Revelation of John 11

E saxa a tavaiau pana newai ina ngangai malaan sena xariu e a modusan sina newai naang a malaan sena xipa. E saxa ling aava ne fo langaie paamua, a xuusau, “Tamasiak e no fe ngai a Tang Lifu Lotu sina Piran e a ivin ina faraaman e fakat a mu rabuna aava ri nangus a Piran lana. Taasaxa muta lamon sena nobina lamalei ina lifu lotu e muta ngaie senaso a nobina aave ve sina mu topen. E mu topen ri taa vaapaas xuluna nobina aapave e lana bina taap, na Jerusalem fefexaxaas sena fulun sangafilu talafaat pana taragua.

A Ro Mataa Fangaasik Sina Piran

E voxo nenia, ne taa tavai a ro mataa ina ferawai fangaasik siak pana gutan. E narie, re taa kuus fatuxai pana ferawaian siak fefexaxaas sena mu yaan 1260. E nare, re taa falak nare xa pana marapi ina mamaxusan.” E nare xo, a Piran taa ferawai paap sere e xali nare pana ro wai olif e pana ro mo ina tao fanei a laam. E re taxa tigina vulai la matana Piran, a Piran ina xavala xapiak. E layaan saxano rabuna rao ri taa vil pengan nare, a fata i taa savat ti la valare e i taa ram xapin a mu xaiyaas sire. Tamo ta mataa rao i famasak nare a maatan sina i taa savat malaan. E nare sait, re toxan a gutan xena kuus votan a raafui e re taa puruus votan a xavala talo raafui taa pife usan la maana yaan re taxa kuus fatuxai lapaana isina Piran nabe' la xavala. E nare, re toxan a gutan xena xul a raarum i tafe ria. Re taa fakasanam a rabuna pana giisan xaves sait. E re taa bilai malaan faxa'usi a vubuxanan sire.

E layaan re fataxapin a faisok ina ferawai fangaasik sire, a vupung saat aava savat ti lana Tang Vaa'ul i taa fevis xuvul pare e i taa sip punuk nare. E a mamaat ire taa mati lana salan ina bina lava aava Piran a ferawai paap sena e xalie pa Sodom e Isip. A bina aava punuxaan nare lana move, a bina aava rabuna fo niil fataxutan a Memai sire lana paamua. E maana rabuna xapiak ti la maana mu bina, e maana mu pabung e maana pok bina, ri taa xalum a ro mamaat ire fefexaxaas sena yaan talatul pana xavil senaso ri taa kuus votan a xaxaafaian sirie. 10 A maana mu rabuna lapia ri taa nanam sena maatan sirie e ri taa tatavai pana mo roxo xe sina saxanu fesing siri. Senaso a ro mataa aava re fuuna fakasanam a rabuna ti la xavala, re fo maat.

11 Taasaxa lamina yaan talatul pana xavil, a Piran taa lisan a reref ina toyan xe sire e re taa to fa'ulaa e re taa tigina. E nari xapiak aava ri xalum nare ri mataut fasaat paaliu. 12 E a ling lava ti la xunavata taa xel nare e taa xuus nare, “Me laakmaan!” E a vata taa yaas nare xe laa'ui la xunavata e mu xaiyaas sire ri taa falim nare.

13 Layaan re savat laa'ui a tang mara'ulia taa gis a bina talo maana fasangafiluaana lifu, ri taa poxo e a rabuna 7,000 ri taa maat senaso a mara'ulia a faagut. A maana rabuna xapiak aava ri to lunai ri taa nangus a Piran senaso ri mataut fasaat paaliu.

14 A fataraguiaana tang lagafan ina fakasanaman fo taxapus xo e naboxo a fatalatulaana faasilak i taa savat.

Paamuina Lagafan Fataxapiak A Maana Mo Lana Xunavata Ri Nangus A Piran

15 E a fapisiguakaana angelo a piif a tafiu sina e saxanu ling laa'ui lana xunavata, ri faabarak e ri kuus malaan:

“A Piran narie Mataa Failai Sina, re waan Matalava e Piran Tuuna xuluna xavala. E nare, re taa piran xuluna vulai, vulai!”
16 E nari mu matalava sangafilu taragua pana talafaat aava ri nai xuluna mu ivin lava siri la nona Piran, ri bukaak e piturung e ri nangus a Piran. 17 Ri kuus malaan:

“Nano, no Piran aava toxan a maana gutan,
no matalava ina maana mo fo taxapus e a maana mo taxa waan lunai;
maam kuus ‘a roxo paaliu’ senaso nano xo, no fo siak a maana gutan siim
e naboxo no taxa piran pana gutan molava paaliu.
18 A mu rabuna sina maana paamua la pia, ri marala faagut
taasaxa a yaan lava ina maraleian siim fo savat.
Naboxo a yaan siim ina tiisaana mu rabuna aava ri fo maat, fo savat.
E no taa tavai a rabuna siim pana roxoyan,
a mu rabuna aava sisiak siim e mu yaamut,
nari matalava e nari valagof,
nari aava ri suai sena isaam, no taa tavai nari xapiak pana roxoyan.
Taasaxa nari mu rabuna aava ri vil pengan a xavala, no taa vil pengan nari.”
19 E mui a Tang Lifu Lotu sina Piran pe la xunavata a talakas e a Mo Tawaane Taap aava waan lana Nobina Taap Xasingit, a savat la matavas. E a mo talatul a savat: a yaamit xaves xuvul pana vabarak e maana mo aava ri felingai ti lasuun. E a mara'ulia a gis a maana mu bina e a faat ‘ais’ a poxo xuluna xavala.

Copyright information for `LEU