aAisaya 28:16
bWari 118:22
cAisaya 8:14
dAisaya 53:9

1 Peter 2

Laban iy i buku bek, kohan udu aliy

Aha ndrasahan ha-un ja na ndraye Jises Krais, eme ma aha karuwani iri kandriyen ndra-in. Aha sawasai, ma aha samekes kandriyen ndra-in sala ta ndramak ari ja. Mada aha salikis lakou ta ndramak ari ja, ma aha sasehek ndramak ari ja. Aha karuwani kandriyen ndra-in mari doh ki-iu. Taha tana taha ta iri nah nadu bwisik badeh, anya ka-un le sur ta tine iri. Aha ka buku none le iri nah bwisik aso-ok sahou mwasin ta Kindrei, ta aseben aha ta ateh na len mari. Ya sahou tan doh bamalin ba-en bolo sahou ta wasai badu munyak dah bwe, sahou doh kameh mesekei aha ado mwasin hawen. Ma, aha ka-en hamon ta kandriyen nane doh, tasah aha ndratanan, Kindrei badeh, mwasin labai en. Aha aso-ok iy buku none le iri lau aso-ok nyamon nyaman.

Aha kame hawe Laban. Iy badeh, buku none bek kohan in aliy, eme ma Kindrei anya kakohok bek nane ta atah asiu na aliy. Iri lau badu kon munyak anya iy lakou ndra-in, ya iri bwale iri iy. Arile, Kindrei ndranyowonyani iy kabwe, ya iy anya iy mwasin mara-ei. Aha ale buku none iri bek koha iri in aliy, ma, na boto-on ta Malawin Ndrabun, iy anya kamekes aha kasahan asiu ndrabun tan handru. Ma aha kameh asahan iri pris ndrabun handru ta Kindrei, ma, na nyara Jises Krais aha winiyan adeu koha aha i ta Kindrei buku none ari lakou ta asun i nyara salom iy aso-ok handru. Buk ndrabun tiye i buku doh:

“Aha kanuhun, jo ndranyowonyani bek ari kabwe, ta asahan ndru ta kabede asiu ta ateu asiu kudu boto-on. Bek doh badeh, iy mwasin ya iy boto-on labai. Idah jo atehei iy ereu mandrei Sayon. Ya are lau atehei budon tan handru in tan kameh iy winiyan bani bwilima bwe.” a 
Ya sahou nane dah ewek taha lau atehei budon taha i ta Laban, badeh, buku none bek mwasin labai en. Arile, sahou ari ja i tiri lau ale batehei budon tiri bala tan bwe, i buku doh:

“Bek ale iri lau ta atah asiu bwale iri, na dah, iy ndrasahan kati ndru ta ka-u asiu bek.” b 
Ya buk ndrabun asehek ja,

“Bek doh kameh tono-ei kati iri lau, ma iy kameh amekes lau taku ereu san.” c 
Iri taku, tasah iri batehei budon tiri bala ta sahou tan bwe. Lakou doh asahan tiri, tasah bwena mene Kindrei ndratehei budon tan ta iy kameh amekes i buku doh.

Arile, Kindrei ndranyowonyani aha kabwe, ya aha ndrasahan pris handru ta kabin badu loken. Ma aha ndrasahan lau tan amwenen, ma iy ndramesekei aha ndrasahan ndrabun handru. Kindrei ndranyowonyani aha, ta aha kanyowonya ma kasehek kandriyen mwasin tan, iy mene ndramekes ndrawek taha, tasah iy ndraluhi aha ndrareu bolo lulik ndrame bolo kon tan, lomadan labai. 10 Bwena aha nyara aha bwe, arile idah aha ndrasahan lau handru ta Kindrei. Bwena mene aha ba-en baha tondrok ma tikisiy tan bwe, arile idah aha ndrame bahandra tondrok ma tikisiy tan.

Taha badeh, kadek kamwenen mada iri lau mwan ma badih rayah ja

(Kalan 2:11 – 3:22)

Taha kasahan lau ta gok ta Kindrei

11 Aha kawas tek, jo asehek sahou dah ewek taha, buku none aha areu kon munyak, kon taha bwe. Aha lau ta teteheh le, eme ma aha satehei kandriyen ta budon ma ndrine aha ndra-in sa-en bwena taha, ndri-iy. Tasah, kandriyen ndra-in ta budon ma ndrine aha badeh, kameh amekes bahun hawe malawi aha mwasin. 12 Buku none iri lau tana iri Kindrei bwe, orou sahou ewek la-u aha, ma anya, “Aha lau ndra-in,” mwasin, iri baranyolom kandriyen taha mwasin aha amekes. Ma hamon kameh, iri barasehek anya, “Ehe, ahi badeh amekes budon ndra-in; arile, iri lau ta Kindrei doh badeh, amekes kandriyen mwasin.” Eme ma iri kameh adeu wurah i ta Kindrei, ta kandriyen mwasin taha nane, na len Kindrei eme hamon ta anuhun sahou tataha.

13 Aha kabudon sahou ta Kindrei, ma aha kanuhun sahou tiri lau ta atondrok kon. Kabin ere bwena ale aha kanuhun sahou tan ale. 14 Aha kare hamon ta sahou tiri lau an bwena ta kon rakon rakon. Kabin atehei oro an bwena ta adeu lau a ta sahou, ma adeu maha-an i tiri, buku none iri amekes kandriyen ndra-in. Ma iy ale kameh bwese nyara iri lau amekes mwasin i loken. 15 Ya, aha kamekes kandriyen buku doh, tasah Kindrei aso-ok aha kamekes kandriyen mwasin. Ma, na kandriyen mwasin taha nane, aha kameh leheya iri lau tana iri Kindrei bwe, ma ba-en hamon ta sahou tan bwe. Iri amekes wasai ma orou sahou laleyah ewek la-u aha. Iri kameh bwili iri ama, ma iri winiyan basehek sahou ja bwe. 16 Kindrei ndrasihinei aha, ma aha ba-en bahandra ari kandriyen ndra-in badu munyak dah ja bwe. Eme ma aha satehei budon buku none ari ndramak ereu laleyah, ma aha amekes kandriyen ndra-in, ndri-iy. Kindrei konohei aha ndrame hamon, ma aha tan amwenen. Eme ma aha ka-en hamon ta budon tan, ma kamekes gok tan amwenen. Iy baso-ok aha ala hamon ta kandriyen ndra-in ja bwe. 17 Aha kabeleben iri lau mari, ma aha kaso-ok iri lau atehei budon tiri handru in ta Kindrei. Aha kanoh Kindrei, ma kabeleben iri kabin badu kon munyak ale.

Taha ka-en hamon ta kandriyen ta Krais, ya taha kabwese maha-an

18 Aha bonyo-ou ma lau ta gok, aha ka-en bahandra iri lau an bwena ta atondrok aha, ma aha kanuhun sahou ma kanoh iri. Aha kamekes ki buku doh ki tiri, buku none iri amekes mwasin ewek taha, o, iri amekes ndra-in, ma a-um aha ale. 19 Buku none aha akohok maha-an ta kandriyen mwasin aha amekes, arile aha bwese-ei maha-an nane doh, mwasin. Tasah, aha atehei budon ta aha a-en hamon ta seken ta Kindrei le. Eme ma iy kameh nyosowani aha na nyosowan mwasin. 20 Arile, buku none aha banuhun sahou tiri lau an bwena taha bwe, ma aha abo gok na budon taha amwenen, ya buku none iri ka-um aha, ki buku sah handru? Buku none aha bamekes bahun bala hamon tiri bwe, buku sah? Kindrei kameh sekesek ta kandriyen taha nane, deh bwe? Sebwe, bwe nadeh! Aha kameh bwese maha-an ta kandriyen ndra-in taha amwenen, arile buku none aha amekes kandriyen mwasin buku Kindrei aso-ok, ya iri a-um aha, ma aha akohok maha-an ta aliy, badeh mwasin. Kindrei aso-ok kandriyen nane aha a-en hamon ta aliy. 21 Ta kandriyen doh, Kindrei ndraluhi aha, tasah Krais mene ndrabwese-ei maha-an hawe sisi-in tinan labai ta aseben aha, eme ma iy ndraleheyani san ndrame tataha, ya taha ka-en hamon ta mweleke katin.

22 “Iy bamekes ari kandriyen ndra-in hawe ari sahou wasai basahan bohon, bwe.” d 
23 Iri aluhe iy, arile iy basumon ta luhe tiri bwe. Iy akohok sisi-in, arile iy bamekes ari lakou ndra-in bala hamon bala tiri lau, bwe. Iy atehei iy i le mine Kindrei, ndramak mwasin labai ta anuhun sahou tataha mari. 24 Krais mene ndrabwese-ei kandriyen ndra-in tataha mari ere bolo odan, kala iy mene sukik udu bada kei tondreh. Iy mesekei kandriyen doh ta sikinei taha ta kandriyen ndra-in tataha, ma mesekei taha asahan lau ha-un ja. Ma taha kamekes kandriyen buku Kindrei le aso-ok, tasah Krais ndramak ta kandriyen ndra-in tataha, ma mesekei taha ndrasahan ndramwenen ja. 25 Aha mene ndranyon buku none sipsip, ari ndramak ta tondrok iri bwe. Arile na dah, aha ndrame hamon hawe ndramak ta tondrok, ya iy kameh tondrokei malawi aha ma koha aha udu mwasin handru.

Copyright information for `LID