aYng 118:25
bSkr 9:9
cAis 53:1
dAis 6:10

John 12

Na Maria A Xamak A Ka Yesus Pana Naart

A yaan pisaxa paamuina fenamo na Yesus a savat pe Betani, a bina si Lasarus aava nane fo xel fatatoi fa'ulie ti la mamaat. Narutul aave rutul faigotan a fanganan xana. Na Marta fetavai pana fanganan e na Lasarus vaxa a saxa la palou iri aava ri taxa nai xuluna ivin xuvul pana. Na Maria a siak a fomirak vuk pana mo musung roxo lana, ri xalie pana naart e a mamareiai ina molava temasaat. E nane maa xamak a ro ka Yesus pana e mui a fapigalipe pana fui sina. A lifu aave a las faagut paaliu pana lasan roxo ina naart.

Na Judas Iskeriot, a saxa yaamut si Yesus aava i taa pet lisane, a kuus, “Xenaso a mo musung roxo aanabe', no pife faasot pana? Naak a mamareiai ina a molava sena K1,000 e mui no taa tavai a mu valagof pana!” Nane pife kuus malaan senaso nane lalamon temasaat sena mu valagof, piau. Taasaxa nane fuuna faxatang a maana faat siri e fuuna fenou a mo aava mu rabuna ri tavai nari pana.

Taasaxa na Yesus a kuus, “Muta riise! Naapalaan; i taa tao a mo musung roxo aanabe' xena fasufau la yaan ina xaxaafaian siak. A mu valagof ri taxa waan vulai, taasaxa nenia, ne taa pife waan vulai xuvul pami.”

A mu matalava Juda xaves ri fetexaas o na Yesus taxa waan pave e a tang malila ri savat xena xalume. E pife nane sang mon ri buk xalume, ri savat xena xalum na Lasarus sait aava na Yesus fo fatatoi fa'ulie ti la maatan. 10 E voxo nari mu memai priis ri fo lamon faati o ri taa punuk na Lasarus sait, 11 senaso a mu rabuna Juda xaves paaliu ri taxa ta'ulan nari e ri taxa namkai se Yesus sena mo fa'ipul aava nane fo vile se Lasarus.

A Laaxan Si Yesus Xe Jerusalem

Mt 21:4-9; Mk 11:7-10; Lk 19:35-38

12 A yaan lamina, a tang malila molava aava ri savat la fenamo, ri langai o na Yesus taxa sangasmaan xe Jerusalem 13 e ri siak a mu paxana nunui e xasano mo e ri fe paan xena fasusuie. E ri taxa lo xukulai:

“Hosaana! Fakaaxup!
Nane aava i taxa savatmaan lapaana isina Piran i taa faamamaas!
Faamamaasan xuluna Piran King ti Israel!” a 
14 Na Yesus a siak a ‘donki’ e nai xuluna e a savat malaan sena xakalayan a kuus pana:

15 “Muta mataut, lak tefin ti Saion.
Kaalum. A Piran King siim i taxa filimaan e nane taxa nai xuluna natuna ‘donki’.” b 
16 A mu fefeng sina ri pife masam sena vilaana aanabe' paamua, taasaxa lamina yaan na Yesus fo siak a miridingan sina, ri lamon fa'uli a xakalayan sina mu Juda aava kuusan fasavat a mo aanabe' se Yesus. E fulaa ri lamon fa'ulie o a mu rabuna pave, ri fo vil a maana mo lana kuus fatuxaian pa Yesus.

17 A mu rabuna aava ri xalume layaan nane fo xel na Lasarus ti lana liing ina mamaat e fatatoi fa'ulie ti la maatan, ri kuus xakaavang sena mo aave. 18 E voxo a tang malila ri falet soxote senaso ri fo langai sena mo fa'ipul aanabe'. 19 E mu Ferasi ri fefiaian nari, “Xalume, taara taa vil a so? A maana rabuna xapiak ri taxa usie naboxo.”

Na Yesus A Kuus Fatuxai Sena Maatan Sina

20 A toxan a saxano rabuna ‘Griik’ ri taxa waan la palou ina tang malila aava ri savat xena nangus a Piran la Fenamo aanabe'. 21 E ri savat si Filip ti Betsaida pe Galili e ri xuuse, “Matalava, maam vubuk ferawai xuvul pa Yesus.” 22 Na Filip fe xuus na Endru e na Endru narie Filip re fe xuus na Yesus.

23 Nane sui narie, “A yaan fo savat naboxo, a Natuna Mataa i taa siak a isin lava. 24 Ne xuus tuunei nami, a kam ina ‘wiit’ i taa pife xaves tamo i taa pife poxo xe lana xavala e maat. Taasaxa layaan i taa du lana xavala i taa boak e fuaa pana kam xaves. 25 Ta mataa aava vubuxan temasaatan a toyan sina, i taa pife siak a toyan tuuna; ta mataa aava baian a toyan sina xuluna xavala aanabe', i taa siak a toyan tuuna aava i taa waan xe vulai. 26 Tamo ta mataa rao i sisiak siak, nane i taa usi tuuneiau e a so ta bina ne taxa waan lana, a sisiak aave sait i taa waan lana. Layaan a mataa taa sisiak siak, na Tamaang taa suaiane.

27 “Taasaxa naboxo a xunus iga a pife luai, ne taa kuus malaafaa: Tamaang, fakaxupau sena yaan aanabe'? Piau! A yaan aanabe' mon ve a fufuna savatan siak. 28 Tamaang, siak fati a isaam!”

E a ling a savat ti laa'ui la xunavata e a kuus, “Ne fo siak fati a isaak paamua e ne taa siak fati fulane.”

29 A rabuna xaves lana malila aava ri taxa tigina pave ri langai a ling aave e ri kuus o a tang vabarak fo tuung. Saxanofuna ri kuus, “Piau, saxa angelo fo ferawai xuvul pana.”

30 Na Yesus a xuus nari, “A ling aanabe' pife ferawaian xanak taasaxa a ferawaian xami. 31 A mu rabuna xapiak ti la xavala ri taxa tigina lapaana tiisan e matalava ti la xavala aanabe' i taa xup tapinan. 32 E la yaan ri taa yaasau ti lapia xe laa'ui, ne taa yuuf a maana rabuna xe siak.” 33 Nane kuus malaan xena faxalit nari pana so ta buk maatan nane taa siaxe.

34 A rabuna lana malila ri fine, “Lana mu vuputkai a xuus nemaam o a Mataa Failai i taa waan xe vulai. Malaafaa no taxa kuus o a Natuna Mataa ri taa yaase? A Natuna Mataa aave ve nase'?”

35 Na Yesus a sui nari, “A malang i taa waan la palou imi famodak lunai mon. E layaan mi taxa toxan lunaian a malang, sangas saa lana talo suk i taa pife xasliu nami. Nane aava sangas xolai la suk pife texaas o i taxa paan xe faa. 36 Layaan mi toxan lunaian a malang, namkai sena malang aave talo mi tafe savat mu rafulak sina malang.” Layaan na Yesus fo ferawai malaan nane ta'ulan nari e fe fufunai seri.

A Mu Matalava Juda Ri Bai Namkai Se Yesus

37 Nane fo vil a maana fakalimaanan xaves la matari taasaxa ri pife namkai sena, 38 e voxo a ferawaian sina mataa ina kuus fatuxai, na Aisaia, a savat tuuna. A kuus malaan:

“Piran, nase' fo namkai sena lagasai sitaare?
E nase' fo masam o a gutan sina Piran ve fo savat xo?” c 
39 Ri pife fexaxaas sena namkai senaso na Aisaia a kuus fulaa:

40 “Nane fo fapiif a matari e fatavanat a lamonan siri.
A vil malaane talo ri taa pife kaalum faroxo pana matari e ri taa pife lamon faroxo la xunus iri.
Tamo ri taa kaalum faroxo e lamon faroxo
ri tamaa ta'ulan a vilaana saat siri e ne taa vil faroxoi nari.” d 
41 Na Aisaia a kuus malaan senaso nane fo xalum a malangan si Yesus e nane taxa ferawai sena.

42 Lavaxa, a rabuna xaves e saxanu matalava sina mu Juda sait, ri fo namkai se Yesus taasaxa ri pife kuusane la matavas senaso ri matautan a mu Ferasi ulaa ri tamaa ti votan nari, ri muta laak lana mu lifu ina faxuvulan. 43 A rabuna aave, ri lamon o a kuus faatulaian sina mu rabuna a pelalava sena kuus faatulaian sina Piran.

44 Na Yesus a xukulai faagut, “Nane aava namkai sega i taa pife namkai sega sang mon, piau. Nane i taxa namkai vaxa sena Saxa aava fengau. 45 Layaan mi taxa xalumau, mi fo xalum sait nane aava fengau. 46 Nenia, ne malang e ne fo savatmaan xe nabe' la xavala talo mataa aava namkai sega i taa pife waan la suk.

47 “Tamo a mataa i taa langai a ferawaian siak taasaxa a bai usie, lavaxa ne taa pife tiise senaso ne pife savatmaan xena tiis a mu rabuna la xavala, ne filimaan xena fakaxup nari. 48 Nase' i taxa tisuiau e taxa lamavaang sena mu ferawaian siak, nane toxan a mo ina tiisaana. A mo aanabe' ve a lagasai ne fo kuusane, a lagasai siak i taa tiis a mu rabuna malaan la Yaan Fataxapiak. 49 Muta lamon o nenia, ne taxa ferawai lapaana gutan siak fatak, piau. Taasaxa nane aava fo fengau, na Tamataara fatak, a fasei faagutanau pana so ta maana mo ne taa ferawai pana. 50 Ne texaas o a fefasaian sina i taa fasavat a toyan vulai. Nenia, ne kuus fatak pana ferawaian aava na Tamataara fo xuusau pana.”

Copyright information for `LEU