1 Thessalonians 2

Pol abudon tekedek tan mene udu Tesalonaika ja

Aha nadu tine aso, aha marakon amwenen ndratanan, tekedek taso mene ewek hawe aha badeh, ba-au laleyah bwe. Aha marakon ndratanan, aso mene are Pilipai badeh, iri lau atikah aso, a-um aso, ma aso akohok sisi-in ma maha-an tinan labai ta aliy. Arile, Kindrei tataha ales udu hawe aso, ma atadau ndrine aso, ma aso barou bala hamon, ta bahun nane doh bwe. Aso abadok labai, ma adek ame hawe aha, ma asehek sahou mwasin ta Kindrei ewek taha. Eme ma, aha marakon winiyan atanan aso. Na len mene, kala ahi atiye sahou ewek taha, ahi ba-en hamon ta sahou laleyah ta wasai bwe. Ma ahi babudon ta atudun nyara ahi amwenen, o, ariu luk taha, bwe. Ma aso badeh, winiyan bandrek aha na sahou tahi le amwenen, bwe. Kindrei badeh, ndranone aso, eme ma iy sekesek le ta atehei gok eme taso ta atiye sahou mwasin. Eme ma, aso asehek ewek taha. Arile, aso winiyan basehek sahou bala tiri lau ta iri kaso-ok gok taso bwe. Aso atiye sahou kede-eh ta amekes Kindrei kasekesek ta gok taso mwasin, tasah Kindrei le amwenen tanan bolo ndrine aso, iri lau mari bwe. Sahou dah badeh, handru. Aha marakon tanan, aso badeh, basehek sahou taso ta atamas aha bwe. Kindrei ale tanan ndrine aso, ma aso bamekes gok dah ta tone kandriyen ta madalakis udu bolo ndrine aso amwenen, bwe. Ma aso bamekes gok ta akohok nyara aso i tinan ta aha amwenen, o, ta lau rayah ja, bwe.

Handru, aso badeh, aposel ta Krais. Eme ma buku aso aso-ok badeh, aso winiya ndremenya aha ta aseben.
Arile, aso mene are hawe aha, aso badeh, manyah amunum le. Aso are le buku badih isus nadun oro. Tasah, aso aso-ok aha labai, eme ma aso anya kasehek nyala aha ta sahou mwasin ta Kindrei le bwe, arile ahi mara-ei badeh, ndralokowani ahi ale ta amak, ta aseben aha. Tasah, aha badeh, mwasin labai ta mada aso. Aha nadu tine aso, aha tanan sahou dah handru labai. Aha tanan, lahou marakon aso ndramesekei, udu bolo len mene aso ame atiye sahou mwasin ta Kindrei eme taha, aso ame dah ta ariu nyamon taha bwe. Eme ma, aso amekes gok boto-on, ma aso asa-ar na len hawe ben, ma ta atondrok aso ta iri lakou marakon.

10 Aha tanan, Kindrei ale tanan kandriyen nane aso amekes ewek taha lau ta Kindrei, idoh amwenen ta madan, ma mada aha lau ta budon handru ale, ma ari lakou bandra-i bwe. 11 Ma aha tanan, kandriyen mwasin tama nah amekes ili ta nadun. Aso badeh, amekes i buku le aliy ili taha ari, ari. 12 Aso badeh, anya kariu budon taha, ma kamekes ndrine aha kabadok, ma kasehek sahou boto-on kewek taha buku doh: Aha kadek kamwenen, ma ka-en hamon ta kandriyen Kindrei aso-ok aha kamekes, tasah iy amwenen winiyan luhi aha ala hawe iri lau tan are bolo lomada sun, ma aha kameh are bolo tondrok tan mwasin udu kandrah.

Iri lau atehei budon handru in ta Kindrei

13 Aso winiyan bamunyau ta adeu wurah ili ta Kindrei bwe. Tasah, ma bwena mene aha anuhun sahou ta Kindrei aso asehek ewek taha, ma aha a-en hamon ta aliy. Aha babudon anya, idah sahou ta lau le, bwe! Aha ndrandrei, buku sahou handru ta Kindrei, ma aha a-en hamon ta aliy. Ma sahou doh abadok ta amekes manyah ma budon taha mwan ma badih kudu mwasin ta madan. 14 Ya, aha nadu tine aso, aso tanan, lakou badeh, handru. Tasah, aha asahan i buku le iri lau mwan ma badih ta Kindrei, iri are loboho bada kon Judiya, iri atehei budon tiri in ta Krais Jises. Aha asahan i buku le iri, ma aha akohok maha-an badu mine iri lau rayah badu Tesalonaika amwenen, i buku iri lau ta Kindrei badu Judiya mene akohok badu mine iri Juwis rayah ale. 15 Iri Juwis badu Isra-el le doh, mene adai iri propet, ma adai Laban Jises ale. Eme ma, na len idah badeh, iri amekes ndra-in eme tahi, ma tikahei ahi are bolo kon mara-ei, ma iri tebelese ta kandriyen nane Kindrei aso-ok labai. Handru, iri badeh, asahan lau ta amekes bahun ili ta lau marakon, 16 tasah iri amekes san ta aturuk ahi, ta sala satiye sahou ta Kindrei sala tiri lau badu leheleh. Handru, iri baso-ok ta Kindrei kakohok iri kame hamon bwe. Eme ma, len marakon badeh, iri amekes kandriyen ndra-in ili solo-an udu le gwek, buku ndramak asuni gwa ili bolo bwesam irek labai, ma anya kamou. Eme ma, Kindrei ibolosen ili tiri, ma maha-an hawe ndramas ndra-in ta kandriyen iri nane amekes, iy ruwaniy eme andri amwenen ili bwele-e iri.

Pol aso-ok labai ta anyolom iri lau badu Tesalonaika ja

17 Aha nadu tine aso, iri Juwis rayah amekes ma tikahei aso are hawe aha ame len. Ma, na bolo len sese le doh, aso badeh, atona i buku tama nah udu len labai ta nadun oro. Handru, aso ado len labai, ma aso banyolom mada aha bwe. Arile, ndrine aso, ma budon taso mara-ei badeh, udu hawe aha kahis. Eme ma, aso amekes gok ta asilah iri madasan ta awek hamon hawe aha, ma ndrine aso eden labai ta anya kanyolom mada aha ja. 18 Handru, aso aso-ok labai ta awek hamon hawe aha. Jo Pol, jo le amwenen badeh, none san solo-an labai, arile aso basahan hawe aha bwe le. Tasah, ndramak ndra-in, tama balik Satan badeh, aturuk aso ta sawek. 19 Ta sasah handru, aso anya kawek hamon ta anyolom aha ja? I buku doh: Hamon kameh Laban tataha Jises eme hamon, ma taha kameh ales are madan ta sahou. Na len doh, aso katondrok saba lakou handru? Aso kasekesek na saba lakou handru? Aso kameh kasekesek ma kasehek nyala saba ndramas handru? Aso kameh sekesek taha le kabwai. 20 Handru, aha le amwenen badeh, a buku nyara aso tinan ma sekesek taso. Eme ma aso anya kawek hamon ta anyolom mada aha ja, ma kasekesek hawe aha marakon.

Copyright information for `LID