1 Timothy 2

Taha kasolom i ta Kindrei ta iy kaseben iri mwan ma badih mara-ei

Ma mwena udu bwele-e lakou mari handru, jo anya kasehek sahou boto-on ki ta lau mari i buku doh, “Ado badeh, kasehek budon tado ma kadeu wurah ma hawe kasolom ki ta Kindrei bwena; ma kamekes ki tiri kabin mari, ma hawe are lau ateu batu lahou tinan ta atondrok, eme ma manyah ta to kudu mwasin; i san ta manyah mwasin ta Kindrei ma ta kandriyen lewen.” Idoh mwasin labai ma amekes Kindrei ta seben taha, kameh sekesek. Tasah, iy aseken lau mari samak ma lau katanan sahou handru. Tasah, Kindrei badeh, iy Kindrei le ari, ma hawe ndramak awas ari le udu ndrokowa Kindrei hawe taha ndramak, badeh Krais Jises le. Iy le badeh, atehei kohan ta akunoh taha lau mari. Idoh asahan handru eme lewan amwenen le, ta Kindrei anya lau mari badeh, samak. Eme ta katin doh baden adeh, jo asahan aposel ta atiye sahou, ma ta leheya iri lau badu leheleh. Ma iy atehei jo ta atiye sahou ta budon handru dah. Eme ya jo bawasai bwe, jo tiye sahou handru.

Aha badih kanyasou aha kamwenen

Eme ya budon tek, jo aseken aha lau mwasin ta mada Kindrei badu kon mari kamekes salom ma kasore mine aha ki loke. Ma hawe aha kateu lim, ma aha sasobobo ndri-iy.

Ya aha badih, aha kalomondra kolau taha, ma aha kanyasou aha kamwenen; ma aha sanyasou batu aha sala buku none aha adeu lakou i bada aha, i buku none bek nyikilikin, i ndranye aha, hawe buwandralou, ma hawe kolau lomadan sowan tinan labai. 10 Arile, aha kamekes ki san mwasin ta leheya aha i buku badih handru ta atudun Kindrei.

11 Aha badih kakohok kandriyen ta kado le bahandra mwan. 12 Jo baseken aha ales ta leheya lakou ma hawe katondrok iri mwan bwe; aha badeh, kado le. 13 Tasah, ma mwena handru mene bamekes Ip bare bwena bwe, amekes Adam badeh, ere bwena labai. 14 Ma Adam ale bataku bwena bwe, Ip badeh, taku bwena ma iy ba-en hamon ta kandriyen mwasin ta Kindrei bwe. 15 Arile, iri badih katawi kandriyen ta budon handru, ma hawe kandriyen ta tikisiy, ma hawe kandriyen mwasin ta are mada Kindrei, ma iri sala badih ta atudun iri ta anyasou bada iri. Ya buku none iri amekes i buku doh kameh, na len iri adeu nah kameh iri adeu udu mwasin.

Copyright information for `LID