aAis 13:10; 34:4

Mark 13

A akinalangla ana ararop ana pukakiarla

(Mt 24:1-14; Lk 21:5-19)

Ning e Iesu i purum kusun a rumai a artabar, ning tagun a nuna kakak a asasaerla i atai i mange, “Oroi, Tena Asaer! A wakak a rumaila ne, di toli ana tatatnan hatat!” Pa e Iesu i atai i mange, “U oroi a tatatnan rumaila ne? Kaning lamur bel ir naur a hat diar pala taun, dir regen siksiklik sen la.”

Ning e Iesu i kes tisaot ana Mangir na Oliw ning dir tai solsol sur a rumai a artabar, e Pita, Jems, Jon pa e Endru la deken kumnani mange, “Ur atai mila, nangse a ututnala ne ir hanot? Pa asa akinalang ana ututnala ning i milau sur lar hanot?” E Iesu i atai la mange, “Mulor tai alar mulo, sakana tik ir asongo pas mulo. A galis lar hanot ana risak, lar atongi mange, ‘Iau a Karisito,’ pa lar asongo pas al galis. Ning mulor longor a harumla pa a arkaltai ana harumla, gong mulo mangasa tar, anasa a ututnala ne lar hanot nigo, ika a ararop ana rakrakan hanua belot. Ning a mangis a tarai ir tur na harum sur ning a mangis, pa ning a matanitu ir tur na harum sur ning a matanitu. Pa a mamaisla pa a tnan munurak ir hanot ting na hanhanuala. A ututnala ne i arlar ana turpas a kilkilang na kankan ana hane sur ir agon.

“Mulor tai alar mulo. A tarai lar dat pas mulo tetek a tena warkuraila, pa lar dapis mulo ting na rumai lotula. Mulor tur ana warkurai lanigo tana tatatnan ningnigola pa a kingla, kamkamna hok. Pa mulor warwara talapor hok tan la. 10 Dir warawai nigo ana Wakak a Warwara tetek a mangis a taraila rop. 11 Ning lar dat pas mulo sur a warkurai, gong mulo nuknuk nigo sur asa ning mulor atongi. Ana tuka mahis a kamis ning mulor atong ka a warwara ning di anuknuk tari ta mulo, anasa bel mulo ning mulor warwara, a Talngan Tabu ot.

12 “Tik ir malmaling sen ta tasnalik sur dir umkoli, pa ta barsan ir malmaling sen ta natnalik sur dir umkoli. Pa a kakakla lar tur na rakrakai tetek na tamtamanla pa na kabatnanla, pa lar malmaling sen diau sur dir umkol diau. 13 Pa a tarai rop lar nget mulo anasa ana risak, ika tik ning i tur rakrakai tuk ana araropna, e God ir alaun pasi.

A wetewete ana laulau a utna ning ir hanot

(Mt 24:15-28; Lk 21:20-24)

14 “Mulor oroi ning a laulau a utna kol ir hanot, ir kes ana pukna ning bel i toh pasi sur ir kes ano, pa ir alaulau a pukna ning. (Esining ir was a warwara ne, i wakak sur ir talapor ono.) Ono ot ning, la ning la kes ana papar Judia, lar liu usaot ana mangirla. 15 Pa ning tik ir kes saot ana nuna rumai, ning ir purum, gong i kas sur ir los pas ta utna saui. 16 Pa ning tik ir kes ting na barim, gong ma i han ulak utumo lahanua sur anuna ta kaen. 17 Ana pukakiarla ning, ir laulau kol tetek a tiananla, pa la otleng ning la aresus. 18 Mulor nunung sur gong a utna ne ir hanot ana kalang na kotkoto. 19 Anasa ana pukakiarla ning, ir itna kol a mamahatla. Ir itna kol ana mamahatla ning i sira hanot ana rakrakan hanua, turpasi ning e God i akes a rakrakan hanua tuk ne, pa lamur otleng bel ta mamahat ir arlar ono. 20 Nadek ning a Leklek bel ir kutus purum a pukakiarla ning, bel tik kakat ir laun. Ika ka kutus purum seni sur la ning ka aslang pas la, lar laun.

21 “Ana pukakiarla ning, ning tik ir atongi ta mulo mange, ‘Oroi, a Karisito ine!’ pa ir atongi mange, ‘Oroi, numo ia!’ gong mulo tortorot onoi. 22 Anasa al tena asasongo na Karisito, pa tena asasongo na propetla lar hanot, lar tol al akinalang pa al utnala na kulkulan sur lar asongo a taraila ning e God i aslang pas la, ngadek lar tolsot on la. 23 Mulor wetewete! Ne ia ka atai nigon tar mulo ana ututnala rop ning ir hanot!

A Nat a Barsan ir hanot

(Mt 24:29-31; Lk 21:25-28)

24 “A mamahatla ning ir rarop, pa ana pukakiarla ning,

‘a kamis ir mormorom,
a kalang bel ir sasai,
25 a nangnangla lar punga purum misaot na langit,
pa a ututnala tisaot na langit lar gulgule.’ a 
26 “Ana tuka mahis a kamis ning, a tarai lar oroi a Nat a Barsan ir hanot ana laukap taum ana tnan rakrakaina pa a matatar. 27 Pa ir sune anuna na angelola sur lar ben taum a taraila ning i aslang pas la miting na diat a matana wuwu, miting na ris a rakrakan hanua tuk utumo otleng ana ning a ris a rakrakan hanua.

A warwara larlar ana rakai a fig

(Mt 24:32-35; Lk 21:29-33)

28 “Mulor asasaer ana rakai a fig. Ning a rakrakanala ir gomo pa a pakpakana ir tapalas, mulor tasmani mang a kalang na laplapang ka milau. 29 Mang otleng larning, ning mulor oroi a ututnala ning ia ka warwara tar ono ir hanot, mulor tasmani mang a pukakiar ka milau. 30 A atong momoli ta mulo, a taun taraila ne kanet la laun pa a ututnala rop ne ir hanot. 31 A langit pa a rakrakan hanua diar rarop, ika anuk a warwarala bel ir rarop.

Bel tik i tasman a pukakiar pa a tuka mahis a kamis

(Mt 24:36-44)

32 “Bel tik ir tasman a pukakiar pa a tuka mahis a kamis a ututnala ning ir hanot. A angelola saot na langit bel la tasmani, pa e Natnalik otleng bel i tasmani, e Tamana ka i tasmani. 33 Mulor wetewete, pa mulor tai alar mulo, anasa bel mulo tasmani nangse a ututnala ne ir hanot.

34 “I arlar ana ning a barsan i sang sur ir han ana ning a tinan. I saran tar anuna rumai tetek anuna tarai a longor, sur lar tai alari. I saran taktakai a titol tan la rop, pa i atai a barsan ning na taman sur ir tai alar, pa i han.

35 “Ika mulor wetewete, anasa bel mulo tasmani nangse a tamana rumai ir hanot, ana rah, o ana tnan morom, o ana lar ning a kok i kurkurirakuk, o ana kobot. 36 Sakana ir hanot kulkulan, pa ir pastetek mulo kaning mulo borbor duman. 37 Asa ning a atai mulo ono, ar atai a taraila otleng mang: Mulor tai alar mulo!”

Copyright information for `LBB