aEksodus 32:6
bWari 24:1

1 Corinthians 10

Madam salikis tiri lakou ndra-in

Aha nadu tine, jo aso-ok aha kabudon ki-iu kili hamon ta lakou marakon mene asahan ta tubu taha iri Isra-el. Udu bolo len ta Moses bwena mene, tubu taha iri marakon badeh, ado bahandra asi kandrah mene Kindrei atehei ta korohani iri. Ma iri adek bolo ndras aloh Retsi iri apou ala bilisiu. Udu bolo asi kandrah ma bolo gwa ndras doh, iri marakon anyu, eme iri asahan lau ta Moses, ma a-en hamon tan. Iri marakon aimon nyamon nane ale Malawin Mwasin ta Kindrei edeu ili niri. Iri marakon badeh a-un gwa doh mene na boto-on ta Malawin Mwasin ta Kindrei edeu ili wa-i iri. Ya iri a-un gwa udu ta bek, Kindrei mene atehei udu aliy. Ya bek nane doh leheya buku Malawi Krais, iy amwenen mene udu hawe iri ta aseben iri. Arile, Kindrei baso-ok kandriyen tiri lau mwan ma badih solo-an doh bwe. Eme iy idi iri amak, ma iri atalan laleyah are bolo kon lomale an.

Eme lakou marakon nane asahan ta leheya taha, ta anyolom, ma mada taha salikis ta iri lakou ndra-in, mene mada iri alikis ta aliy. Aha sa-en hamon tiri lau ta atehei bwili ndru-u iri i andri ili ta kindrei iri amekes na sukumada kei. I buku le buk ndrabun ndrasehek,

“Iri lau manyah ado andri aimon nyamon ma a-un gwa, ano iri mwan ala adi mana ma amekes karei hawe iri badih.” a 
Taha samekes iri kandriyen ndra-in ta karei, i buku le iri lau rayah bwena mene amekes. Eme na bolo len ari, lau nyaran bwe (23,000) badeh, amak. Jo bwalek aha samekes iri kandriyen ndra-in ta karei i buku doh. Ma taha sanone Laban, sala buku iri bwena mene amekes, eme ma mwak ndra-in ini iri rayah amak. 10 Ma aha sanunu-uh Kindrei, sala buku iri rayah bwena mene amekes, eme ma angelo ta adai lau amak eme idi iri amak. 11 Iri lakou marakon asahan tiri nane doh ta leheya eme mada taha le. Lakou marakon nane doh iri ndratorowenei ale udu bolo buk ndrabun ta leheya taha lau nane ado kada-ah. Tasah, taha ndrame mirihik ta len ta kon munyak anya kano.

12 Eme i buku ari ndramak anya, iy ales boto-on labai, iy badeh, katondrok iy kudu mwasin. Kora-on iy kataku kandra-i mara-ei. 13 Buku iri none asahan taha, aha winiya atanan, idoh mene ndrasahan tiri mwan ma badih rayah. Arile, Kindrei badeh, in hamon tiri batanau tan, ma iy winiya balelei ari none ta atisih boto-on taha bwe-en. Buku iri none asahan taha, Kindrei kameh amekes san ta aseben aha. San i buku doh: Iy kameh atadau aha abadok, ma aha winiya ales boto-on ta tawiya none doh.

Taha satudun kindrei iri amekes na sukumada kei

14 Aha kawas tek handru, aha kado ndra len ta kandriyen ta atudun iri kindrei ta wasai, iri amekes na sukumada kei. 15 Tanan taha udu aliy, eme ma jo asehek ewek taha. Aha amwenen baraseleya iri sahou tek. 16 Taha adeu wurah i ta bwesam nane taha lau ta Kindrei a-un na aliy, ma ndremenya Laban ta nyosowaniy op. Bwesam le doh tukumwi taha ala se hawe ndraye Krais. Ya, jabi ramen nane taha abo-os ta taha anya kaimon, idoh badeh, tukumwi taha ahis hawe bada Krais. 17 Handru, jabi ramen badeh, ari le. Eme ma, taha solo-an ahis badan ari le. Tasah, taha marakon badeh, aimon jabi ramen ari le doh. 18 Aha kabudon iri kandriyen tiri Isra-el bwena mene. Na len iri anya kaimon oda sipsip o bulumakau nane iri asun udu bwele-e mada koto-ok, idoh ta atukum iri marakon ame le se hawe Kindrei.

19 Aha kabudon, jo asehek sahou i buku sah? Sebwe jo asehek anya, “Salom nane iri lau adeu ili ta kindrei ta wasai, idoh lakou handru,” o, “Kindrei ta wasai iri amekes na sukumada kei, iy lakou handru ai, neh?” 20 Bwe! Idoh wasai handru. Jo asehek i buku doh: Lakou iri lau ta Kindrei bwe adeu i nyara salom, idoh iri adeu ili tiri balik. Iri badeu bala ta Kindrei bwe. Eme jo bwalek ta aha atukum ala hawe malawi iri balik. 21 Aha winiya ba-un na bwesam ta Laban ma hawe bwesam tiri malawin ndra-in i le rasan bwe. Ma aha ale winiya baimon nyamon bado bada sau ta Laban, ano bada sau tiri malawin ndra-in bwe ale. 22 Buku sah? Sebwe taha kede-eh anya kamekes ndrine Laban kandra-i nadeh? Ya, boto-on tataha kede-eh winiya boto-on tan deh? Winiyan bwe!

Len marakon taha katudun nyara Kindrei

23 Aha rayah anya, “Ahi winiya amekes lakou marakon.” Arile jo kasehek taha, lakou marakon kameh winiya baseben taha bwe. Aha rayah anya, “Ahi winiya amekes lakou marakon.” Arile lakou marakon winiya baseben taha basahan lau mwasin ta Kindrei bwe. 24 Taha satehei budon ta aseben taha le amwenen. Taha badeh, katehei budon tataha ta aseben iri rayah ja. 25 Buku ou asih oda iri lakou badu mada ba-en, iri marakon badeh, mwasin ta aimon. Ou satehei budon solo-an ta ndremenya ta oda iri lakou dah, iri ndratehei salom ta kindrei ta wasai ndrala bwele-en, o, bwe. 26 Buk ndrabun ndrasehek,

“Kon munyak ma hawe iri lakou marakon udu bwele-en badeh, ta Laban le ari.” b 
27 I buku ari ndramak iy tanan Jises bwe, iy eme ndremenya aha ta ala aimon nyamon hawen, mwasin ta aha kala. Mwasin ta aha kaimon iri nyamon marakon nane iy amekes ewek naha. Ya, aha sabudon solo-an ma satehei budon boto-on labai ta ndremenya iri nyamon dah asahan buku salom ta kindrei ta wasai ndrala aliy, o, bwe. Aha sandremenya, ndri-iy. 28 Arile, i buku ari ndramak eme asehek ewek taha ja i buku doh, “Nyamon badeh, iri atehei ndrala na kindrei ta wasai.” Badeh, aha saimon labai. Tasah, mwasin ta aha katehei budon taha kili ta ndramak nane tiye aha, eme ma aha saimon nyamon nane doh. 29 Jo basehek bawek taha anya aha amwenen kameh amekes andra-i, bwe. Jo asehek ta iy ndramak ari ja kameh atona i buku aha ndrabwidiy ndrandra-i. Arile, i buku ari ndramak bamekes iri sahou buku doh bwe, jo winiyan ta aimon iri saba lakou jo aso-ok. Ya, tasah handru jo ki-in le hamon ta budon ta ndramak ari ja, ta saba lakou iy anya jo kabeleben ta amekes? 30 Buku jo edeu wurah ili ta iri lakou nane jo aimon, tasah handru ja ndramak ari asehek sahou ndra-in eme tek ta iri lakou nane jo edeu wurah ili ta aliy? Sahou ta iy ndramak nane doh, ari moson bwe.

31 Eme ma, buku ou anya aimon nyamon, o, a-un gwa, o, amekes saba lakou ja, ou amekes iri lakou marakon doh ta atudun nyara Kindrei le ari. 32 Aha katehei budon taha kili tiri Juwis ma iri Grik, ma iri lau mwan ma badih ta Kindrei. Ma, aha samekes ari lakou ja ta amekes budon tiri taku

ili ta kandriyen ndra-in ta balik.
33 Handru, aha badeh, kamekes kandriyen i buku le jo amekes. Jo amekes iri lakou marakon doh, ta iri lau winiya aso-ok iri kandriyen tek. Jo bamekes gok ta aseben jo amwenen bwe. Jo ibo gok ta aseben lau mwan ma badih solo-an. Ya, Kindrei kameh winiyan andrei iri marakon ame hamon ja.

Copyright information for `LID