bWari 8:6
cAisaya 22:13
dJenesis 2:7
eAisaya 25:8
fHoseya 13:14

1 Corinthians 15

Krais imek ano iy amak eme awas ja

Aha kawas tek, ma aha nadu tine, jo anya kasehek taha ja, ta aha samani iri sahou mwasin ta Kindrei mene jo ndrasehek ndrawek taha. Eme ma, aha ndratehei budon taha boto-on ndra-en hamon ta aliy. Sahou mwasin ta Kindrei le doh badeh, akohok aha ame hamon, buku aha a-en hamon handru ta sahou, jo mene ndrasehek taha. Arile, buku aha bala tanan saba lakou aha atehei budon taha in tan bwe, ma aha atehei budon taha laleyah, eme ma sahou mwasin doh baseben aha bwe.

Jo ndrasehek taha ta sahou laba tinan labai, sahou nane doh jo akohok bwena. Moso sahou nane i buku doh: Krais mene imek badeh, ta talou taha ado ta kandriyen ndra-in tataha marakon ame len, i buku le ndratorowenei udu bolo buk ndrabun ta Kindrei. Iri ahi iy ili andri bolo lek; udu bolo len ma taloh ano Kindrei mete-ei iy ja. Idoh le buku sahou udu bolo buk ndrabun ta Kindrei asehek. Krais ma mwena asahan hawe Pita, ano ja iy asahan hawe oro lau tan ma ronoh la-uh. Udu hamon ja, kane iri udu bwele-en ta ma lemenek (500) badeh, anyolom iy. Arile, eme ano kada-ah badeh, iri solo-an are kede-eh kahis, rayah ndramak. Iy ale asahan hawe Jemis, ano iy barasahan hawe oro aposel tan marakon. Udu hamon ta lau marakon ano, iy asahan eme madak amwenen. Kala doh badeh, jo i buku nah, tinen anya kedeu iy bado bada len tan amwenen bwe.
(15:8) Pol amekes sahou sokek dah ta leheya, buku sah handru, iy asahan lau ta Krais. Ma bwena handru Pol badeh, ta amekes bahun hawe Krais, ma ndraye iri lau solo-an ta Krais amou (ou anyolom udu ta Aposel 7:54-8:3). Arile, udu hamon ja, Krais leheyani iy amwenen i mada Pol (Aposel 9:1-22), eme ma, se nawin bwe, Pol asahan buku aposel handru ta Krais. Ma kandriyen tan mara-ei asahan i randrah labai ja. Kandriyen tan bwena mene ndrano ndra-au. Eme ma, Pol asehek sahou sokek dah ta leheya, i buku sah handru, iri kandriyen tan ndra-in marakon ndrano.


Jo badeh, nadu bwisik labai udu bolo iri aposel. Jo asehek i buku doh, tasah jo bwena mene amekes bahun ma adai iri lau ta Kindrei. Idoh le bwidiy, eme, udu budon tek anya, jo nadu bwisik labai ta aha aloh jo buku aposel. 10 Arile, Kindrei badeh, mwasin labai! Iy bwidi jo asahan aposel tan, ma jo udu kada-ah, ma tikisiy tan eme tek badeh, bala laleyah bwe. Jo amekes gok boto-on labai udu bwele-en ja tiri aposel tan. Arile, jo le amwenen bamekes iri gok marakon nane doh bwe. Kindrei tikisi jo, iy eme atehei boto-on eme tek ta amekes iri gok marakon nane doh. 11 Arile, buku jo amekes, o, oro aposel rayah mene amekes gok doh, ari sahou ta aliy bwe. Lakou handru i buku doh: Ahi mari kede-eh atiye sahou ari le doh. Eme ma, aha mara-ei ndratehei budon taha ndra-en ta sahou mwasin doh.

Hamon kameh iri lau marakon mene ndramak, iri kameh amak ame awas ja

12 I buku ahi aposel atiye iri sahou mwasin ta nyala Krais imek ano iy amak eme awas ja, buku sah handru lau rayah ado bolo aha asehek anya, iri lau marakon ndramak ndra bwena, iri winiya bamak bame awas ja bwe? 13 I buku iri lau doh asehek sahou handru, anya, “Iri lau mene ndramak bwena badeh, winiya bamak bame awas ja bwe;” buku handru eh, taha kasehek anya, “Krais buku aliy ale, Kindrei badeh, bamete-ei iy bwe.” 14 I buku Krais imek, ma iy bamak bame awas ja bwe, idah kameh atiye sahou ta taha doh kameh i lakou laleyah, ma budon taha handru ale winiya baseben aha bwe, ta amak ame awas ja, ma akohok koha aha ta udu le buku doh. 15 Anya i buku aliy eh, ahi ndrasahan buku iri lau ta asehek sahou wendreya ta iri lakou ale Kindrei amekes. Tasah, ahi ndrasihidi sahou mari ndrame lewan tiri lau, i buku Kindrei mene mete-ei Krais imek udu bolo lek tan amak eme awas ja. Arile, buku idoh i handru, ta Kindrei winiyan bamak lau mene ndramak bwena bwe, iy badeh, ale bamete-ei Krais bwe.

16 I buku sahou handru anya iri lau ndramak bwena, Kindrei bamete-ei iri ja bwe, mwasin, taha kasehek ki buk doh, “Kindrei badeh bamete-ei Krais udu bolo lek tan bwe.” 17 Ya, i buku sahou handru anya Kindrei bamete-ei Krais udu bolo lek tan bwe, idah kameh aha atehei budon taha in tan kede-eh winiya baseben aha bwe. Aha kameh ado ndra bolo kandriyen ndra-in taha kahis. 18 Ya, iri lau ale atehei budon tiri marakon in ta Krais, arile iri ndramak bwena, iri lau doh ndra-au laleyah. 19 Taha atehei budon tataha handru in ta Krais, ma atondrok iy ta eme hamon ta akohok taha ja. Arile, buku taha atondrok seben ma mwasin tan eme tataha na len taha are kon munyak dah le, manyah tataha bado mwasin bwe, eme ma, ndra-in tataha ja udu bwele-en labai ta ndra-in tiri lau rayah badu kon munyak dah. Ma iri katikisi taha handru.

20 Arile, bala buku doh bwe. Krais ndramak, ma idoh handru, Kindrei mene mete-ei iy eme hamon eme awas ja. Iy amak ere bwena labai ta lau marakon mene ndramak bwena, i buku nyamon badu bilin uni ma bwena. Idoh ale leheya iri mwan ma badih atehei budon tiri handru in ta Krais, iri ale kameh amak ame awas ja. 21 Sahou dah handru. Tasah, ndramak ari nyaran Adam, iy mene bwidi kandriyen ta imek asahan. Ano ja, ndramak ari, nyaran Krais, eme bwidi kandriyen ta amak eme awas ja badeh, asahan. 22 I buku doh: Iri lau mwan ma badih bwena mene ahis hawe Adam, iri marakon badeh ndramak. I buku le, iri lau mwan ma badih ahis handru hawe Krais, iri kameh amak ame awas ja, ma akohok koha iri mwasin. 23 Arile, taha marakon ado bolo lek tataha kameh amak ame awas ja, na bolo len tataha amwenen. Ma bwena handru badeh, Krais amak eme awas ja. Ano, udu ta len iy anya keme hamon ja, taha lau tan marakon, kameh amak ame awas ja.

24 Na bolo len doh kameh, iri lakou marakon kameh ano iu. Ma Krais kameh bwidi iri kabin marakon, iri lau bwele-en, iri malawin boto-on ta amekes bahun hawe Kindrei, iri marakon doh kameh ano au. Ano kameh, Krais baradeu tondrok tan barala mine taman Kindrei. 25 Tasah, Krais kameh atondrok kon marakon winiyan le Kindrei baratehei iri lau ta ato-ou kaliu barala bahandra katin. 26 Iy asahan nyekelen ta iy amekes bahun hawe iri lau ta ato-ou kaliu, ano kameh iy amekes bahun hawe imek ta akohok iy kano ki-iu ale. 27 Iri torowenei udu bolo buk ndrabun asehek i buku doh,

“Kindrei mene atehei iri lakou marakon udu bahandra tondrok tan.” b 
Eme ma, taha atanan, ta Kindrei ndratehei lakou marakon ndrala bahandra tondrok ta Krais. Arile, Kindrei le amwenen bado hawe iri lakou doh bwe.
28 Hamon kameh, iri lakou marakon ano ili le bahandra Krais, ano Nadu Kindrei atehei iy amwenen ili bahandra taman Kindrei, iy mene atehei udu bahandra tondrok ta Krais. Ma Kindrei kameh udu bwena ta atondrok iri lakou marakon.

29 Ya ndremenya tek rayah i buku doh: Sahou ta Kindrei dah kameh mete-ei iri lau mwan ma badih ndramak bwena ado bolo lek tiri amak ame awas ja. Buku sahou dah handru bwe, tasah handru lau rayah ja anyu ta aseben iri lau mene ndramak bwena? Ya, saba tanan handru iri anya kamekes? Ya, buku iri lau mene ndramak, bamak bame awas ja bwe, tasah handru lau rayah anyu ta aseben iri ja? 30 Ou anyolom ahi ale. Len marakon lau rayah anya kadi ahi, tasah ahi badeh, ta atiye sahou ta Jises Krais. Buku Kindrei winiya bamete-ei ahi bwe, tasah handru ahi akohok sisi-in ta amekes iri gok nane doh? 31 Aha nadu tine mwan ma badih, na bolo len marakon jo atona iri lau anya kadi jo kimek ki-iu. Jo asehek sahou handru! Arile, jo sekesek tinan labai ta gok mene jo amekes ta akohok aha ame hawe Jises Krais, eme ma, jo asehek iri sahou dah. 32 I buku sahou handru anya, iri lau ndramak bwena Kindrei bamete-ei iri ja bwe, mwasin taha kasehek ki buku doh:

“Abo, ndri-iy ai! Taha kaimon nyamon, ma ka-un gwa na dah; tasah na bi-i kameh taha amak au.” c 
Arile, jo ba-en hamon ta budon ma kandriyen doh bwe. Buku jo anya ki-in hamon ta aliy handru, buku sah ja jo katebelese hawe iri Epesus nane a-en hamon ta kandriyen ndra-in buku iri bondriliu? Ya, buku jo kimek laleyah, jo kameh kudu mwasin ki buku sah handru?

33 Aha sanuhun iri lau rayah awek wendreya aha. Aha ndratanan iri sahou dah: “Buku taha ka-en hamon hawe iri lau ndra-in, idah kameh iri adi kandriyen tataha mwasin iu.” 34 Aha kamani iri kandriyen lolo-ou taha ki-iu, ma budon taha kamwenen. Aha samekes iri kandriyen ndra-in ja ai. Aha kanuhun! Iri taha rayah badeh, bala tanan ta Kindrei bwe le. Jo amekes iri sahou dah ewek taha ta bwili aha kama ta iri kandriyen taha.

Bada taha udu bolo amak ame awas ja kameh i randrah labai ja

35 Sebwe lau rayah kameh ndremenya i buku doh: “Iri lau mwan ma badih iri ndramak ndra bwena ndra-au, i buku sah handru kameh iri kamak kame awas ja? Iri kameh amak ame awas ja, ya bada iri kameh ili buku sah handru?” 36 Are lau mwan o badih iy asehek sahou ale i buku doh, iy se balen bwai! Ya ou ndratanam ta atah buwa kei, i buku babosar ma bamak bwe, idah kameh nyubudon winiya bateh bame loken bwe. 37 Buwa kei nane ou tahiy, idoh bala buku iri kei hamon kameh asahan i kuhuyen bwe. Ou badeh, tahi buwan laleyah. 38 Na so-ok tan le amwenen, Kindrei edeu bada iri, amwenen ta buwa iri ari ari. 39 Bada iri lakou mulin marakon are bwele-e munyak badeh, ari randrah, ari randrah labai. Bada taha ndramak badeh, ari ai, ya bada iri lakou buku bou badeh, i randrah ja ai. Ya iri sirih badeh, bada iri i randrah ale, ma iri ni bada iri i randrah ale. 40 Bolo kandrah badeh, bada iri lakou solo-an udu aliy, ma bolo kon munyak ale, bada iri lakou solo-an udu aliy. Lomada bada iri lakou badu bolo kandrah badeh, i randrah, randrah labai, ya lomada bada iri lakou badu munyak badeh, i randrah labai ja. 41 Taha anyolom an badeh, nyasou tan randrah labai, bun nyasou tan randrah labai, ya iri ndrau anya na ben udu kandrah, nyasou tiri badeh, randrah labai. Ya, udu bolo ndrokowa iri ndrau mari, lomada iy ari ma nyasou tan, i randrah labai ta iy ari ja.

42 Kandriyen ta lau ndramak ndra bolo lek, ma lau amak ame awas ja badeh, i buku le aliy. Bada taha udu bolo lek badeh, abola, ma bada taha udu bolo lek amak eme awas ja badeh, kameh winiya bandra-i ma babola ja bwe. 43 Buku taha amak, iri ahi taha ala bolo lek, idoh lakou ari ndra-in handru. Bada taha udu bolo lek, amak ja eme awas, idoh mwasin ja. Bada taha ndramak a-eh ili bolo ndren, iy ari boto-on bwe. Bada taha udu bolo lek amak eme awas ja, badeh, boto-on labai. 44 Bada taha imek a-eh ili lek, idoh ta munyak labai. Bada taha amak udu bolo lek eme awas ja badeh randrah labai ja, idoh Malawin Ndrabun edeu kohan ili tan. 45 Iri torowenei sahou udu bolo buk ndrabun ta Kindrei i buku doh,

“Ndramak ma bwena handru badeh, Adam, iy andrei kohan.” d 
Arile Adam ari ja badeh, asahan hamon labai, iy asahan ta Malawin Mwasin ta edeu kohan handru ili ta lau marakon.
46 Koha kon munyak badeh, asahan bwena handru. Arile, koha Malawin Mwasin asahan hamon, ma iy udu bwele-en labai ja. 47 Adam ma bwena badeh, badu kon munyak. Kindrei bwidi iy badeh, na le munyak. Adam ari hamon ja badeh, badu bolo kandrah. 48 Iri lau marakon badu munyak badeh, a buku le iy ndramak nane badu munyak. Ya iri lau marakon badu kandrah kameh asahan i buku le iy ndramak nane badu kandrah. 49 Na idah ja badeh, taha ado buku le iy ndramak nane badu munyak. I buku hamon ja kameh, taha asahan i buku le iy ndramak nane badu kandrah.

50 Aha nadu tine, jo asehek amwenen ewek taha, ndramak badu munyak dah winiyan bala bolo tondrok ta Kindrei bwe, ma iy winiyan bakohok iri lakou marakon mwasin tan bwe. Ma iri lakou kameh andra-i, iri winiyan bakohok iri lakou ale winiyan bandra-i bwe.

51 Aha mari kanuhun. Jo anya kasehek sahou ari doh, lau banuhun bwena bwe, kewek taha: Idah kameh taha marakon bamak bala lek bwe. Na len Krais eme hamon ja, taha rayah kameh ado ndra loken kahis. Arile taha marakon kameh nyolom tataha i randrah ja, ma taha asahan randrah labai. 52 Idoh kameh asahan suwi labai udu bolo len ta ndrah ari eden in hamon handru. Handru, ndrah nane kameh eden, ma iri lau ndramak ndra bwena, iri marakon kameh amak ame awas ja. Ya iri kameh winiyan bandra-i ja bwe. Ya taha lau ale bamak bwe le, Kindrei kameh tubuni taha ili randrah labai ja. 53 Kandriyen tataha ta ndramak imek doh kameh winiya bado ja bwe. Kindrei kameh akahei mara-ei iu; kohan handru ta udu le buku doh kameh akohok ndrahune kandriyen ta imek nane doh. 54 Handru, bada taha kameh imek, ano abola. Arile, Kindrei kameh tubuni iy ja, ma kohan kameh udu luluwen udu le buku doh. Na bolo len doh sahou udu bolo buk ndrabun asehek, kameh asahan handru:

“Kindrei amekes bahun hawe kandriyen ta imek, ma iy idi iri kandriyen ndra-in ta imek marakon ano iu.” e 
55 “Ya ou, kandriyen ta imek, boto-on tam ta atik iri lau mene, ndraheh?” f 
56 Nyamu imek ta edeu sisi-in badeh, ta kandriyen ndra-in. Ma boto-on ta kandriyen ndra-in doh, eme ta batanau Kindrei mene atehei ili mine Moses. 57 Arile, taha kadeu wurah kili ta Kindrei. Na le boto-on ta tinan tataha Jises Krais, Kindrei amekes taha abadok, ta adi iri kandriyen ndra-in ta imek marakon kano ki-iu.

Eme ma, aha nadu tine mwan ma badih i san ta Krais, aha kabadok, ma aha kado le rasi. Tasah aha ndratanan, lahou boto-on aha amekes ta Laban kameh winiya ba-au laleyah bwe.

58 

Pol asehek ta nyala iri lakou iy abudon ta amekes

(Kalan 16)

Copyright information for `LID