John 11

A Maatan Si Lasarus

A toxan a mataa a isina na Lasarus, i taxa giis e nane ve ti Betani, a bina si Maria narie tina na Marta. Na Maria aave mon ve, mo tiuan a mo musung roxo la ka Yesus e saf fapigalipe pana fui sina e na vasaana, na Lasarus ve, taxa giis. E ro fetinan aave re lisan a lagasai xe si Yesus e re xuuse, “Matalava, a fesing siim taxa giis.”

Layaan na Yesus a langai sena nane kuus, “A giisan aanabe' i taa pife taxapus lana mamaat. Taasaxa giisan aanabe' fo savat xena faxalit a gutan sina Piran e fulaa xena vil famalang a Natuna Piran pana.” Na Yesus a vubuxan xasingit na Marta e na tina e na Lasarus. Taasaxa layaan nane langai o na Lasarus taxa giis, nane taagul su' la nobina aapave pana yaan taragua fulaa, e mui nane xuus a mu fefeng sina, “Taara taa sangas ulaa xe Judia fulaa.”

E mu fefeng ri xuuse, “Mataa ina Fepitaa, piau ta yaan xaves feliu lunai layaan a mu matalava Juda ri tafang pana soxoiaan nano pana faat e rao no ulaa xe pave fulaa?”

Na Yesus a sui nari pana ferawaian aanabe', “A ngaas fuuna waan pana awa sangafilu saxa pana taragua mon, bo? Layaan a mataa taa sangas xolai la matavas i taa pife poxo senaso nane fexaxaas sena kaalum lana malang ina ngaas. 10 Taasaxa, tamo ta mataa taa sangas xolai la vung nane taa kalaxoi senaso nane piau ta malang xena kaalum.”

11 Nane kuus malaan e mui a xuus nari, “A fesing sitaara, na Lasarus, i taxa matef maat, taasaxa nenia, ne taa falet xe pave xena faparayaana.”

12 Taasaxa mu fefeng ri xuuse, “Ai Matalava, nane i taa roxo tamo i taxa matef.” 13 Taasaxa na Yesus taxa ferawai pana maatan sina e ri lamon o nane taxa ferawai pana matefan mon.

14 E na Yesus a xuus famatavas nari, “Na Lasarus fo maat! 15 E a mo roxo nenia, ne pife waan pave senaso ne vubuk xavang a namkaian simi. Taara taa falet xe pave.”

16 E voxo na Tomas, a xasa isina na ‘tauna lua’, a xuus a xasano fefeng, “Lavaxa, taara xapiak taa falet vaxa talo taara taa femaat xuvul pana.”

Na Yesus A Fagut A Namkaian Si Marta

17 La yaan na Yesus a savat pave, ri xuuse o ri fo timin na Lasarus lana liing ina mamaat e a yaan talafaat fo liu xuluna. 18 A bina Betani ve waan faasilak se Jerusalem, malaan sena kilomita talatul mon. 19 E a mu rabuna Juda xaves ri maa savat si Marta narie Maria xena famalulum nare sena maatan si vasaare.

20 Layaan na Marta xo, a langai o na Yesus taxa filimaan nane falet xena fesuaiane, taasaxa na Maria a waan su' pave lana lifu.

21 Na Marta a xuus na Yesus, “Memai, naak tamo no waan nabe' na vasaak i taa pife maat. 22 E ne texaas o monabe' mon a Piran taa tavai nano pana so ta mo no taa fenung xe sina pana.”

23 Na Yesus a xuuse, “Na vasaam i taa tamasiak fa'ulaa.”

24 E na Marta a suie, “Ne texaas o i taa tamasiak fa'ulaa lana To Fa'ulaian la Yaan Fataxapiak.”

25 Na Yesus a xuuse, “Nenia ve ne To Fa'ulaian e ne Toyan Tuuna. Nase' aava namkai sega, naapalaan a maat, i taa to. 26 E ta mataa aava i taxa to e i taxa namkai sega, a mataa aave i taa pife xalum a maatan. Nano, no namkai sena ferawaian aanabe'?”

27 E nane suie, “Aang Memai, ne namkai o nano, no Mataa Failai, no Natuna Piran, nane aava i taa savatmaan xe la xavala.”

Na Yesus A Ferawai Xuvul Pa Maria

28 Layaan nane kuus malaan nane falet e fe xel na tina, na Maria e a xuuse, “A Mataa ina Fepitaa fo savat e taxa xel nano.” 29 Layaan na Maria a langai malaan nane tamasiak fataapus e falet xe sina. 30 Na Yesus a pife laak lana bina lunai taasaxa nane taxa waan xa la nobina aava na Marta fo fesuaiane lana. 31 La yaan aave saxano rabuna Juda ri taxa waan xuvul pa Maria lana lifu e ri taxa fetaangiis xuvul pana e ri xalum nane tamasiak fataapus e falet xe lamalei. E ri usie senaso ri lamon o i taa paan xe la bina ina mamaat xena taangiis pave.

32 Layaan nane savat si Yesus nane poxo la kana e xuuse, “Memai, naak tamo no waan nabe' na vasaak i taa pife maat.”

33 Na Yesus a xalum na Maria taxa taangiis e a mu rabuna Juda aava ri savatmaan xuvul pana vaxa ri taxa taangiis. E a xunus ina nasam a mamaxusan e a vovau ina piau ta luaian. 34 E a fin nari, “Mi fo timine faa?”

E ri suie, “Matalava, filimaan xuvul pamaam e no taa xalume.”

35 E na Yesus a taangiis.

36 Nari mu rabuna Juda ri ferawai sena, “Kaalum, nane vubuxan xasingite.”

37 Taasaxa saxanofuna iri, ri piile, “Nane fo kas a matana mataa piif; a sou pife fexaxaas sena ti votan a mataa aanabe' sena maatan?”

38 Na Yesus nari, ri fe savat la bina ina mamaat e fulaa a xunus i Yesus a mamaxus. A bina ina mamaat sina mataa aave ve a liing e ri timine lana e ri xaweie pana faat molava. 39 E na Yesus a xuus nari, “Pul tapin a faat aapave.”

E na Marta, a vasaana mataa aava maat, a xukulai, “Memai, nane fo maat e a yaan talafaat fo liu xuluna naboxo, i taa mafiu faagut ve.”

40 Na Yesus fine, “Ne fo xuus nano paamua e bo, o tamo no taa namkai sega no taa xalum a gutan sina Piran?”

41 E voxo ri pul tapin a faat e na Yesus a kaalum xe laa'ui e kuus, “Tamaang, ne kuus faasiroxo xe siim senaso no fo langaiau. 42 Ne texaas o no fuuna langai vulanau, taasaxa xana mu rabuna xaves aanabe' aava ri taxa ti langai, ne kuus malaan talo ri taa masam e namkai o nano, no fo fengau.”

43 A kuus malaan e xukulai faagut, “Lasarus, savatmaan!” 44 A mataa aava maat a tamasiak e savat xe lamalei pana nu mana e nu kana pisan pana marapi e a toxan a marapi la nona sait.

E na Yesus a xuus nari, “Mulus tapin a marapi sena talo i taa sangas.”

A Mu Matalava Juda Ri Lamon Pana Punuxaan Na Yesus

45 E voxo xaves sina mu rabuna Juda aava ri fo savat xena famalulum na Maria, ri xalum a mo ina gutan na Yesus fo vile e ri namkai sena. 46 Taasaxa saxano rabuna Juda aava ri waan pave sait ri falet xe sina mu Ferasi e ri fe xuus fatexaas nari pana so ta mo na Yesus fo vile. 47 E voxo mu memai priis e mu Ferasi ri xel faxuvul a mu piran Israel xe lana Faxuvulan Lava.

E ri kuus, “A mataa aanabe' i taxa vil a mu fakalimaanan xaves. E taara taxa vil a so?
48 Tamo taara taa nai fe palau sena, malaan naboxo, naak a mu rabuna xapiak ri taa namkai sena e voxo a mu Rom ri taa savat xena galas a tang lifu lotu sitaara e ri taa siak tapin a isin sitaara e a bina sitaara.”

49 E saxa siri, na Kaiafas aava memai priis la mariaas aave, a xuus nari, “A texaasan simi a mo palau. 50 Mi pife lamon o a mo roxo paaliu tamo saxa mataa i taa maat xana mu rabuna xapiak. A mo aanabe' a roxo sena maana rabuna Israel xapiak ri taa maat.”

51 Nane pife kuusan a ferawaian aanabe' lapaana gutan sina fatak, taasaxa nane a memai priis la mariaas aave e voxo nane kuus fatuxai o na Yesus i taa maat xana mu rabuna Israel. 52 E pife xana mu Israel mon, i taa maat xena faxuvul a maana mu rafulak sina Piran talo ri taa waan lana pabung saxa. 53 E voxo la yaan aapave nari mu Juda ri lamon faagut o ri taa punuk na Yesus.

54 E nane xo pife sangas fulaa la matavas la palou ina mu rabuna Juda. Taasaxa, a ta'ulan a bina aapave e falet xe la bina Efriam, faasilak la xobingil. E pave nane taagul xuvul pari aava ri fuuna usie.

55 A Yaan ina Paaliuan sina mu Juda a faasilak e a rabuna xaves ri laak ti la mu bina siri xe Jerusalem paamuina fenamo xena vil tapin a lalosaat siri. 56 E nari, ri taxa seng na Yesus e ri taxa fefiai la palou iri layaan ri taxa irimai lana tang lifu lotu, “Ai, mi lamon malaafaa? Naak, i taa pife savat la Fenamo aanabe', bo?” 57 Senaso a mu memai priis e mu Ferasi ri fo fasei a mu rabuna o tamo ta mataa a texaas o na Yesus taxa waan faa i taa xuus fatexaas nari talo ri taa fe pise.

Copyright information for `LEU