1 Corinthians 16

A Faxuvulaana Faat Xena Xavang A Rabuna Sina Piran

Naboxo, ne taa sui a fiaian simi sena faxuvulaana faat xena xavangaana rabuna sina Piran pe Judia. Nami xa mi taa vil a so ta mo ne xuus a mu rabuna nanamkai aava ri waan pe Galesia, pana. La yaan mata ina ‘wiik’ saxa saxa mi taa timin fanei a saxano faat ina maana faat aava mi fo fasavate talo mi taa pife seng ta tatavai layaan ne maa savat. E mi taa siak fati a saxanofuna ti la palou imi e layaan ne savat ne taa feng nari pana lagasai e pana tatavai aave xe siri pe Judia. E tamo ne lamon o a roxo ne taa falet, lavaxa ri taa falet xuvul paga.

Nenia, ne taa falet xe Mesidonia e mui ne taa savat simi. Naak ne taa waan xuvul pami pana mu yaan xaves, o naak ne taa waan a yaan xapiak ina Maat Bung e mui mi taa xavangau pana faletan siak. Ne pife texaas lunai xe faa? Ne bai xalum nami naboxo pana valayaan mon. Ne vubuk o ne taa waan xuvul pami pana maana yaan xaves, tamo Memai i taa turoxo pana. Taasaxa ne taa waan nabe' Efasis fefexaxaas a Fenamo ina Pentakos, senaso a maana rabuna xaves nabe' ri buk langai a Lagasai Roxo e ne toxan a faisok xaves xena kuusan fasavataana xe siri naapalaan a xasano rabuna ri taxa gigiranau.

10 Tamo na Timoti i taa savat simi muta famataute senaso nane taxa faisok lapaa Memai malaan sega. 11 Pi ta saxa i taa kaalum fasivi xuluna. Xavange pana faletan sina talo i taa ulaamaan xeau senaso nemaam mu fetinan, maam taxa waan bange.

12 Lavaxa, se titaara na Apolas, a maana yaan xaves ne faxaare o i taa fe xalum nami xuvul pana mu fetinan, taasaxa nane bai falet naboxo. Nane taa fe savat simi la yaan fatak ina faletan sina.

13 Faxatang; tigina fatateak lana namkaian simi; muta mataut; waan fatateak. 14 E a so ta mo mi taa vile, usi a vilaana ina vubuxan xasingitan.

15 Mi texaas o a matafetama si Stefanas, nari rabuna mata ina namkaian nabe' Akeai e ri fo lisan nari xa xena xavangaana mu rabuna fatak. E ne faxaar nami o 16 mi taa waan lapaana mu paamua malaan seri o nase' fulaa ri faisok e sisiak xuvul pari. 17 Ne faamamaas o na Stefanas, Fortunatas e na Akaikas rutul maa savat. Rutul taxa xavangau senaso nami, mi pife waan iau xena xavangau. 18 E rutul faluai a lamonan siak, malaan serutul faluai nami. Mi taa suai sena rabuna malaan serutul.

A Fasisian Fataxapiak

19 A mu rabuna sina Piran pe la bina Esia, ri fasisi nami. Na Akwila nare Prisila xuvul pana mu rabuna sina Piran aava ri faxuvul la lifu sire, nari, pana faamamaasan, ri fasisi nami. 20 A mu fetinan nabe' ri fasisi nami. Fasusui nami xa pana fengusan xaradak.

21 Nenia na Pol, ne xalei a fasisian aanabe' pana maak.

22 Nase' ta mataa a pife vubuxan xasingit a Memai i taa kawaasanan. Memai, filimaan.

23 Ne vubuk rao a Memai Yesus i taa xafut nami pana xakaavangan xatam sina.

24 A vubuxan xasingitan siak i taxa waan xuvul pami xapiak aava mi waan la xuvulaian xuvul pa Krais Yesus.

Copyright information for `LEU