Matthew 14

Na Herot A Patal Tapin A Putu Jon Ina Fasufan

Mk 6:14-29

Lana yaan aave na Herot taxa paamuian a mu bina pe Galili e a langai pana maana mo na Yesus taxa vile e a kuus xe sina mu rabuna faisok sina, “Nane toxan a gutan xena vil a maana mo fa'ipul senaso nane ve na Jon ina Fasufan aava to fa'ulaa ti la maatan.”

Na Herot a lamon malaanabe' senaso paamua nane fo xuus a mu rabuna sina o ri taa tao na Jon e pis fawaane la bina ina vipisan. Nane vil malaane senaso a tamai si Herodias aava naasa tina, na Filip. E na Jon ina Fasufan fo xuuse, “Pife roxo no taa tamai si Herodias.” Na Herot a buk punuk na Jon taasaxa piau. A mataut senaso a mu Juda ri lamon o na Jon ve a mataa ina kuus fatuxai.

Taasaxa layaan na Herot xo a toxan a matafanganai sena yaan ina luluuxan sina, nane punuxe. A savat malaanabe': a lak tefin si Herodias a tia faamamaas la matana rabuna pave e na Herot a faamamaas paaliu sait e nane kuus fanai xe sina malaan, “Ne kuus tuuna, ne taa tavai nano pana so ta mo no taa finau pana.” Na ninana lak a xuuse pana so ta mo i taa fin na Herot pana, e nane kuus, “Tavaiau monabe' mon, pana putu Jon ina Fasufan xuluna ‘plet’.” Na Herot a kanamsaat, taasaxa nane fo kuus fanai la matana rabuna pave la matafanganai e voxo a xuus a rabuna faisok sina o ri taa tavai a tefin aave pana vubuxanan sina. 10 E voxo a feng a rabuna sina e ri fe patal tapin a putu Jon la bina ina vipisan. 11 E ri lisanmaan a paat aave xuluna ‘plet’ e tavai a lak tefin pana e nane lisane xe si ninana. 12 A mu rabuna si Jon ri maa yaas tapin a vipin sina e ri fe xaafane. E mui ri fe xuus na Yesus pana.

Na Yesus A Fafangan A Rabuna 5,000

Mk 6:32-34; Lk 9:10-17; Jn 6:1-13

13 Layaan na Yesus a langai se Jon, nane xawas xuluna xaati e ta'ulan a bina aave e fe paan xe la xobingil. A mu rabuna ri langai pana faletan sina e ri ta'ulan a mu bina siri e ri sangas usie. 14 Layaan na Yesus a du ti xuluna xaati, nane xalum a malila molava e a muluk faagutan nari e a vil faroxoi nari aava ri giis.

15 La leaaf a mu fefeng xo ri maa savat sina e ri xuuse, “Faasilak a ngaas i taa rul e piau ta bina ina maraan fanganan nabe'. Feng tapin et nari talo ri taa laak la nu bina faasilak xena maraan fanganan pari xa.”

16 Na Yesus a sui nari, “A roxo ri taa pife falet xolai, nami xa mi taa fafangan nari. ” 17 E ri suie, “Maam toxan a fomirak bret pama e ro din mon.”

18 E nane xuus nari, “Lisanmaane.” 19 E a xuus a mu rabuna o ri taa nai su' lapia e nane tao a fomirak bret e ro din aave e kaalum xe laa'ui la xunavata e kuus faasiroxo xe sina Piran pana. Nane viak a mu bret e tavai a mu fefeng sina pana e nari, ri tavai a mu rabuna pana. 20 E a mu rabuna xapiak ri fangan e ri femaasi. E mui a mu fefeng sina ri faxuvul a maana xavil ina fanganan e ri tifi a maana bi titifai sangafilu saxa pana taragua pana. 21 A xakatan ina mu tomexaan aava ri fangan, a faasilak 5,000 e maana lutefin xuvul pana mu rafulak vaxa ri fangan sait.

Na Yesus A Sangas Xuluna Laman

Mk 6:45-51; Jn 6:15-21

22 E mui na Yesus a xuus a mu fefeng sina o ri taa xawas xuluna xaati pave e ri taa falet paamuine xe la xasa paxasing ina Laman Galili e nane xa a feng tapin a mu rabuna.

23 E layaan a mu rabuna ri fo falet, na Yesus sang mon a laak xuluna put xena fenung. E layaan a bina xo suk na Yesus sang mon taxa waan 24 taasaxa a xaati aave taxa waan lasuun sena gun. A reref taxa fiit faagut e a tof taxa pitai xuluri.

25 La paanen lolof na Yesus a sangas laa'ui xuluna laman e fe savat siri. 26 Layaan ri xalume i taxa sangasmaan xe siri laa'ui xuluna laman, ri mataut e ri xukulai faagut e ri kuus, “A rongan ve!”

27 E fataapus na Yesus a ferawai xe siri, “Fagut nami xa, muta mataut! Nenia move.” 28 E na Pita a kuus, “Memai, tamo nano fatak, xelau xe siim xuluna laman.”

29 E na Yesus a xuuse, “Man!” E na Pita a taladu xuluna xaati e sangaset xe si Yesus xuluna laman. 30 Taasaxa, layaan a xalum a reref taxa fiit faagut, nane mataut faagut e tangpat pana du lana laman e a xukulai, “Memai, fakaxupau!”

31 E fataapus na Yesus a talangai xe sina e tao fatateaxe e a kuus, “A namkaian siim a modak temasaat! Xenaso no lamon maranga?”

32 E nare xapiak re xawas xuluna xaati e a laman a mararol. 33 E mui nari aava ri waan la xaati aave, ri nangus na Yesus e ri kuus, “Tuuna, nano ve no Natuna Piran.”

Pe Genasaret Na Yesus A Vil Faroxoi A Mu Rabuna Aava Ri Giis

Mk 6:52-56

34 Ri xaul patal a laman e ri fe ung pe Genasaret. 35 E a mu rabuna pave ri taraxali na Yesus. E voxo ri feng a rabuna xe la nu bina faasilak xena xel faxuvul a mu rabuna aava ri giis e lisanmaan nari xe si Yesus. 36 Ri nunge o i taa turoxoian a rabuna giis xena tao mon a xasing ina marapi ina vupungan sina e nari xapiak aava ri tawe, ri roxo.

Copyright information for `LEU