aDutoronomi 17:7; 19:19; 21:21, 24; 24:7

1 Corinthians 5

Kandriyen ndra-in ta karei udu ndrokowa iri lau badu Korin

Jo anuhun iri kundruh i buku doh, iri kandriyen ndra-in labai ta karei asahan udu bolo ndrokowa aha. Handru, iri lau tana iri Kindrei bwe, iri amekes kandriyen ta karei, arile kandriyen ta karei ere taha ja badeh, ndra-in labai mara-ei ja tiri lau nane ta tana iri Kindrei bwe. Kandriyen nane ahi anuhun i buku doh, ndramak ari amekes karei, o amadin hawe tinen ari ja. Ya, buku sah handru, aha anya aha le ai? Aha kanuhun! Bwili aha kama, ma aha kaden ta iri kandriyen ndra-in doh, ma aha katikahei iy ndramak nane amekes iri kandriyen ndra-in udu bolo aha badeh, kedek ki-iu.

Jo ndramak amwenen bado hawe aha bwe, arile malawik mwasin ma iri budon tek marakon badeh, udu hawe aha, i buku jo amwenen udu hawe aha. Jo ndranyulumwi iy ndramak ta karei nane ndrano, eme ma jo ndratehei iy ndrala ta sahou. Jo asehek in ta nyara Jises, tinan tataha mari: Buku aha anya katukum, malawik mwasin badeh, udu hawe aha. Eme, na boto-on ta tinan tataha Jises Krais, aha katikahei iy ndramak doh ki-iu kili len taha. Ma idoh, i buku aha atehei iy ndrala mine tama balik Satan, ta amekes badan ma kandriyen tan badu munyak kandra-i. Taha amekes buku doh, eme ma Kindrei winiyan andrei malawin mwasin ta ndramak nane eme hamon, na len ta Laban kameh eme hamon ja, ta adeu lau marakon ala ta mada sahou.

Kati budon ta iri Korin katikahei ndramak amekes kandriyen ndra-in ki-iu

Aha atudun nyara aha amwenen, eme ma kandriyen doh bamwenen bwe. Sebwe aha tanan sahou sokek doh, “Nadu kono-o yis sese le winiyan bwidi jabi ramen mara-ei apus eme loken.” Yis doh leheya kandriyen ndra-in. Aha kakahei iri yis malen doh ki-iu! Ma aha kasahan ki buku jabi ndraborohei le, yis bala bolon bwe le. Handru, jo tanan, aha badeh, i buku jabi ramen, yis bala bolon bwe. Tasah, Krais mene imek ta akunoh ndra-in tataha, i buku sipsip imek ta nyara salom. Eme ma taha kado le hamon ta kandriyen ta len ta Pasoba doh. Eme ma taha kamekes nyamon ta Pasoba. Taha kamani iri kandriyen ndra-in marakon taha amekes, i buku iri lau atukum iri yis malen udu bolo asiu tiri iu, buku iri alokou nyamon ta len tinan nane doh. Ya taha ka-en hamon le ta kandriyen mwasin, ma taha kasehek sahou handru. Kandriyen doh kameh udu tataha i buku jabi ramen yis bala bolon bwe.

Udu bolo la-ukei tek ramen mene ndrawek taha, jo tiye ta aha sadek hawe iri lau ta karei. 10 Jo batiye taha ta aha karuwani iri lau badu kon munyak dah, iri ale amekes iri kandriyen ndra-in i buku karei, ma bahana lakou ta lau rayah ja, ma madalikis, ma asolom sukumada kei, bwe. Buku aha anya karuwani iri lau buku doh badeh, aha kamak ka-au, ma bale aha kamani kon munyak mara-ei. 11 Kati sahou jo mene atorou ewek taha, i buku doh: Buku ari mwan o badih aha aloh iy nadu tine aha i san ta Jises, arile, iy ale ta amekes karei, o, iy ta madan alikis lakou, o, iy ta asolom sukumada kei, o, iy ta bobose, o, iy ta a-un gwa lolo-ou, o, iy ta bahana lakou ta ndramak ari ja, iri lau buku doh, aha sado hawe iri ma aha saimon nyamon hawe iri labai. 12 Gok ta edeu iri mwan ma badih ala ta sahou, iri batukum hawe iri lau ta Kindrei bwe, idoh gok ta Kindrei amwenen. Ari gok tek bwe. Arile, aha badeh, kanuhun ma kadeu iri mwan ma badih kala ta sahou badeh, iri lau ale atukum hawe aha amwenen. Idoh buku buk ndrabun asehek,

“Aha badeh, katikahei iri mwan ma badih, iri amekes kandriyen ndra-in ka-au kala len taha.” a 
Copyright information for `LID