aJop 5:13
bWari 94:11

1 Corinthians 3

Pol uru Apolos badeh, lohowa Krais

Aha nadu tine, aha amekes aha badeh, i buku le iri lau badu kon munyak dah. Eme ma bwidi jo winiyan basehek sahou bawek taha buku iri lau an hamon ta Malawin Mwasin bwe. Na dah, aha anya ka-en hamon ta kandriyen ta Krais, arile aha badeh, a buku iri nadu nah nyandren kahis le. Jo mene isus aha na sur kahis le, ma jo winiyan badeu naha nyamon boto-on bwe, tasah aha mene baimon nyamon boto-on bwe. Ma na idah ale, aha winiyan baimon iri nyamon boto-on bwe le. Tasah, aha an hamon ta kandriyen ndra-in ta kon munyak dah kahis. Handru, kandriyen ta ubun, ma ndrinem ibolosen ili ta nadu tinem ari ja, ma tebelese udu ndrokowa aha kahis. Eme ma kandriyen aha amekes doh, leheya i buku handru, kandriyen taha badeh, ihis kahis hawe iri lau badu kon munyak. Kili buku sah handru? Ndramak ari anya, “Jo ta Pol,” ya iy ari ja anya, “Jo ta Apolos.” Sebwe aha kede-eh an hamon le ta kandriyen badu kon munyak dah nadeh?

Aha kabudon kamwenen. Aru Apolos, aru are lau handru? Aru badeh, lohowan ta Kindrei le ta

atiye sahou tan, eme ahi ta aseben aha ta aha katehei budon taha ki-in le ta Krais. Ahi ari ari badeh, an hamon le ta gok Kindrei tiye ahi ta amekes.
Jo mene atiye sahou mwasin ndrawek taha, idoh i buku jo ndratahi buwa kei. Apolos atiye sahou mwasin ale, i buku iy eme asolou gwa ili tiri, arile Kindrei amwenen bwidi sahou doh ato-ou salin. Eme ma, are lau ta atah ma ta asolou gwa, idoh ari nyara uru bwe. Kindrei amwenen bwidi salin asahan, eme ma iy le ari nyaran udu aliy. Are lau ta atah badeh, i buku le iy ndramak ta asolou gwa i ta buwa kei. Uru kameh akohok ndramas amwenen ta gok uru ndrabwidiy. Aru Apolos badeh, ta amekes gok hawe Kindrei, ya aha badeh a buku bilin ma asiu tan.

Jises Krais badeh, ndru alih ta asiu

10 Jo in hamon ta ndramas Kindrei edeu eme tek, ma jo asahan ndramak ta tanan labai ta atah asiu, eme ma jo ndratahi ndru. Ya, iri rayah an hamon tek ame ja, tahi asiu udu bwele-e ndru doh. Arile to ari, ari kabudon kamwenen ta kandriyen ta atah asiu. 11 Tasah aha ndratanan, Kindrei ndraleheyani Jises Krais i buku ndru-u asiu alih handru. Ari ndramak ja winiyan basahan ndru ta asiu doh ja bwe. 12 Iri lau rayah atah asiu udu bwele-e ndru nane doh, iri atah na lakou boto-on i buku bek iri aloh gol o silba, iri rayah atah na bek nyikilikin sowan tinan labai, iri rayah ja atah na lakou boto-on bwe, i buku kei, rayah atah na la-u kiwi mwi, ya iri rayah atah na kaha kalom. 13 Ya gok tiri lau mari hamon kameh asahan eme lewan, ta len ta sahou ta Laban. Ma len ta sahou doh kameh asahan i buku jih. Ma jih le doh kameh none gok tiri ari ari, ma iri kameh atanan gok tiri mwasin o bwe. 14 Buku are lau tahi asiu tan udu bwele-e ndru nane doh, ma jih basulumwi asiu tan bandrakak bwe, iy kameh akohok ndramas ta gok tan. 15 Handru, buku asiu ta ndramak ta lahou nane doh andrakak mara-ei, ya iri gok ma boto-on tan kameh ano laleyah. Ma ndramak ta lahou le amwenen kameh udu mwasin sese, arile idoh i buku taha andrei iy udu bolo jih eme len.

Aha badeh, asiu ndrabun handru ta Kindrei

16 Aha marakon ndratanan ndramwenen ta aha badeh, asiu ndrabun handru ta Kindrei, ma Malawin Mwasin tan in hawe aha. 17 Aha badeh, asiu ndrabun handru ta Kindrei. Kindrei kameh amekes maha-an ili tare lau iy anya katohou asiu tan, tasah aha amwenen, asiu tan ndrabun handru.

Taha satudun nyara iri lau

18 Kora-on ari ndramak kawendreyani iy le amwenen. Buku ari mwan o badih udu bolo aha, iy in hamon ta kandriyen ta munyak dah, eme ma iy atehei budon tan i buku doh, “Tanan tek tinan labai, ma jo ere bwele-en labai tiri lau ta Kindrei rayah ja.” Mwasin ta iy katehei konan kili ta tanan badu munyak op, ma iy kameh winiyan asahan ndramak ta tanan ta kandriyen handru ta Kindrei. 19 Tasah, iri tanan mwasin badu kon munyak dah, idoh i buku lakou laleyah le ta mada Kindrei. Buk ndrabun ndrasehek ta aliy,

“Kindrei akohok iri lau ta tanan badeh, in hamon ta kandriyen ta wasai tiri le amwenen, buku le ndramak asemek bou na lolohon.” a 
20 Buk ndrabun ale asehek,

“Laban ndratanan, iri budon marakon tiri lau ta tanan, i buku lakou laleyah le.” b 
21 Eme ma kora-on aha kasehek, “Jo le ari nyarak tinan handru, tasah jo ta Pol,” o, “Jo ta Apolos,” o, “Jo ta Pita.” Bwe! Kindrei atehei tek Pol, ma Apolos hawe Pita, aso mari taha, ta aseben aha. Ma lakou mari badeh, taha ale. Kon munyak dah taha. Koha aha nane aha tawiy kede-eh, ta Krais, idoh ale taha. Buku aha amak, badeh, i buku madasan le ta atiye aha ala hawe Krais. Ma lakou mari nane udu kada-ah, ma lakou marakon kameh asahan hamon, iri marakon doh, taha. 23 Eme ma, aha ta Krais, ma Krais ta Kindrei.

Copyright information for `LID