Mark 7

A tarai la atarna sen a warwara ane God

(Mt 15:1-9)

A Parisaiola taum ana tena asaerla tagun a Warkurai mitisa e Jerusalem, la han taum tetek e Iesu, pa la oroi dingla na kakak a asasaer ane Iesu, la hangan ka ana dur a kunla, anasa bel la gos kunla. A Parisaiola pa a tarai Juda rop la murmur a warwara ana tarai turturaila, sur bel lar hangan ning bel la gos kunla. Ning la ulak miting na pukna na sisiurai, lar gogos nigo pas ot lamur lar hangan. Galis a utna otleng lar toli, lar gos a kapla, a kurola pa a tikerla. A Parisaiola pa tena asaerla tagun a Warkurai la deken e Iesu mang, “Sur asa ning anum a kakak a asasaerla bel la mur a toltol anuna tarai turturaila? La hangan ka ana dur a kunla.” Pa e Iesu i keles la mange, “A momolna ot ning, e Aisaia ka warwara na propet o mulo a tena asasongola mang,

‘A taraila ne la hanrawai iau ka ana pahanla,
ika a balanla i bakbak kol kusun iau.
La lotu oros ka tetek iau,
anasa la asaer a taraila ana warkuraila anuna taraila ka.’
Mulo ka han kusun tar a Warkuraila ane God, pa mulo mur kama asasaer anuna taraila.”

Pa e Iesu i atai la mange, “A momolna ot, mulo longor orsan a warwara ane God, sur mulor mur a asasaerla anuna numulo na tarai turturaila. 10 E Moses i atongi mange, ‘Ur hanrawai e tamam pa etnam.’ Pa i atongi otleng mang, ‘Ning tik ir atong saksakan e tamana pa e tana dir umkoli.’ 11 Ika mulo, mulo asaer a taraila mang, i wakak ka ning tik ir atai e tamana pa e tana mang, ‘A utna ning ar nangan mu ano, ia ka tabar tar e God ano.’ 12 Ana asasaer ning, mulo sairasi sur gong i nangan e tamana pa e tana. 13 Ning mulo toli larne, mulo anatarna sen a warwara ane God, pa mulo mur ot a asasaerla ning mulo losi tana numulo na tarai turturaila. Pa a galis a ututna otleng larne ning bel i tostos mulo toli.”

A ututna ning ir adur tik na matana e God

(Mt 15:10-20)

14 E Iesu i kabah ulak a taraila teteki, pa i atai la mang, “Mulo rop mulor longor iau, pa mulor tasman lalan anuka warwara. 15 Ta utna ning tik ir ien pasi pa i kas ting na balana, bel ir aduri na matana e God. Ika a ututnala ning i purum kusun a nuknukna, i ning ir aduri na matana e God”.
7.15-16Dingla na tena mananos ana Buk Tabu la nuki mang dingla na warwara otleng i kes ana rina ne, i manglarne: ‘Esining a talngana i wakak sur ir longor ono.’


17 Ning e Iesu i han kusun a kunum a taraila, pa i kas uting ui na rumai, anuna kakak a asasaer la dekeni ana warwara larlar ne. 18 Pa i atai la mange, “Bel mulo tastasman? Bel mulo oroi mang a ututna rop ning ir kas ting na balan tik, bel ir aduri na matana e God? 19 Anasa bel i kas uting na nuknukna, i kas ka uting na balana pa ir kepseni.”

Ning i atong a warwara ne, i atong talapori mang a utna na hangan rop i wakak.
20 I atongi otleng mange, “A utna ning i purum pas miting na nuknukin tik, i ning ir aduri. 21 Ine a ututnala ning ir hanot miting na nuknukin a tarai: A nuknuk laulau, a toltol a pamuk, a kinkinau, umkol a mainla, dat pas a hane anuna ta mainla masik, 22 a toltol amuk, a laulau aginina, a asasongo, toltol na tintaulai pa bel ta meme ono, ram sur a ututnala, a warwara laulau tana tik, i aitna pasi pa dat abara a pukulna. 23 A ututna laulaula rop ne la hanot miting na nuknukin na taraila, pa ir adur la.”

A tortorot ana hane ning bel a hane Juda

(Mt 15:21-28)

24 E Iesu i han kusun a hanua ning, pa i hanot milau a hanua Tair. I kas uting na ning a rumai. Bel i mang sur tik ir tasmani, ika bel i tolsot sur ir mumun. 25 Ning a hane, a natna hane a mot kaning ono. Ning i longor a warwara o e Iesu, aiapka i han pa i punga tuntudu salanigo ta e Iesu. 26 A hane ning, i a hane Ponisia miting na papar Siria, belsur a hane Juda. I nunung e Iesu sur ir kepsen a mot kusun e natnalik.

27 Pa e Iesu i atai i mang, “Dir tabar masur nigon a kakakla. Bel i tostos sur dir los pas a utna na hangan ana kakakla pa dir tabar a papla ono.” 28 Pa a hane i kelesi mang, “A momolna ot Leklek, ika a papla otleng ting na hailogo, la sira ien a mumut a utna na hangan ana kakakla.”
7.28A kakakla i warwara larlar ana tarai Juda. Pa a papla i warwara larlar ana taraila ning bel a Judala. A utna na hangan i warwara larlar ana sa ning e Iesu i toli tetek a tarai Juda.
29 Pa e Iesu i atai i mange, “Ana num a wakak a arkeles, ur han ka, a mot ka purum tar kusun e natumlik.” 30 Ning a hane i ulak, i oroi e natnalik, kaning i borbor tar ting na logo ngasna. A mot ka purum kusuni.

E Iesu i alangolango pas a talnganakutkut pa a ngatlau

31 E Iesu i han kusun a hanua Tair pa i han potor e Saidon sur a puka tasi Galili, pa i hanot ting na papar Dekapolis.
7.31Dekapolis a kamkamna mang ning a bonot a tatatnan hanua.
32 A tarai la ben pas ning a barsan a talnganakutkut tetek e Iesu, pa la nunungi sur ir sua a kuna ono. 33 E Iesu i ben masik pasi kusun a kunum a tarai, pa i sua naur a pitlai kuna ting na naur a talngana barsan ning. Lamur i namis pas, pa i tong a laigerem a barsan ning. 34 I tadai usaot na langit, i los wuwu pas, pa i atai i mang, “Epata!” A kamkamna mange: “Ur Sapang!” 35 Pa a talngana i talapor, a laigeremna i tapalas pa i warwara talapor kakat. 36 Pa e Iesu i sairas rakrakai a taraila sur gong la atai tar tik ono. Ika ning i sairas la, bel la longor pasi, a warwara ono i han sarara ka. 37 La ning la longor a utna ne, la kulkulan kol ono, pa la atongi larne, “E Iesu i tol wakak pas a ututna rop. I awakak pas a talnganakutkutla sur lar longor, pa a ngatlaula sur lar warwara!”

Copyright information for `LBB