aVlp 18:5
bVpt 30:14
cAis 28:16
dJol 2:3
eAis 52:7
fAis 53:1
gYng 19:4
hVpt 32:21
iAis 65:1
jAis 65:2

Romans 10

Mu fetinan, ne vubuk tuuna la xunus iga e ne fenung xe sina Piran o i taa fakaxup a mu Israel. Senaso ne ferawai xakaavang o ri faisok faagut xena fananam a Piran taasaxa ri pife texaas faroxo sena vubuxanan sina. A mu Juda ri pife masam faroxo pana vilaana ina tigina fatak sina Piran, ri buk tigina fatak pana vilaana siri xa e voxo ri pife fasivi nari xa lapaana vilaana fatak sina Piran. Ne vubuk o mi taa masam faroxo o na Krais fo savat xena vil roxol a vuputkai e voxo naboxo, nase' ta mataa a vubuk rao i taa waan xuvul pana Piran, i taa namkai se Yesus.

Lavaxa, a mu Juda ri pife masam sena salan sina Piran e ri pife masam faroxo sena fepitaian si Moses layaan na Moses a ferawai pana usiaana mu vuputkai. Nane kuus malaan:

“Nane aava usi fatak a mu vuputkai xapiak sina Piran i taa siak a toyan sena.” a 
Taasaxa, a mataa aava Piran a xalie pana ‘mataa fatak’ senaso a namkai, a ferawai malaan: “Muta xuus nami xa o ‘Nase' taa laak xe la xunavata’, senaso naak mi buk lisan fasivi na Krais aava fo sivi xo. E muta kuus, ‘Nase' taa sivi xe la bina ina mamaat?’ senaso naak mi buk siak falaak na Krais ti la bina ina mamaat, taasaxa nane fo fatatoi fa'ulian xo ti la mamaat.” Taasaxa, a mataa aava namkai, a ferawai malaan:

“A ferawaian aanabe' a waan faasilak, tuuna a waan la xunus imi e la valami.” b 
A ferawaian sena namkaian aanabe' a lagasai aava maam fuuna fepitaa pana.
A fepitaian simaam a malaan: layaan no kuus fasavat o “Yesus ve a Memai” e layaan mi namkai la xunus imi o a Piran a fatatoi fa'ulie ti la mamaat - lana yaan fatak aave a Piran i taa fakaxup nami. 10 Senaso mi tigina fatak la matana Piran layaan mi namkai la xunus imi e mi fakaxupan layaan mi kuusan fasavate pana valami. 11 Taara texaas sena, senaso a Xakalayan Taap a kuus,

“Nase' ta mataa a lisan tuunei nane xa xe si Yesus aava Memai sitaara, i taa pife famangilan.” c 
12 A mu Juda e nari aava ri pife Juda ri fexaxaas la matana Piran senaso na Yesus va Memai siri xapiak e a xavang marasaxain nase' ta mataa a fenung xe sina. 13 Senaso lana Xakalayan Taap a kuus malaan:

“Nase' ta mataa a fenung xe sina Memai pana xakaavangan sina, a Memai i taa fakaxupe.” d 
14 Naak saxa i taa fiai, “A mu rabuna, ri taa fenung xe sina Saxa aava ri pife namkai sena, malaafaa? E ri taa namkai sena Saxa aava ri pife texaas sena, malaafaa? E malaafaa ri taa texaas sena tamo piau ta mataa xena kuusan fasavate xe siri? 15 E malaafaa ri taa kuusan fasavate tamo piau ta saxa xena feng nari?” Ne taa sui nari aava ri fiai malaan o a Xakalayan Taap a kuus malaan:

“A filimaanan sina rabuna aava ri lisan a Lagasai Roxo sina Piran a fafaamamaas netaara.” e 
16 Ri fo langai xo taasaxa saxanofuna ri pife turoxo pana Lagasai Roxo se Krais. E taara texaas o ri pife turoxo pana senaso na Aisaia a kuus malaan lana xakalayan sina:

“Memai, nase' fo namkai sena lagasai sitaare?.” f 
17 Lavaxa, naboxo taara texaas o a namkaian a savat la xunus ina mataa layaan a langai a lagasai e a lagasai naang ve a lagasai se Krais. 18 Taasaxa nenia, ne fiai malaan: naak a mu Juda ri pife langai a lagasai sina Piran se Krais, bo? Piau, pife tuuna, ri fo langaie xo. Lana faxuvulan ina mu yanganan, a xaleian malaan:

“A Piran a feng a fefeng sina xe la mu bina xapiak la xavala.
E a mu rabuna xapiak aava ri waan lasuun paaliu vaxa
ri fo langaie senaso a mu fefeng sina Piran ri savat siri.” g 
19 E fulaa ne taa fiai: naak a mu Israel ri pife masame, bo? Piau, ri masame. Lokavai mupiis na Moses a kuus fatuxai sena mu Juda malaan:

“Nenia xo ne taa vil fatarasui nami mu Juda sena rabuna aava ne pife xali nari pana rabuna siak. E ne taa xavang a rabuna aava ri pife Juda xena famaralei nami.” h 
20 E fulaa na Aisaia a ferawai faagut malaan:

“A mu rabuna aava ri pife Juda, ri pife sengau taasaxa ri tinginau. Ri pife fiaianau taasaxa ne faxalit nari paga.” i 
21 Taasaxa na Aisaia a ferawai sena mu Juda malaan:

“La maana yaan xapiak ne talangai xe siri xena xel nari xe siak taasaxa ri fuuna tisuiau e ri langai pesalai sega.” j 
Copyright information for `LEU