aOsa 13:14

1 Corinthians 15

A Fatatoi Fa'uliaan Na Krais

E naboxo ne buk falamon fa'uli nami mu fetinan, pana Lagasai Roxo aava ne kuusan fasavate e mi siaxe e mi taxa tigina fatateak xuluna. E sena Lagasai Roxo aanabe' mi taa kaaxup layaan mi tao faagutane e tamo piau, a namkaian simi a mo palau.

Nenia, ne fo siak a lagasai pelalava e ne xuus nami pana. A lagasai aave a malaan: Na Krais fo maat lapaana maana vilaana saat sitaara malaan sena Xakalayan Taap a kuus pana. E ri xaafane e lamina yaan talatul a Piran a fatatoi fa'ulie ti la maatan, malaan sena Xakalayan Taap a kuus pana. E nane savat si Pita e mui xe sina mu yaamut sangafilu saxa pana taragua. E mui, lana yaan saxa, a savat sina maana fetinan xaves aava ri xasliu 500. E a xaves iri, ri taxa to lunai e saxanofuna ri fo maat xo. E mui a savat si Jems e lamina xe sina mu yaamut xapiak. E la fataxapiak xo nane savat vaxa siak naapalaan ne malaan sena saxa aava luluuxan sina a pife savat la yaan fatak ina.

A mu yaamut xapiak ri pelalava sega e a pife roxo ri taa xaliau pana yaamut senaso ne fo vil pengan a rabuna sina Piran. 10 Taasaxa, sena xakaavangan xatam sina Piran ne fo savat malaan naboxo mi taxa xalumau tanin senaso nane fa'isinau pana yaamut. A xakaavangan xatam aave fo vil a faisok sina la xunus iga. E naboxo, ne faisok faagut seri mu yaamut xapiak. A pife faisok siak, taasaxa ne faisok pana xakaavangan xatam sina Piran aava waan la xunus iga. 11 E voxo, a pife mo molava tamo nenia, ne kuusane o a xasano yaamut fulaa ri kuusan fasavate, nemaam xapiak maam kuusan fasavat a lagasai saxa mon e a lagasai aave mi fo namkai sena.

A Fatatoi Fa'uliaana Mu Mamaat

12 Naboxo, senaso maam kuusan fasavat a to fa'ulaian si Krais ti la mamaat malaafaa saxanofuna la palou imi ri kuus o a mu mamaat ri taa pife to fa'ulaa? 13 Tamo piau ta to fa'ulaian ti la maatan, lavaxa na Krais vaxa a pife fatatoi fa'ulian ti la maatan. 14 E tamo Piran a pife fatatoi fa'uli na Krais ti la maatan, a kuusan simaam a piau ta fufuna e a namkaian simi a mo palau. 15 E fulaa, maam bit tifi a Piran senaso maam fo kuus o nane fatatoi fa'uli na Krais ti la mamaat. Taasaxa tamo tuuna o a Piran i taa pife fatatoi fa'uli a mu mamaat, lavaxa a pife fatatoi fa'uli na Krais sait. 16 Senaso tamo a mu mamaat ri pife to fa'ulaa, na Krais vaxa pife to fa'ulaa. 17 E tamo na Krais pife to fa'ulaa, a namkaian simi pi ta fufuna e mi taxa milung lunai lana vilaana saat simi. 18 E fulaa a mu rabuna aava ri namkai se Krais e ri fo maat xo, nari vaxa ri milung. 19 E tamo taara namkai o na Krais i taa fakaxup netaara sena toyan sitaara nabe' la xavala mon e pife sena toyan i taa waan vulai xe vulai, a mu rabuna xapiak ri taa muluk faagutan netaara sena xasanofuna.

20 Taasaxa, a tuuna, a Piran fo fatatoi fa'uli na Krais ti la maatan xena fakalimaan a kuus fanaian xe siri aava ri fo maat xo o a Piran i taa fatatoi fa'uli nari vaxa. 21 Mi texaas o a maatan a savat sena saxa mataa, na Aadam, e a to fa'ulaian ti la maatan a savat sena saxa mataa e nane ve na Krais. 22 E malaan sena mu rabuna xapiak ri fo maat senaso ri waan la xuvulaian xuvul pa Aadam, nari aava ri waan la xuvulaian xuvul pa Krais ri taa to fa'ulaa. 23 Taasaxa Piran i taa fatatoi fa'uli nari saxa saxa lana yaan fatak siri: paamua, na Krais aava fakalimaanan ina kuus fanaian sina Piran e mui lana yaan lava ina filimaanan sina, nari aava ri rabuna sina. 24 E bak, a fataxapiak ina yaan i taa savat e lana yaan aave na Krais i taa kawaasan xapin a mu memai, matalava e piran sina mu vovau saat e i taa tavai a Piran aava na Tamana, pana fatataganan xapiak. 25 Senaso na Krais i taa tamana paamuian a maana mo xapiak fefexaxaas a Piran i taa famati a mu xaiyaas si Krais lapaana kana. 26 E a xaiyaas fataxapiak aava Piran i taa mimit xapine ve a maatan. 27 A Xakalayan Taap a kuus, “A Piran a famati a maana mo xapiak lapaana kana.” Taasaxa taara texaas o a mu vapaling, “maana mo xapiak” ri pife ferawai sena Piran xa aava famati a maana mo xapiak lapaa Krais. 28 Taasaxa layaan a Piran fo famati a maana mo xapiak lapaa Krais, na Krais aava natuna, i taa timin nane xa lapaana Piran aava famati a maana mo xapiak lapaana. E a Piran xo i taa paamuian xapin a maana mo xapiak.

29 Naboxo, tamo a Piran i taa pife fatatoi fa'uli a mu mamaat xenaso a saxanofuna ri fasufan sena mu mamaat. Ri taxa sou? A fasufaan nari i taa xavang a mu mamaat malaafaa? 30 E tamo piau ta to fa'ulaian ti la maatan xenaso nemaam, maam taxa tigina vulai lana mu lagafan sena kuusan fasavat a to fa'ulaian aanabe'. 31 Mu fetinan, ne kuus tuuna, a maana yaan xapiak a maatan rao i siaxau. Taasaxa lana xuvulaian xuvul pa Krais Yesus, a Memai sitaara, ne lamon falalava semi. 32 Xenaso nenia, ne matatuuna e ne fo fevis pana mu vupung pe Efasis tamo a mamaat i taa pife to fa'ulaa? Ne fo siak a so? Tamo mu mamaat ri taa pife to fa'ulaa naak taara taa lamon pana toyan sitaara tanin mon e taara taa usi a ferawaian aava kuus, “Taara taa fangan e num senaso mafu taara taa maat.” 33 Muta turoxoian a rabuna xena bit nami: “Tamo mi waan xuvul pana rabuna aava vilaana siri saat, ri taa kawaasan a vilaana roxo simi.” 34 Fataxapin a vilaana saat simi e mi ulaamaan xe lana lamonan roxo. Ne buk famangil nami e voxo ne kuus o saxanofuna la palou imi ri vungut sena Piran.

A Vipin I Taa Malaafaa Lana Yaan Ina To Fa'ulaian

35 Saxanofuna ri taa fiai, “A mu mamaat ri taa malaafaa layaan ri to fa'ulaa? Ri taa toxan a so ta buk vipin?” 36 Nami, mi piau ta masaman, bo? Layaan no xapis a kam la xavala i taa pife boak tamo pife miit paamua. 37 E layaan no kaapis, no xapis a kam mon, naak a kam ina ‘wiit’ o rais o mo malaan. No pife xapis a mo xurul pana paxana, piau. 38 Taasaxa Piran lana vubuxanan sina a tavai a mu kam pana boak iri. Nane tavai a mu kam saxa saxa pana boak fatak ina. 39 E vaxa a meska ina maana mo aava ri to, ri pife fexaxaas: a mu rabuna ri toxan a saxa buk meska, a mu tiir a saxa, a mu maanu a saxa e mu din a saxa. 40 A toxan a maana mo la xavala e la xunavata e a magaafan iri, ri fepatok. 41 A ngaas a toxan a magaafan ina xa, a fulun e mu vapara ri toxan a magaafan iri xa. E a magaafan ina mu vapara vaxa fepatok.

42 I taa malaanabe' layaan a mu mamaat ri taa to fa'ulaa. A so ta mo ri xaafane la xavala i taa miit, taasaxa layaan a Piran i taa fatatoi fa'uli a mu mamaat ri taa toxan a vipin fa'ui iri aava i taa pife maat fulaa. 43 Layaan ri xaafan a mamaat a vipin ina a saat e malmal. Taasaxa layaan a Piran a fatatoi fa'ulie, a vipin ina a magaaf e a tateak. 44 Layaan ri xaafane, a vipin aave a mo ti la xavala. E layaan a Piran a fatatoi fa'ulie, a vipin fa'ui aave a mo pana gutan sina Vovau Xaradak.

Tuuna, tamo toxan a vipin ti la xavala i taa toxan vaxa a vipin sina Vovau.
45 A malaan sena Xakalayan Taap a kuus, “A Piran a vil fanei a mataa mata, na Aadam, e nane savat matatuuna pana toyan. Taasaxa na Aadam fataxapiak fo savat a vovau aava tatavai pana toyan.” 46 A vipin sina vovau a pife savat paamua taasaxa vipin ti la xavala a savat paamua e lamina a vipin sina vovau. 47 A mataa mata a savat ti la xavala e a Piran a vesane pana pof, taasaxa, a fataraguiaana mataa a savat ti la xunavata. 48 A mu bu Aadam xe mui ri rabuna ti la xavala malaan sena e nari ti la xunavata ri malaan sena saxa aave aava savat ti la xunavata. 49 E malaan se' taara toxan a nonau ina mataa ti la xavala naboxo, mui taara taa toxan a nonau ina mataa ti la xunavata.

50 Mu fetinan, a malaanabe': nane aava toxan a vipin ti la xavala i taa pife siak a nobina la fatataganan sina Piran e a so ta mo aava i taa miit i taa pife waan xuvul pana mo aava i taa pife miit. 51 Langai a tuunayan fufunai aanabe': pife netaara xapiak taara taa maat, piau. Layaan a tafiu fataxapiak i taa rawei taara xapiak, taara taa xuxul fa'ipul, fataapus paaliu malaan sena mataa a fapuruk a matana. E layaan a tafiu i taa rawei a mu mamaat ri taa fatatoi fa'ulian e ri taa pife maat fulaa e netaara xapiak taara taa xulan. 53 Senaso, a so ta mo i taa maat i taa xuxul pana mo i taa pife maat fulaa e a so ta mo i taa masiik i taa xuxul pana mo i taa pife masiik fulaa. 54 E layaan a mo aava i taa miit fo xulan pana mo i taa pife miit e a mo aava i taa maat fo xulan pana mo i taa pife maat, lana yaan aave a ferawaian aanabe' lana Xakalayan Taap i taa savat tuuna la matavas:

“Maatan, nano, no fo kawaasanan. Fa'onaman fo xasliuan nano.
55 Maatan, no fo fa'onam nase'? Maatan, no taa pirak nase'?” a 
56 Na Maatan a fexaxaas sena pirak a mataa sena vilaana saat sina mataa aave e a vilaana saat aave a savat sena vuputkai aava na Moses fo xaleie. 57 Taasaxa, taara taa kuus faasiroxo xe sina Piran senaso nane fo tavai netaara pana gutan xena fa'onam. A gutan aanabe' a savat sena maana mo aava Memai Yesus Krais fo vile xataara.

58 E voxo, kamu fetinan, tigina fatateak, muta radakui pana matautan. Faisok faagut lapaa Memai senaso mi texaas o a faisok simi lapaa Memai i taa pife savat palau.

Copyright information for `LEU