkaar-umátínkáawaimba kaumbo-káé-tawai asiramái simátímínasamo ímo isáíyamo e ánaaemba umátimiyo. 11 mirán-kwáásí kaéꞋmai máyáawai ésa sáwíꞋo ombá keyááríkaꞋa kwétuwanaawata kesáágwáráꞋá kwétuwanaumne.

12 moóráwai áwíꞋa ÁtémásaanaꞋi. moóráwai TikikásaanaꞋiyo. moóráwaimba aiꞋmáráanana enópaꞋa kwíndaraꞋa imáyáa é Níkópórisi-naopaꞋa kesópaꞋa tiyó. áúꞋo sií-kánáá Níkópórisi-naopaꞋa máyaana kesópaꞋa tiyó. 13 moóráwai áwíꞋa Sínása aaimó isáí-kwáásígóe moóráwai Ápórosiye emá túwaꞋnaa inasaráí Áánútuna mayáí maimaésarai naaóyááoiye. 14 Áánútuna kwaási súnda-aimba simátímínasa kawer-ímáyáá ésa mayáí kwémaesa umbai-yántááꞋó kwáyainda-kwaasi túwaꞋnaa esa pósa íma úwoi-mayai maésa ménaaowe.

amápaꞋo kesémo máyáawai entávésa sésa kaweꞋá umái maiyó kwésewe. kentáásí kwaási Áánútuwe aráápamai máyáawaima esé máyáawai kaweꞋá umái máéro simátimiyo.

Áánútu amáparawai úwoi kwétuwaꞋnaa-intaveꞋa námúnaa kwésune.

kemá Póro súnda-aimba ánásaiye.

15 

Copyright information for `KZE