John 7

Na Yesus A Laak Xe La Saxa Fenamo Pe Jerusalem

Lamina mu yaan aanabe' na Yesus a falet e fe sangas xolai pe Galili. Nane vil malaane senaso a mu Juda pe Judia rao ri punuxe. Mui xo, saxa fenamo sina mu Juda a faasilak, a Fenamo ina Sawat. E voxo nari mu ti Yesus ri xuuse, “Ta'ulan a bina aanabe' e no falet xe Jerusalem talo a mu fefeng siim pave ri taa xalum a mu faisok lava aava no taxa vile. Senaso tamo ta mataa a vubuk o a mu rabuna xaves ri taa texaas sena, i taa pife fun a faisok sina. Nano, no fuuna vil a maana mo aanabe' e voxo faxalit a mu rabuna la xavala pana.” Ri kuus malaan senaso nari, mu fetinan vaxa, ri pife namkai sena.

Na Yesus a xuus nari, “A yaan roxo siak a pife savat lunai taasaxa nami a maana yaan xapiak ri roxo semi. A mu rabuna ti la xavala ri pife fexaxaas sena baian nami, taasaxa ri baianau senaso ne fuuna kuus o a maana mu vilaana ri vivile ri saat sang. Mi laak saa xe la fenamo aapave. Ne taa pife laak lunai senaso a yaan roxo xanak pife savat lunai.” Nane kuus malaan e a waan su' pe Galili.

10 Taasaxa lamina yaan ri fo paan xe la fenamo, nane sait a laak saa taasaxa pife sangas la matavas, nane falet fufunai mon. 11 Pave la fenamo a mu Juda ri taxa lo senge e ri kuus, “Faa ta mataa aave?”

12 La palou ina tang malila aave ri taxa lo fefinaas xolai sena. Saxanofuna ri kuus, “Nane a mataa roxo!”

E xasanofuna ri sui nari, “Piau, nane taxa familung a rabuna xaves!”
13 Taasaxa nari xapiak ri pife ferawai sena la matavas senaso ri mataut sena mu matalava Juda.

14 La palou ina Fenamo, na Yesus a laak xe la tang lifu lotu e fefepitaa. 15 A mu matalava Juda ri ipul e ri kuus, “A mataa aanabe', piau taa mataa fe fapitie, bo? E malaafaa nane fo siak a texaasan aapave?”

16 E na Yesus a sui nari, “A fepitaian aanabe' a pife mo siak taasaxa mo sina Saxa aava fo fengau. 17 Layaan ta mataa a buk usi a vilaana sina Saxa aave, i taa texaas sena fufuna fepitaian aanabe', tamo fo savat sina Piran o tamo nenia, ne ferawai lapaana gutan siak fatak. 18 A mataa aava taxa ferawai lapaana gutan sina fatak nane buk siak fati a isina xa; taasaxa nane aava buk siak fati a isina Saxa aava fenge, nane ve, a mataa ina tuunayan e piau ta lalosaat fe waan sina. 19 Na Moses fo tavai nami pana mu vuputkai, bo? Taasaxa piau ta saxa simi fe usi fatak a maana vuputkai. Xenaso mi taxa lo tafang pana punuxau?”

20 E mu rabuna pave ri suie, “Ai, a masalai fo vao nano. Nase' taxa rao i punuk nano?”

21 Na Yesus a xuus nari fulaa, “A toxan a saxa faisok ne fo vile la Yaan ina Fangaafusan e mi taxa lo lamon fatateak lunai sena. 22 Na Moses fo fapiti nami pana vilaana ina vuputuk (taasaxa pife savat si Moses, a savat paamua sina mu butaara ti kavai) e a vilaana aanabe' nami vaxa mi fuuna vile la Yaan ina Fangaafusan. 23 Tamo mi taa putuk a lak la Yaan ina Fangaafusan talo mi taa pife faasaal sena vuputkai si Moses, xenaso mi taxa marala sega layaan ne vil faroxoi xapin a saxa mataa la Yaan ina Fangaafusan? 24 Muta lo tiis a maana mo pana xakaaluman mon taasaxa lamon faroxoie e tiis faxaradaxe.”

25 Lavaxa, saxano rabuna pe Jerusalem ri fefiai malaan, “A saxa aanabe' mon ve, a mataa aava ri taxa tafang pana punuxaana, bo? 26 Taasaxa kaalum, nane taxa ferawai la matavas e ri piau ta vapaling xena suiaana. A fexaxaas a mu matalava sitaara ri masam o nane a Mataa Failai? 27 Taasaxa taara texaas sena fufubina sina mataa aanabe' e layaan a Mataa Failai i taa savat, piau ta mataa i taa texaas sena fufubina sina.”

28 Layaan na Yesus taxa fepitaa pe lana tang lifu lotu nane xukulai, “Aang, mi texaas sega e mi texaas sena fufubina siak. Taasaxa ne pife filimaan lapaana gutan siak fatak. Nane aava fo fengau, nane ve a tuunayan e nane xo, mi vungut sena. 29 Nenia, ne texaas sena senaso ne savatmaan ti la bina sina e nane fo fengau.”

30 Sena ferawaian aanabe' rao ri pise taasaxa piau ta mataa fe tawe senaso a yaan sina pife savat lunai. 31 A mu rabuna xaves lana malila, ri namkai sena e ri kuus, “Layaan a Mataa Failai taa savat, i taa vil a maana fakalimaanan xaves sena mataa aanabe'?”

32 A mu Ferasi ri langai sena maana mo a malila ri taxa fefinaas pana. E voxo a mu memai priis e mu Ferasi ri feng a mu sisiak, a rabuna ina kaalum votai siri xena pise.

33 Na Yesus a kuus, “Ne taa waan xuvul pami famodak fulaa lunai e mui ne taa paan xe sina aava fengau. 34 Mi taa sengau taasaxa mi taa pife tinginau e la bina ne taa taagul lana mi pife fexaxaas sena savat pave.”

35 A mu Juda ri fefiaian nari xa, “Ai, a mataa aanabe' rao i taa paan xe faa e taara pife fexaxaas sena tingine? Naak nane taa falet xe la mu bina sina mu tautaara aava ri taxa taagul la palou ina mu Griik, bo? I taa fe fapiti nari, mu Griik, bo? 36 A so ta malasuf ina ferawaian aanabe' sina: ‘Mi taa sengau taasaxa mi pife fexaxaas sena tinginau senaso la bina ne taagul lana mi pife fexaxaas sena savat lana’?”

37 La yaan fataxapiak ina fenamo aanabe' ve, a yaan molava ina e na Yesus a tigina e kuus, “Nase' ta mataa taxa ma'iu, a fexaxaas i taa filimaan xe siak e num. 38 Nase' ta mataa namkai sega malaan sena xakalayan fo kuus: a raarum ina toyan i taa liu savat ti pe la xunus ina.” 39 Nane ferawai malaan, sena Vovau Xaradak senaso a mu rabuna aava ri namkai se Yesus, ri taa siak a Vovau Xaradak. Taasaxa la yaan naang, la yaan ina ferawaian sina, a Vovau Xaradak a pife lisanan lunai senaso na Yesus pife siak a maasaxan sina lunai e pife laak xe la bina sina Piran.

40 Layaan a saxano rabuna la palou ina malila ri langai a ferawaian aanabe' ri kuus, “Ai fatak ve, a mataa aanabe' ve a saxa Matalava ina Kuus Fatuxai.”

41 E xasanofuna ri kuus, “Nane ve a Mataa Failai.”

Taasaxa saxanofuna ri fefiai, “Naak a Mataa Failai i taa pife savat ti Galili.
42 A xakalayan sitaara a kuus malaan: a Mataa Failai i taa savat ti lana pabung si Devit e Betlihem ve a bina si Devit, bo?” 43 E voxo a malila ri toxan a lamonan taragua sena. 44 Saxanofuna ri vubuk pise taasaxa piau ta mataa fe timin ta ma laa'ui xuluna.

45 Nari, mu rabuna ina kaalum votai, ri ulaa xe sina mu memai priis e mu Ferasi e ri fin nari, “Ai, xenaso mi pife lisanmaan na Yesus?”

46 E mu rabuna ina kaalum votai ri sui nari, “Piau ta mataa xa fe ferawai malaan sena mataa aapave taxa ferawai.”

47 E mu Ferasi ri xuus nari, “E nami sait nane fo familung nami? 48 Naak, ta saxa matalava sitaara o ta saxa Ferasi fo namkai sena? Piau! 49 Taasaxa malila aanabe' ri pife texaas faroxo sena Vuputkai sitaara e nari xo, a kuus fatutulan taxa waan xuluri.”

50 E na Nikodimaas aava fo savat xe si Yesus paamua, nane a saxa siri e a xuus nari malaan, 51 “Naak, a vuputkai sitaara i taxa timin a fakasanaman xuluna mataa paamuina yaan i taa savat la tiisan, la yaan i taa kuusan fasavat a so ta mo nane taxa vile?”

52 E ri suie, “Nano vaxa, nano ti Galili, bo? Kaalum lana xakalayan sitaara e no taa masam o piau ta mataa ina kuus fatuxai i taa savat ti pe Galili.” 53 
Saxanu lagasai ti kavai paaliu ri piau ta paferawaian aanabe' lana. (Jn 7:53-8:11)
[E nari xapiak ri ulaa xe la lifu siri saxa saxa.

Copyright information for `LEU