1 Corinthians 13

I buku jo kasehek sahou kili tiri lau mwan ma badih kili boho kon ta lau marakon, ma boho kon tiri angelo ale, arile jo batehei ndrinek mwasin bala tiri bwe, idah kameh jo i buku nyaro ndran, iri adi laleyah, ari moson bwe. Ma i buku jo asehek sahou buku iri propet, ma jo ndratanan ta iri budon marakon ta Kindrei ale basahan bwe le, ma iri tanan marakon rayah ale, ma i buku budon tek boto-on labai winiya tohowei iri mandrei ili rasi ja, arile, i buku jo baso-ok ma batehei ndrinek mwasin bala tiri mwan ma badih bwe, badeh, kameh jo i buku lakou ndra-in laleyah. Ano, i buku jo katehei iri lakou tek marakon kili tiri lau ndra-in, tiri lakou bwe, ma iri lau katawi jo, ma kasulumwi jo kandrakak ki-iu ki nyara salom, arile buku jo baso-ok ma batehei ndrinek mwasin bala tiri bwe, iri kandriyen tek marakon doh kameh winiya baseben se jo bwe!

Are ndramak iy aso-ok ndramak ari, ari, badeh, iy ta atondrok le ai; iy amekes kandriyen mwasin labai ta aseben ndramak ari, ari; iy ta madalikis ma lomondra ndra-in bwe, iy winiyan batudun nyaran bwe; ma iy winiyan balim aden bwe. Ta aso-ok ndramak ari, ari, iy winiya bamekes lakou laleyah bwe. Iy winiya babudon iy le bwe, ma ndrinen winiya babolosen suwi bwe. Ta aso-ok ndramak ari, ari iy winiya babudon ndra-in iri nane amekes i tan bwena bwe. Ta aso-ok ndramak ari, ari, iy winiya basekesek hawe iri kandriyen bamwenen bwe, arile iy badeh, sekesek hawe iri kandriyen mwasin ma handru. Ta aso-ok ta ndramak ari, ari, iy udu le bwese iri maha-an. Buku maha-an asahan tan badeh, iy winiyan baruwani budon tan handru bwe, iy atondrok le Kindrei ta aseben iy. Handru, iy udu le ma iy ales boto-on na len mari.

Kandriyen ta aso-ok ndramak ari, ari badeh, winiya bano bwe. Arile, sahou iri propet asehek kameh ano. Iri ndramas ta asehek boho kon randrah ja kameh ano, ma hawe iri tanan tiri lau marakon kameh ano ale. Tasah, na dah, tanan tataha tiri lakou badeh, sese le. Ma taha ale asehek sahou i buku iri propet badeh, sese le. 10 Arile, hamon kameh, iri lakou mwasin labai ja kameh asahan, ma iri lakou sese sese nane udu kada-ah kameh ano iu. 11 Sahou sokek ari i buku doh: Bwena mene jo ma nah nadu bwisik kahis, udu kala doh badeh, jo asehek sahou i buku iri nah nadu bwisik. Jo atona lakou i buku le iri nah nadu bwisik. Budon tek i buku nah nadu bwisik. Arile, udu hamon, jo asahan i ndramak awas badeh, jo ruwani kandriyen tiri nah nadu bwisik ano iu. I buku lakou ta Kindrei handru kameh eme, iri lakou sese sese le marakon doh kameh ano iu. 12 Na len dah taha anyolom iri lakou ta Kindrei asahan, arile taha bala tanan iy bala mwasin bwe. Idoh i buku taha anyolom malawi iri lakou doh ere kapa gwa. Handru, na len dah, badeh, jo tanan sese sese le tiri lakou baleu bamwenen handru bwe. Arile, udu hamon ta len dah, jo anyolom mada Kindrei handru, ma jo i tanan iy amwenen, i buku le iy ndratanan jo ndra bwena labai. 13 Kabwai, arile kandriyen ma taloh le. Kandriyen ma taloh kameh winiya bano bwe, oro kameh alih kahis le: Kandriyen ta atehei budon tataha kili ta Kindrei le ari; kandriyen ta atondrok Kindrei le ari; ma kandriyen ta aso-ok ndramak ari, ari. Kandriyen ari le udu bwele-e oro ma taloh badeh, kandriyen ta atehei ndrine taha mwasin ta aso-ok ndramak ari, ari.

Copyright information for `LID