Revelation of John 5

A Fomirak Buuk Pana Ferawaian Lava

E lana pamuaan sina Piran aava taxa nai xuluna ivin aapave, ne xalum a saxa buuk. E a buuk aave a toxan a xakalayan lana e xuluna mina e ri vulute pana vulut pisiguak. E ne xalum a saxa angelo tateak e nane a faabarak malaan, “Nase' a fexaxaas sena kas a buuk aanabe' e pak tapin a vulut sena?” Piau ta mataa lana xunavata o xuluna xavala o lapaana xavala a fexaxaas sena kas a buuk aanabe' e pak tapin a vulut sena. E nenia, ne taangiis faagut senaso piau ta mataa a fexaxaas sena kasaana o kaalum lana. Taasaxa saxa matalava a xuusau, “Muneta taangiis! Kaalum, na ‘Laion’ ti la pabung si Juda aava xuxul si Matalava Devit, nane fo fa'onam a mu xaiyaas sina; nane fexaxaas sena kasaana buuk aave pana vulut pisiguak.”

A Natuna Sipsip

E la palou ina ivin lava aava fakaliuan pana mu mo to talafaat e pana mu matalava, ne xalum a Natuna Sipsip aava kaalum malaan sena fo punuxan. E nane toxan a tun pisiguak xuluna putuna e toxan a mata pisiguak sait. A mu matana aave ri mu Vovau pisiguak sina Piran aava nane fuuna feng nari xena falim a maana mu rabuna xapiak xuluna xavala xena texaas sena so ta mo ri taxa vile. E nane fe siak a buuk ti lana pamuaan sina Piran aava nai xuluna ivin lava. Layaan nane fo siaxe, a mu mo to talafaat xuvul pana mu matalava sangafilu taragua pana talafaat, nari xapiak ri poxo bukaak xe la nona Natuna Sipsip. E nari saxa saxa, ri toxan a mo aava ri xalie pana ‘haap’ e ri toxan a ‘plet gol’ pana vulut i taxa fasavat a vubun pana lasan roxo. A lasan ina vulut aave a fakalimaan a fenungan sina mu rabuna aava ri namkai.

A Mu Yanganan

E ri taxa yangan a yanganan fa'ui aava malaan:

“Nano, no fo punuxan e voxo
nano, no fexaxaas sena siak a buuk aave e
pak tapin a vulut aava vulut votanan pana.
No fo maraan a maana rabuna xana Piran pana maatan siim,
a rabuna xaves ti la maana mu bina, ti la maana pok bina, ti la maana buk rabuna e ti la maana nobina xapiak xuluna xavala.
10 E no bur nari xena famemai nari e voxo ri taa faxatang a lotu sina Piran.
E ri taa paamuian a rabuna nabe' la xavala.”
11 E nenia, ne kaalum saa fulaa e ne langai a ling ina mu angelo xaves paaliu aava ri fakaliuan a ivin lava e nari mu mo to talafaat e mu matalava. E ri xaves temasaat paaliu; no pife fexaxaas sena kataan nari. 12 E ri kel faagut malaan:

“A Natuna Sipsip aava fo punuxan, a fexaxaas sena siak a vepen pila'.
Tavaie pana maana mo xapiak: a fafanaian, texaasan, gutan, suaian, malangan e a naangusan.”
13 E mui ne langai a maana mo xapiak aava waan laa'ui la xunavata o waan lapia xuluna xavala o lapaana xavala o lana laman, a maana mo xapiak ri kuus malaan:

“Naangusan e suaian e malangan e piranan, nari xapiak
ri sina aava taxa nai xuluna ivin lava e sina Natuna Sipsip.
E maana mo aanabe' ve, ri taa sire sang mon vulai, vulai.”
14 E a mu mo to talafaat ri kuus, “A tuuna paaliu!” E nari mu matalava ri bukaak e ri nangus a Piran.

Copyright information for `LEU