Mark 16

A kamkamtur ane Iesu kusun a minat

(Mt 28:1-8; Lk 24:1-1; Jn 20:1-10)

Ning a Pukakiar Sabat ka rop, e Maria Magdalen, pa e Maria tana e Jems, pa e Salome ditol lou pas a ututnala ning i tomtobo sur ditol ar atomtobo a minat e Iesu ono. Ana kobot ning ot ana ningnigo na pukakiar ana wik, ditol han sur a kulam a minat. Ning ditol han amon ditol deken artalai ditol, “Esi ma ir nangan datol sur ir lingir sen a hat numo kusun a taman ana kulam a minat?” Ning ditol tai tostos utumo, ditol oroi mang di ka lingir sen a tnan hat ning. Ning ditol kas uting na kulam a minat, ditol oroi ning a barman, i kes tar ana sot a kunditol, i mermer taum ana kokok a kaen. Pa ditol matmataut.

I atai ditol mange, “Gong mutol matmataut. A tasmani mang mutol tai sur e Iesu a te Nasaret, esining di sai ahat tari ana rakai kutus. Belbel i ma te, ka laun ulak. Mutol oroi a pukna ne di aborbor tari ano. Mutol han, mutol ar atai anuna na kakak a asasaerla pa e Pita otleng mange, ‘E Iesu ir nigo utumo e Galili. Mulor oroi tumo, lar ot ning ka atai nigon tar mulo.’”

Pa ditol purum pa la dun kusun a kulam a minat taum ana nuknuk kol pa ditol koloron. Bel ditol atai tik ana ta warwara anasa ditol matmataut kol.
16.8Dingla na tena mananos ana Buk Tabu la nuki mang e Mak i manah ka te. La nuki mang tik masik i tumus tar a rina 9-20.


E Iesu i hanot tetek e Maria Magdalen

(Mt 28:9-10; Jn 20:11-18)

[
Ning e Iesu ka laun ot ulak ana kobot ning ot ana ningnigo na pukakiar ana wik, i hanot tetek e Maria Magdalen, esining i kepsen dionomahis a mot kusuni. 10 E Maria Magdalen i han pa i atai la ning la sira mur e Iesu, ning la balmamahat pa la tangis suri. 11 Ning la longori mang e Iesu ka laun ulak pa e Maria ka oroi tari, bel la tortorot ono.

E Iesu i hanot tetek naur a kaklik asasaer

(Lk 24:13-35)

12 Lamur e Iesu i hanot tetek naur a kaklik asasaer ning dia han amon ana ngas. A palaona e Iesu i ries. 13 Dia ulak, pa dia atai a kakak a asasaerla, ika bel la tortorot otleng on diau.

E Iesu i hanot tetek ning a bonot pa pisir takai a kakak a asasaerla

(Mt 28:16-20; Lk 24:36-49; Jn 20:19-23; Ap 1:6-8)

14 Lamur i hanot pas tetek ning a bonot pa pisir takai a kakak a asasaerla kaning la hangan. Pa i warwara rakrakai on la, anasa bel la tortorot, pa a balanla i rakrakai, pa bel la tortorot on la ning la ka oroi tari ning ka laun ulak. 15 I atai la mange, “Mulor han uting na rakrakan hanua rop, pa mulor warawai ana Wakak a Warwara tetek a taraila rop. 16 Esining i tortorot pa di baptaisi dir alauni. Ika esining bel i tortorot, God ir saran a rakrakai a warkurai teteki sur ir mat. 17 A tena tortorotla lar tol a ututnala na kulkulan larne: Lar kepsen a motla ana risak, lar warwara ana urmatana tona warwara, 18 lar tong a soila, pa ning lar hisop a malum laulau, bel ir alaulau la, pa lar sua a kunla ana tinsamanla, pa lar langolango.”

E Iesu i han kas usaot na langit

(Lk 24:50-53; Ap 1:9-11)

19 Ning a Leklek e Iesu ka warwara tar tan la, e God i rakan pasi usaot na langit, pa i kes ana sot a kuna. 20 Anuna kakak a asasaer la han, pa la warawai ana hanhanua rop. Pa a Leklek i nangan la, pa i amomol tar anuna na warwara ana ututnala na kulkulan ning i han taum ono.]

Copyright information for `LBB