Revelation of John 7

A Rabuna 144,000 Ti Israel

E mui ne xalum a mu angelo talafaat ri taxa tigina la xasing ina xavala; saxa pe paa, saxa pe kol, saxa pe puaa e saxa pe pul. E nari, ri taxa tao fati a maana reref pave talo a reref taa pife fiit xolai la xavala o la laman e pife fexaxaas i taa figilis ta saxa wai. E ne xalum a xasa angelo fulaa a savat ti paa. A angelo naang a toxan a mo ina fakalimaanan sina Piran aava to vulai. E nane barak xe sina mu angelo talafaat aava ri toxan a faisok ina kawaasanaana xavala e a laman pana reref. A angelo aanabe' a xuus fatexaas nari malaan, “Muta kawaasanaana xavala o laman o ta wai saxa fefexaxaas maam taa fakalimaan a mu sisiak sina Piran sitaara la nori saxa saxa.” E ne langai a xakatan iri aava ri taa siak a fakalimaanan, ri 144,000 rabuna ti lana maana pabung ti Israel.

Ti lana pabung si Juda, ri fakalimaan a 12,000.
Ti lana pabung si Ruben, ri fakalimaan a 12,000.
Ti lana pabung si Gaat, ri fakalimaan a 12,000.
Ti lana pabung si Aasur, ri fakalimaan a 12,000.
Ti lana pabung si Naaptali, ri fakalimaan a 12,000.
Ti lana pabung si Manaasa, ri fakalimaan a 12,000.
Ti lana pabung si Simeon, ri fakalimaan a 12,000.
Ti lana pabung si Livai, ri fakalimaan a 12,000.
Ti lana pabung si Isakaar, ri fakalimaan a 12,000.
Ti lana pabung si Sebulan, ri fakalimaan a 12,000.
Ti lana pabung si Yosep, ri fakalimaan a 12,000.
Ti lana pabung si Benyamin, ri fakalimaan a 12,000.

Ri Nangus A Natuna Sipsip

E lamina mo aanabe' ne xalum moxo a tang malila paaliu aava mataa pife fexaxaas sena kataan nari. Nari, ri rabuna ti la maana mu bina xapiak, a maana buk rabuna ti lana pabung xapiak e a maana mu pok bina xapiak e voxo ri taxa tigina la nona ivin lava e la nona Natuna Sipsip. E ri pis nari xa pana marapi pasak e ri taxa tao a paxana nunui 10 e ri xukulai malaan:

“A Piran sitaara aava taxa nai xuluna ivin lava
e a Natuna Sipsip, nare, re fufuna fakaaxupan!”
11 A mu angelo aava ri taxa tigina fakaliuan a ivin lava e mu matalava e mu mo to talafaat, nari, ri bukaak e piturung xe pe sina ivin lava e ri nangus a Piran 12 e ri kuus malaan:

“A tuuna, faamamaasan e miridingan e texaasan e naangusan
e isin lava e gutan e tateaxan,
nari xapiak ri sina Piran sitaara vulai, vulai. Pevoxo.”

Nari, Mu Rabuna Nase'?

13 E saxa matalava a xelau e fiai, “Nase' ta rabuna sang pave, ri taxa tigina pana marapi pasak? Nase' nari e ri filimaan ti faa?”

14 E ne suie malaan, “Nenia, ne vungut; nano, no texaas.”

E nane xuusau, “Nari ve, ri savat ti lana yaan saat molava la xavala. Nari saxa saxa ri fo xamak fapasak a marapi siri pana ria ina Natuna Sipsip.
15 E voxo ri taxa tigina faasilak la ivin lava sina Piran e ri xavange la maana paanaas e la maana vung sait lana Tang Lifu Lotu sina. E ri taa waan lapaana fatataganan sina saxa aava taxa nai xuluna ivin lava. 16 E ri taa pife lagai o ma'iu fulaa e a gutan ina ngaas taa pife sip nari e piau ta lagafan ina taa savat xe siri sait. 17 E a Natuna Sipsip aava taxa waan la palou ina ivin lava, i taa faxatang nari e i taa lisan nari xe la matana raarum ina toyan. E a Piran i taa saf tapin a raarum ti la matari.”

Copyright information for `LEU