2 Thessalonians 3

Na Pol A Fin Nari O Ri Taa Fenung Pana

E naboxo mu fetinan, fenung pamaam talo maana rabuna la mu bina xapiak ri taa langai a lagasai si Memai e ri taa suai sena xena namkai, malaan semi. E vaxa, mi taa fenung o a Piran i taa fakaxup nemaam xasena rabuna aava ri bilai fasaat e ri fuuna fasavat a lagafan, senaso saxano rabuna ri bai namkai. Taasaxa Memai taxa waan fatateak vulai e i taa fagut nami e i taa tivotan nami xasena mataa saat. Sena namkaian simi maam texaas tuuna o mi taxa lo vil a maana mo maam fasei nami pana. Ne vubuk o a Piran i taa kas a lamonan simi talo mi taa masam faroxo sena vubuxan xasingitan sina Piran e malaafaa na Krais a fatiginei fatateak vulan netaara.

Muta Nai Palau

Lapaana isi Memai Yesus Krais, maam fasei faagutan nami mu fetinan, o mi taa faapalau sena mu fetinan aava ri nai palau e ri pi ri faisok. Senaso ri langai pesalai sena fepitaian simaam. Layaan maam waan xuvul pami maam pife nai palau e nami xa mi texaas o mi taa usi fatak a vilaana simaam. Maam pife siak palou ta mo sin' ta mataa, piau. Maam faisok faagut; la maana yaan xapiak maam faisok faagut talo maam fexaxaas sena maraan a maana mo pamaam. Maam fexaxaas sena tigina lamimi pana xakaavangan simi, taasaxa piau, maam faisok faagut malaan talo mi taa xalume e mi taa usi a vilaana simaam. 10 Layaan maam waan xuvul pami maam xuus nami malaan, “Nase' ta mataa bai faisok i taa pife fangan.”

11 Maam ferawai malaan senaso maam langai o saxanofuna la palou imi ri pi ri faisok. Ri pife vil ta mo, taasaxa ri fuuna lo ferawai vipiaal pana faisok sina xasano rabuna. 12 Lapaana isi Memai Yesus Krais, maam fasei faagutan a mu rabuna aave e maam pebukan nari o ri taa taagul faroxo e ri taa faisok xena maraan fanganan pari. 13 E nami mu fetinan, muta maare pana lo bilai faroxo.

14 Tamo saxa la palou imi a langai pesalai sena lagasai aanabe', fakalimaan votane e muta nai xuvul pana talo i taa mangil sena vilaana saat sina. 15 Muta lamon o nane saxa xaiyaas, piau, taasaxa pebukane malaan sena saxa ti lana matafetama simi.

A Fasisian Fataxapiak

16 Ne vubuk o a Memai aava fufuna luaian, i taa pisingan nami la maana yaan xapiak pana luaian la xunus imi. A Memai i taa waan xuvul pami.

17 Lana mu lagasai aava ne lisane, ne xalei a fasisian aanabe' xe simi pana maak. A xakalayan aanabe' a faxaalit o nenia na Pol, ne lisan a lagasai aanabe'.

18 A xakaavangan xatam sina Memai Yesus Krais sitaara i taa waan xuvul pami xapiak.

Copyright information for `LEU