aStat 1:27
bStat 2:24
cKisim Bek 20:12-16

Mark 10

Gong tik i kutus a tinaulai

(Mt 19:1-12; Lk 16:18)

E Iesu i han misaot utumo ana papar Judia, pa i kotop a malum Jodan. A kunum a tarai la han teteki, pa i asaer ulak la lar otning i sira toli. Dingla na Parisaiola la han teteki sur lar toho i. La dekeni mange, “I tostos ot arlar taum ana nundala na Warkuraila, sur a barsan ir kepsen sen anuna hane, o bel?” Pa e Iesu i deken la mange, “Esi na warkurai ning e Moses i saran tari ta mulo?” Pa la kelesi mange, “E Moses i malmaling tari ka sur a barsan ir tumus tar a paka buk na kutus tinaulai, sur dir kutus sen a keskes na tinaulai ono.” E Iesu i atai la mange, “E Moses i tumus a warkurai ning sur mulo, anasa a balamulo i rakrakai kol. Ika ana turpas a akakes, e God ‘i akes a taraila, sur la a barsan pa hane.’ a 

‘Ine a kamkamna ning a barsan ir han kusun e tamana pa e tana, pa ir kes taum ana nuna hane, sur diau takai kama.’ b 

Pa bel diau arenaur ma, diau takai kama.
Asa ning e God ka dot taum tari, gong ulak ma tik i kutusi.”

10 Lamur, ning la kes ting narumai, a kakak a asasaer la deken ulak e Iesu ana utna ne. 11 Pa i atai la mang, “Ning tik ir kepsen anuna hane, pa i taulai ulak ta hane masik, a barsan ning i tol a toltol laulau tetek anuna ningnigo na hane. 12 Pa ning ta hane i han kusun anuna barsan, pa i taulai ulak ana tik masik, a hane otleng ning i tol a laulauna.”

E Iesu i angisngis a kakakla

(Mt 19:13-15; Lk 18:15-17)

13 A tarai la ben a kakakla tetek e Iesu sur ir sua naur a kuna saot on la. Ika a kakak a asasaer la sairas la. 14 Ning e Iesu i oroi, i balakut pa i atai la mange, “Mulor noren a kakakla sur lar han tetek iau. Gong mulo sairas la, anasa a matanitu ane God anunla ning la manglarne. 15 A atong momoli ta mulo, ning tik bel ir kubas a matanitu ane God arlar ana kaklik, bel ir kas lar pasi. Belal.” 16 Pa i los pas a kakakla, pa i sua kuna saot on la, pa i angisngis la.

A tena gongon

(Mt 19:16-30; Lk 18:18-30)

17 Ning e Iesu i han amon ulak, ning a barsan i dun teteki, i kes ana bokona hana namatana, pa i dekeni mange, “Wakak a Tena Asaer, asa ning ar toli sur ar kubas a lalaun tikin?” 18 E Iesu i kelesi mang, “Sur asa ning u atong iau mang iau a wakak? Bel tik i wakak, e God ka. 19 U tasman a Warkuraila: ‘Gong u umkol tik, gong u tol a toltol laulau ana ta hane anuna tik masik, gong u kinkinau, gong u artitiu asasongo, gong u asongo pas ta utna nuna tik pa u los pasi, ur hanrawai e tamam pa et nam.’” c 

20 A barsan ning i kelesi mange, “Tena Asaer, turpasi ning a kaklik ot tuk ne, a sira mur a Warkuraila rop ne.” 21 E Iesu i tai teteki, i marisi pa i atai mang, “U kapan ot sur ning a utna. Ur han pa ur siuran sen anum a ututnala rop, pa a mani taguni ur tabar a kapan na taraila ono. Ning ur toli manglarning, anum a wakak a gongon saot na langit. Lamur ur lamut ute pa ur mur iau.” 22 Ning i longor a warwara ne, i tai tumtumen, pa i han pa i nuk lingir koli, anasa i galis kol anuna gongon.

23 E Iesu i gilam taltal tetek anuna kakak a asasaerla pa i atai la mang, “I ngangitin kol tetek a tena gongonla sur lar kas uting na matanitu ane God.” 24 A kakak a asasaer la kulkulan kol ana warwara ne. E Iesu i atai ulak la mang, “A natnatukla, i ngangitin kol tetek a taraila sur lar kas ana matanitu ane God.

25 “I ngangitin tetek a kamel sur ir kas ana mosol a sur a susuk, ika i ngangitin kol tetek a tena gongon sur ir kas ana matanitu ane God.” 26 A kakak a asasaer la kulkulan kol, pa la deken artalai aulak la mang, “Ning i manglarning, esi ma ning dir alauni?” 27 E Iesu i tai tetek la pa i atongi mang, “A taraila bel lar tolsot pasi, ika e God ir tolsot ana ututnala rop.”

28 E Pita i atai e Iesu mange, “Oroi, mila ka han kusun anumila na ututnala rop, pa mila mur u.” 29 E Iesu i atongi mang, “A atong momoli ta mulo: Ning tik ir han kusun anuna rumai, o kusun a tastasna barsan pa gurarala, o kusun e tana, o e tamana, o na natnatnala, o kusun anuna kabalapiu, kamkamna hok pa ana Wakak a Warwara, 30 ana lalaun ne, dir saran tar takai a mar a rumai tana, takai a mar a tastasna barsanla, takai a mar na tastasna hanela, takai a mar na tana, takai a mar na natnatna, pa takai a mar a kabalapiu, pa dir alaulau i otleng. Pa ana lalaun lamur dir tabari ana lalaun tikin. 31 Ika a galis a taraila ning la nigo ne, lamur lar mur, pa la ning la mur ne, lamur lar nigo.”

A munatol a warwara ane Iesu ana nuna minat

(Mt 20:17-19; Lk 18:31-34)

32 Ning e Iesu taum ana nuna kakak a asasaer la han usaot e Jerusalem, e Iesu i nigon la, pa anuna kakak a asasaer la nuknuk kol, pa a taraila otleng ning la muri la matmataut. Pa e Iesu i ben maskan pas anuna ning a bonot pa pisir naur a kakak a asasaerla, pa i atai la ana ututnala ning ir hanot teteki manglarne, 33 “Oroi, ne dala han usaot e Jerusalem. Dir saran tar a Nat a Barsan tetek a leklek na tena artabarla tetek e God taum ana tena asaerla tagun a Warkurai. Lar warkurai i sur ir hirua, pa lar saran tari tetek la ning bel a tarai Juda. 34 Lar morot onoi, lar namsani, lar dapisi pa lar umkoli. Pa ning natola pukakiar ir rop ir laun ulak.”

A nunung ane Jems pa e Jon

(Mt 20:20-28)

35 Naura nat e Sebedi, e Jems pa e Jon, dia han tetek e Iesu pa dia atongi tana mange, “Tena Asaer, mia nunung u sur ur tol asa ne mia mang suri tam.” 36 Pa i deken diau mange, “Asa ning mu mang suri tak?” 37 Dia kelesi mange, “Ur akes tar miau ana num a matatar, pa datol ar warkurai taum, ning a halim miau ana ris a sot a kum pa ning ana kair.”

38 E Iesu i atai diau mange, “Bel mu tasman asa ning mu nunung suri. Mangmangasa, ir toh pas mu sur mu otleng mur hisop ana kap ning ar hisop ono? Ir toh pas mu otleng sur dir baptais mu ana baptais ning dir baptais iau ono
10.38A kap ning e Iesu ir hisop ono i warwara larlar ana mamahatla ning ir kilangi. Pa anuna baptais i warwara larlar ana nuna minat.
?”

39 Pa dia kelesi mange, “Miar tolsot pasi ka.” E Iesu i atai diau mange, “A kap ning ar hisop ono, mu otleng mur hisop ono, pa a baptais ning dir baptais iau ono, dir baptais mu otleng ono. 40 Ika ana keskes ana ris a sot a kuk pa ana kair, bel a warkurai sur ar sarani. E God ir sarani tetek la ning ka sang tari sur la.”

41 Ning a bonot a kakak a asasaer la longori, la balakut e Jems pa e Jon. 42 E Iesu i kabah taum pas la, pa i atongi mange, “Mulo tasmani mang la ning di atong la a tena warkuraila anuna taraila ning bel a tarai Juda, la nigon laulau a taraila. Pa anunla na ningnigo otleng la saran a ngangitin a warkuraila tetek a taraila anunlai. 43 Ika tetek mulo bel ir manglarning. Ning tik i mang sur ir leklek ta mulo, ir anatarna pasi sur ir tena titol anumuloi. 44 Pa esining i mang sur ir ningnigo o mulo, ir tena longor ka anuna taraila rop. 45 Anasa a Nat a Barsan otleng bel i hanot sur dir titol teteki. I hanot sur i ot ir titol tetek a taraila pa ir saran tar anuna lalaun, a arlou, sur ir lou alangolango pas a galis a tarai.”

E Iesu i apalpalas pas a matana e Batimaio a kut

(Mt 20:29-34; Lk 18:35-43)

46 La hanot tumo e Jeriko. Ning e Iesu taum ana nuna kakak a asasaerla pa a kunum a tarai otleng la han mitingia, ning a barsan, a matanakut, a risana e Batimaio (a kamkamna mang a nat e Timaio), i kes ana ris a ngas, pa i sira nunung utna. 47 I longori mang e Iesu a te Nasaret ka han milau, i arkabah rakrakai mange, “Iesu, Nat e Dewit, ur maris iau.”

48 Pa a galis a tarai la sairasi mang gong i aregaia. Ika i arkabah rakrakai kale mange, “Nat e Dewit, ur maris iau.”

49 E Iesu i tur pa i atai la mang, “Mulo kabah pasi.” La kabah pas a matanakut, pa la atai i mange, “Ur gas! Tur! E Iesu i kabah u.” 50 E Batimaio i kepsen anuna kaen ning i polpol alar anuna minmar ono, i kamtur, pa i han tetek e Iesu. 51 Pa e Iesu i dekeni mange, “Asa ning u mang sur ar toli hom?” A matanakut i kelesi mang, “Tena Asaer, a mang sur ar tai.” 52 E Iesu i atongi tana mang, “Ur han, anum a tortorot ka alangolango pas u.” Aiapiap ka i tai, pa i mur e Iesu ana ngas.

Copyright information for `LBB