aTln 3:6
bVpt 6:5
cVlp 19:18
dYng 110:1

Matthew 22

A Ferawaian Paap Pana Fenamo Ina Tamaian

E na Yesus a ferawai paap fulaa xe siri e a kuus, “A fatataganan sina Piran a malaanabe': A toxan a paamua king aava faigot pana fenamo ina tamaian sina lak tomexaan sina. E nane fin a saxano rabuna o la yaan fatak ri taa filimaan xe lana. Layaan a maana mo fo faigotanan nane feng a mu sisiak sina xena xuus a mu rabuna aave pana yaan fatak naboxo, taasaxa ri bai filimaan.

“E nane feng a xasano sisiak sina pana lagasai aanabe' xe siri naang, ‘A fenamo a tamasiak xo; maam fo punuk a mu bulmakau e mu natuna bulmakau aava ri palak faroxo. A maana mo ina fenamo taxa waan naboxo. Filimaan xe lana fenamo ina tamaian!’

“Taasaxa nari aave ri lamon fepalauane e saxanofuna ri falet xe la lifu ina faisok siri e saxanofuna ri falet xe la uma lava siri. E xasanofuna ri yot a mu sisiak aave e sip faagutan nari e punuk nari. A paamua king a marala faagut e voxo feng a mu rabuna ina rawen sina xena kawaasan a mu rabuna ina ngaapunuk e faram a bina siri.

“E mui a xel faxuvul a mu sisiak sina e kuus xe siri, ‘A maana mo fo faigotanan naboxo, taasaxa nari aava ne fo fin nari pana filimaan xe lana, ri pife roxo xena filimaan. Lavaxa, naboxo falet xe la mu salan lava lana bina e fin nase' ta rabuna mi tingin nari xena laak lana fenamo siak.’ 10 E voxo a mu sisiak aave ri falet xe la bina e faxuvul a mu rabuna xapiak aava ri tingin nari xena laak la fenamo, nari aava ri roxo e nari aava ri saat. E a lifu ina fenamo a bas pana rabuna.

11 “Taasaxa layaan a paamua king a falet xena xalum a mu rabuna aava ri fo filimaan, a xalum a saxa aava pife mawas pana marapi roxo. 12 E a kuus xe sina, ‘Fesing, no pife mawas pana marapi roxo xena fenamo ina tamaian, xenaso no taxa waan iau?’ Taasaxa mataa aave a nai kasam senaso piau ta fufuna.

13 “E a paamua king a xuus a mu rabuna ina sisiak la fenamo, ‘Pis a mana e kana e tapine xe lamalei la suk.’ Pave a mu rabuna ri taa taangiis faagut e faxakengat a fari.”

14 E na Yesus a fataxapin a ferawaian sina malaan, “A Piran a fin a mu rabuna xaves o ri taa filimaan xe sina taasaxa siak fati a nutuvaat mon.”

Fepitaian Sena Maraanaana Taakis Si Sisaa

Mk 12:13-17; Lk 20:20-26

15 A mu Ferasi xo ri fexuus kasam pana malaafaa ri taa fulung na Yesus pana fiaian siri. 16 E ri feng a saxano fefeng siri xuvul pana saxano rabuna aava ri xali nari pana mu rabuna si Herot, xe si Yesus. A rabuna si Herot ri vubuk rao a mu Rom ri taa paamuian nari. E ri favupuule, “Mataa ina Fepitaa, maam texaas o nano, no ferawai tuuna. No fepitaa pana tuunayan ina salan sina Piran. E no pife lamon faaxaves pana lamonan sina xasanofuna senaso no lamon fepalauan a lavayan sina mataa. 17 E voxo, xuus nemaam pana lamonan siim. A vuputkai sitaara a turoxo o taara taa maraan a taakis aava paamua lava ti Rom a ferawai pana o piau?”

18 Na Yesus fo texaas sena lamonan saat siri e a kuus, “Nami mu xalema maranga! Xenaso mi rao mi fulungau? 19 Faxalitau pana faat aava mi maraan a taakis aave pana.” E ri lisan a faat aave xe sina. 20 E nane fin nari, “A vavese' e a isise' taxa waan xuluna faat aanabe'?” 21 E ri suie, “A paamua lava ti Rom.”

E na Yesus a kuus xe siri, “Lavaxa, tavai a paamua lava ti Rom pana maana mo sina e tavai a Piran xo pana maana mo sina.”
22 Layaan ri langai a mo aanabe' ri ipul faagut e ri ta'ulane e ri falet fepatok.

A Maana Fiaian Pana To Fa'ulaian Ti La Maatan

Mk 12:18-27; Lk 20:27-40

23 La yaan naang, saxano Sedusi aava ri pife namkai o a rabuna ri taa to fa'ulaa ti la maatan, ri filimaan xe si Yesus e ri kuus, 24 “Mataa ina Fepitaa, na Moses a kuus, ‘Tamo a mataa a maat e piau ta rafulak, na tina i taa tamai sina tefin nakmaal aave xena fasavat a rafulak xa tina aava fo maat.’ 25 A toxan a mu fetinan pisiguak ri waan la palou imaam. A lak tuaan fo tamai e maat e piau ta lak e voxo na tina a tamai sina tefin nakmaal aave. 26 A savat malaan se tina mui e mui lamina fefexaxaas a fataxapiak. Nari xapiak ri fo maat. 27 E lumui lamiri a tefin vaxa a maat. 28 Lana yaan ina to fa'ulaian a tefin aave i taa tefin sise'? Nari pisiguak ri fo tamai sina.”

29 Taasaxa na Yesus a sui nari, “Nami, mi fo milung faagut sena to fa'ulaian ti la maatan! Mi pife texaas faroxo sena Xakalayan Taap o sena gutan sina Piran. 30 Layaan a mu mamaat ri taa to fa'ulaa, a mu rabuna, a lutefin e mu tomexaan xapiak, ri taa taagul malaan sena mu angelo la xunavata; ri taa pife tamai. 31 E tamo nami, mi lamon maranga sena rabuna ri taa to fa'ulaa ti la maatan naak mi pi xakaat sena so ta mo a Piran a kuus pana lana Xakalayan Taap sina. Nane kuus, 32 ‘Nenia ve a Piran aava na bumi, na Abrahem, Aisaak e na Yaakop, rutul lotu xe sina.’ Nane ve a Piran sina mu rabuna aava ri taxa to, pife siri aava ri maat.” a 

33 E layaan a malila ri langaie ri ipul faagut sena fepitaian sina.

A Vuputkai Pelalava

Mk 12:28-31

34 Layaan a mu Ferasi ri langai o na Yesus fo fakasam a mu Sedusi ri falet xe sina 35 e saxa mataa ina fepitaa pana vuputkai siri a tafange pana fiaian 36 malaan, “Mataa ina Fepitaa, a so ta fefasaian lana vuputkai a pelalava?”

37 E na Yesus a suie, “Mi taa vubuxan xasingit a Memai aava Piran simi pana xunus imi, pana lamonan xapiak simi e pana vubuxanan xapiak simi.’ b 

38 A fefasaian aanabe' a pelalava. 39 E a saxa lamina a malaanabe': ‘Mi taa vubuxan xasingit a xasanofuna malaan se' mi vubuxan xasingit nami xa.’ c 

40 A ro vuputkai aanabe' re fufuna maana mu vuputkai si Moses e a mu fepitaian sina mu rabuna ina kuus fatuxai.”

A Fiaian Pana Mataa Failai Sina Piran

Mk 12:35-37; Lk 20:41-44

41 Layaan a mu Ferasi ri taxa waan faxuvul lunai, na Yesus a fin nari, 42 “Mi lamon malaafaa sena Mataa Failai? Na Natuse'?” E ri xuuse, “Na Natu Devit.”

43 E nane xuus nari, “Senasou na Devit, layaan a Vovau sina Piran a fagute, a xalie pana “Memai” e kuus malaan:

44 “A Memai a kuus xe sina Memai siak,
nai su' la pamuaan siak
fefexaxaas a yaan ne timin a mu xaiyaas siim lapaana kaam.” d 
45 Tamo na Devit a xalie pana “Memai” malaafaa ve nane na natu Devit?” 46 Pi ta saxa a fexaxaas sena sui na Yesus e ti lana yaan aave pi ta saxa a lamon o i taa fine pan' ta fiaian fulaa.

Copyright information for `LEU