aTln 20:12-16; Vpt 5:16-20

Mark 10

A Fiaian Pana Tamaian

Mt 19:1-9; Lk 16:18

E na Yesus a tamasiak pe Kapanam e fe paan xe pul Judia, e mui ri sivi xe paa la Raarum Jordan. E a malila ri maa savat fulaa sina pave e nane fapiti fulan nari.

E saxano Ferasi ri maa savat sina senaso ri vubuk tafange pana saxa vuputkai sina mu Juda. E voxo ri fine, “A roxo tamo a saxa mataa i taa ta'ulan tapin a tefin sina?”

E na Yesus a fin nari, “Lana vuputkai si Moses a kuus malaafaa?”

E ri sui a fiaian sina malaan, “Na Moses a kuus turoxo pana mataa i taa xalei a lagasai ina fataxapin a tamaian sire. E a fexaxaas sena feng fa'uli na naasana xe la pabung sina.”

E na Yesus a xuus nari, “Na Moses a xalei malaane senaso a xunus imi a tateak malaan sena mu bumi. Taasaxa la tangpat, a Piran a vesan a mataa e a tefin e re waan faxuvul. E voxo a mataa i taa ta'ulan a lifu si ninana e tamana e nane e a tefin sina re taa waan faxuvul malaan sena saxa. Re taa pife waan fepatok e a Piran i taa kat nare malaan se' re saxa mon. E voxo a so ta mo a Piran fo vil faxuvule, a pife fexaxaas sen' ta saxa mataa taa vil fepatoxan fulane.”

10 Mui fulaa lana lifu, a mu fefeng ri fine pana ferawaian aanabe'. 11 E nane xuus nari, “Nase' i taa ta'ulan tapin na naasana e mui a tamai sina saxa tefin patak, i taxa kawaasan na naasana lana vilaana ina tamaian. 12 E tamo ta saxa tefin i taa ta'ulan tapin na lavana e mui a tamai sina saxa tomexaan patak, nane sait vaxa, i taxa kawaasan na lavana lana vilaana ina tamaian.”

Na Yesus Xuvul Pana Mu Rafulak

Mt 19:13-15; Lk 18:15-17

13 E a mu rabuna ri savat pana mu rafulak siri xe si Yesus senaso ri vubuk i taa tao faroxoi nari. Taasaxa mu fefeng si Yesus ri marala e ri tivotan nari. 14 Layaan na Yesus a xalum a mu fefeng sina ri taxa vil malaane nane a maraleian nari e xuus nari malaan, “Siakmaan a mu rafulak xe siak. Muta tivotan nari! Ri taxa waan lana fatataganan sina Piran. 15 Tuuna paaliu ne xuus nami, nase' ta mataa i taa pife lamon pana laak lana fatataganan sina Piran malaan sena mu rafulak aanabe', i taa pife laak lana.” 16 E nane xel a mu rafulak xe sina e yot nari e tao faroxoi nari. E nane fenung xe sina Piran o i taa tavai a rafulak aanabe' pana roxoyan.

A Fiaian Pana Toyan Vulai

Mt 19:16-30; Lk 18:18-30

17 Layaan na Yesus tangpat pana sangas fulaa a saxa mataa a falamaan xe sina e maa turung la nona e fine, “Mataa roxo ina Fepitaa, ne taa vil a so xena siaxaana toyan vulai xe vulai?”

18 E na Yesus a sui a ferawaian sina malaan, “Senasou no xaliau pana mataa roxo? Piau ta saxa mataa fe roxo, a Piran sang mon a roxo! 19 Nano, no texaas sena mu vuputkai si Moses:

Muneta punuk a mataa
Muneta xaakaam soxotan a tefin sina xasa mataa
Muneta fenau
Muneta kawaasan a isina saxa mataa
Muneta bitaana mataa
Suai se ninaam e tamaam” a 
20 E nane xuus na Yesus, “Ne fo faxa'usi a maana vilaana aanabe' ti la yaan ne taxa lak modak.”

21 E na Yesus a xalume e vubuxane e xuuse, “No taa vil a saxa mo lunai; falet e no fe faasot pana maana mo xapiak siim e no taa tavai a mu valagof pana fafanaian xapiak siim. E mui filimaan xe siak e no usiau. Tamo no taa vil malaane no taa toxan a maana mo xaves laa'ui la bina sina Piran.”

22 Layaan a mataa aanabe' a langai a ferawaian si Yesus a vilauna kanamsaat paaliu senaso nane toxan a maana mo xaves e maana xavala sait. E voxo nane falet pana mamaxusan molava paaliu.

23 E na Yesus a kaalum xolai e a xuus a mu fefeng sina, “A lagaf paaliu xana mataa aava toxan a fafanaian xaves xena laak lana fatataganan sina Piran.”

24 E a mu fefeng sina ri ipul pana ferawaian aanabe' taasaxa na Yesus a sui a fiaian siri e kuus fulaa, “Kamu rafulak, a laaxan xe lana fatataganan sina Piran a mo lagaf paaliu. 25 Naak a malui sena vio xena laak la valof ina matana maiyang sena mataa aava toxan a fafanaian xaves xena laak xe lana fatataganan sina Piran.”

26 E nari, ri ipul faagut paaliu e ri fine, “Nase' voxo fexaxaas sena laak lana fatataganan sina Piran?”

27 E na Yesus a xalum nari e kuus, “A mataa sang mon pife fexaxaas taasaxa xuvul pana Piran a maana mo xapiak a fexaxaas. Senaso a Piran sang mon a fexaxaas sena vilaana maana mo xapiak.”

28 E na Pita a kuus malaan, “Ai, nemaam, maam fo ta'ulan a maana mo xapiak simaam e maam taxa usi nano.”

29 E na Yesus a sui a ferawaian aanabe', “Ne kuus tuuna, nase' ta mataa i taa ta'ulan a lifu sina e i taa ta'ulan a vasaana o tina o ninana o tamana o mu rafulak sina e i taa ta'ulan a bina sina o xavala sina e i taa ta'ulan a maana mo xapiak soxotau e xana Lagasai Roxo; 30 a mataa aava vil malaane, i taa siak a maana mo xaves paaliu la yaan aanabe' e vaxa la maana yaan i taa filimaan sait. I taa siak a maana mo malaan sena mu lifu e fetinan e fevasaanan, e tauna e rafulak, e xavala xena uma. I taa siak a maasaxan sait xuvul pana xasano mo roxo senaso saxano rabuna ri taa vil pengan a mataa aave. Taasaxa lumui lana yaan fa'ui i taa siak a toyan vulai. 31 Taasaxa nari aava ri taxa waan paamua naboxo, lumui ri taa waan lana fataxapiak ina xakatan.”

Na Yesus A Kuusan Fasavat A Vilaana I Taa Savat Sena

Mt 20:17-19; Lk 18:31-33

32 Layaan na Yesus e a mu fefeng sina, ri taxa laak xe kol Jerusalem nane ve taxa sangas paamuin nari. E a mu fefeng ri ipul pana vilaana aanabe' e nari lamina mu fefeng ri mimilisaat e ri mataut. E voxo nane xel patak a mu yaamut sina e xuus fatexaas nari fulaa pana so ta mo i taa savat sena. 33 Nane xuus nari malaan, “Mi langai. Layaan taara taa laak saa xe Jerusalem a mu rabuna ri taa yot a Natuna Mataa e ri taa lisane xe sina mu paamua ina faxatangaana lotu. E nari, ri taa sei pana punuxaana e ri taa lisane xe sina paamua sina mu Rom. 34 A mu rabuna ina rawen ti Rom ri taa fesuaxane e ri taa xanuse. Ri taa sipe e ri taa punuxe. Taasaxa lamina yaan talatul i taa to fa'ulaa.”

A Fiaian Si Jems Nare Jon

Mt 20:20-28

35 E a ro lak si Sebedi, na Jems nare Jon re savat si Yesus e re xuuse, “Mataa ina Fepitaa, maame vubuk o no taa vil a mo aava maame taa fin nano pana.”

36 E nane xuus nare malaan, “Me vubuk ne taa vil a so xaame?”

37 E re fenung malaan, “Maame vubuk o maame taa nai la vena nai Piranan siim xuvul pama, saxa la pamuaan e saxa la paxaiya.”

38 Taasaxa na Yesus a xuus nare, “Name, me pife texaas sena so ta mo me taxa fiai pana. Me fexaxaas sena siak a maasaxan ne taa siaxe? O me fexaxaas vaxa sena siak a maxarafan ne taa siaxe?” 39 E re kuus malaan, “Nemaame, maame fexaxaas.” E na Yesus a xuus nare, “A maasaxan aava ne taa siaxe, name sait, me taa siaxe. E a maxarafan aava ne taa siaxe, name sait, me taa siaxe. 40 Taasaxa pife faisok siak xena kuus turoxo pana nobina ina naian sime. Na Tamaang sang mon a fexaxaas xena faigotan a vepen xana mataa.”

41 Layaan a xasano yaamut sangafilu ri langai sena mo aanabe', ri kasalan na Jems nare Jon. 42 E na Yesus a xel faxuvul nari xapiak e xuus nari, “Mi texaas sena vilaana sina saxano memai sina rabuna, ri pi lalamon sena rabuna siri. E mu matalava sait ri taxa siak fati mon a isiri saxa saxa. 43 Taasaxa semi, i taa piau! Nase' rao i taa siak a isin lava la palou imi i taa vil fasivie xe lapia. 44 E nase' rao i taa tigina paamua semi i taa sisiak simi xapiak 45 senaso a Natuna Mataa pife savat talo a rabuna taa sisiak sina, piau! Nane savat xena xavang a rabuna e xena tavai a malila pana toyan sina. A maatan sina i taa faroxoi a mu rabuna xapiak.”

Na Yesus Nare Baatimeas

Mt 20:29-34; Lk 18:35-43

46 E na Yesus xuvul pana mu fefeng xo ri fe savat pe Jeriko. E layaan ri ta'ulan na Jeriko xena laak xe kol Jerusalem a malila ri falet xuvul pari. E saxa mataa piif, a isina na Baatimeas a lak si Timeas, i taxa nai fenung pana faat la itina salan. 47 Layaan na Baatimeas a langai o na Yesus ti Nasaret taxa filimaan faasilak, nane xukulai faagut malaan, “Ai, Yesus, Lak si Devit, muluxau!”

48 E a rabuna xaves ri pebukane o i taa nai kasam. Taasaxa nane pe xukulai faagut fulaa saa malaan, “Ai, Lak si Devit, muluxau!”

49 E na Yesus a tigina e kuus, “Xelmaane.”

E a rabuna ri xele e ri xuuse, “Faamamaas, tamasiak, senaso nane taxa xel nano.”
50 E a mataa piif aave a tapin a marapi ina vupungan sina e tamasiak fataapus e falet xe si Yesus.

51 E na Yesus a fine, “No vubuk ne taa vil a so xaanum?”

E a mataa piif a xuuse, “Ai, matalava ne vubuk kaalum fulaa.”

52 E na Yesus a ferawai xe sina, “Falet, a namkaian siim fo vil faroxoi nano.” E a mataa aave a fexaxaas sena kaalum e nane usi na Yesus.

Copyright information for `LEU