2 Corinthians 1

Pol tiye ta nyala gok Kindrei mene edeu ili tiri aposel

(Kalan 1–7)

Jo Pol, jo aposel ari ta Krais Jises. Ta so-ok ta Kindrei le amwenen, iy atehei jo asahan aposel. Jo hawe nadu tine taha ari Timoti, aru mala-uh atorou la-ukei dah ewek taha mwan ma badih ta Kindrei are kon Korin, hawe iri mwan ma badih ta Kindrei marakon are loboho kon munyak tinan Akaya. Aru mala-uh anya tama taha Kindrei, hawe Laban Jises Krais, uru kamekes kandriyen ta tikisiy kewek taha, ma kamekes ndrine aha kamunum.

Pol edeu wurah, i ta Kindrei ta aseben iy

Jo sekesek handru i ta Kindrei, iy tama Laban tataha Jises Krais. Ma iy kati iri kandriyen handru ta tikisiy, ma iy amekes maha-an udu ndrine iri mwan ma badih amunum. Ya, iy bwidi ndrine ahi amunum, na len iri maha-an ame asahan ma ndruni ahi. Tasah, iy bwidi ahi winiyan ta aseben ndrine iri mwan ma badih rayah ja maha-an solo-an labai udu tiri, ma ndrine iri winiyan amunum i buku ahi. Krais mene bwese maha-an ma iy akohok sisi-in. Ahi ale bwese maha-an ma akohok sisi-in i buku le iy. Eme ma, ahi ahis hawe Krais ma Kindrei badeh, aseben ahi i buku le iy mene aseben Krais. Na len ahi bwese maha-an, idoh aseben aha ma Kindrei winiyan andrei aha ame hamon. Na len Kindrei aseben ahi ma ndrine ahi amunum udu le udu, idoh badeh, aseben ndrine aha winiyan udu mwasin ale. Ya, len aha ales boto-on, ma bwese iri maha-an i buku ahi ale bwese, Kindrei badeh, amekes ndrine aha amunum. Eme ma, ahi abudon aha kameh ales boto-on ta iri maha-an asahan. Tasah, ahi tanan aha bwese maha-an hawe ahi, ano kameh Kindrei amekes ndrine aha hawe ndrine ahi amunum. Ahi atorou sahou dah ewek taha. Tasah, ahi anya aha kameh katanan ta iri maha-an doh mene asahan tahi udu bada kon Esiya. Maha-an tinan labai mene ati-i ahi, ma tihisi boto-on tahi. Eme ma ahi abudon i buku: Ahi kameh amak na dah. Handru labai! Ahi atona iri maha-an i buku ndramak lalou atona ta len ndramak ta anuhun sahou asehek ano ta iy kameh imek. Maha-an doh mene asahan tahi ma ahi kameh winiyan babudon ta boto-on tahi amwenen kameh udu awas bwe. Ahi badeh, atehei budon udu ta Kindrei le ari, iy le ari winiyan mete-ei iri mene ndramak ame hamon ame awas ja. 10 Ehe, iri maha-an marakon doh anya kadi ahi kamak, arile Kindrei badeh, aseben ahi, ma ahi bamak bwe. Hamon ale, Kindrei kameh aseben ahi ta iri maha-an doh winiyan badi ahi bamak bwe. Ahi atehei budon tahi handru in ta Kindrei ta iri lakou doh. 11 Ehe, Kindrei kameh amekes lakou doh ja, ma buku aha asolom ili tan ta ahi. Handru, aha amekes salom i buku doh, ma Kindrei kameh anuhun salom doh taha, ma iy aseben ahi. Ma mwan ma badih solo-an kameh anuhun ma bwetenei lakou doh Kindrei amekes eme tahi, ma iri kameh adeu wurah ili ta Kindrei ta aliy.

Katin tasah Pol bame banyolom iri mwan ma badih badu Korin bwe

12 Budon tahi atona sahou dah handru, ma ahi sekesek ta lakou dah: Ta lakou marakon ahi mene amekes ili tiri mwan ma badih badu kon munyak dah, ahi mene a-en hamon ta kandriyen mwasin, ma kandriyen handru. Ahi ba-en hamon ta tanan mene ahi akohok tiri mwan ma badih badu munyak dah bwe. Tikisiy ta Kindrei le mene aseben ahi, ma ahi amekes i buku aliy. Ma ahi mene amekes kandriyen doh ili le kala ahi abo gok hawe aha mwan ma badih badu Korin. 13 Iri la-ukei ale jo atorou ewek taha, sahou rayah udu bolon badeh, bamai bwe. Iri lakou jo atorou badeh, aleu ma aha winiyan atanan moson ta aliy. Na len dah aha bala tanan jo bamwenen bwe, o, ta lakou jo anya kamekes kewek taha. Arile, hamon, jo abudon aha katanan jo kamwenen, ma lakou jo amekes taha. Eme ma hamon, len ta Laban Jises eme ta tunuhun sahou tiri mwan ma badih, aha kameh sekesek ma atudun nyara ahi i buku jo kameh sekesek ma atudun nyara aha ale.

15 Jo anya aha kameh katanan kamwenen ta iri lakou doh jo mene asehek ta aliy. Eme ma, jo mene abudon ma mwena ta a-en hamon ta san ta ili Korin na len jo ili bada kon Masadoniya. Ma hamon kameh jo eme le san dah ma anyolom aha san rasan ja. Ma ta kandriyen doh aha kameh winiyan anyolom aru ma la-uh, ma aru winiyan sekeyani ndrine aha handru. Ma hamon ta idoh, aha winiyan aseben jo, ma tiye jo kili hamon loboho bada kon Judiya ja. 17 Handru! Idoh budon mene jo anya ki-in hamon ta aliy. Arile, jo bawek hamon batou aha bwe. Aha anya jo ndramak ari ta tobolowe lakou laleyah nadeh? Bwe, jo bala buku i ndramak doh anya, “Ehe ma bwe” hawe a-en hamon ta so-ok tek laleyah, bwe. 18 Sahou ta Kindrei handru ta ere le buku doh. Eme ma jo kasehek taha, jo tiye handru buku jo asehek: Jo bala buku ndramak anya “Ehe” udu bohok amwenen, ma jo tone budon “Bwe” ta ndrinek badeh, bwe! 19 Jo hawe Sailas uru Timoti, aso ma taloh mene atiye sahou udu ndrokowa aha. Ma sahou ta Nadu Kindrei, Jises Krais doh handru. Ma aha atanan, Krais badeh, winiyan batubuni iy bwe. Iy badeh in le hamon ta so-ok ta Kindrei, ma iy amekes gok tan ta in hamon tiri sahou tandrakan Kindrei mene amekes eme tataha mwan ma badih. 20 Idoh handru labai: Krais amekes iri sahou tandrakan ta Kindrei asahan handru mara-ei. Idoh leheya taha Kindrei anya “Ehe,” arile ma a-en hamon ta sahou tan. Eme ma, taha kasekesek ma katudun nyara Kindrei ta idoh: Iy in hamon ta sahou tan. 21 Kindrei leheya ahi i buku doh: Ahi hawe aha Korin, taha marakon badeh, Kindrei bwidi taha winiyan ales boto-on hawe Krais. Ma ale, Kindrei mene atehei ahi ta amekes gok aposel dah. 22 Iy mene atehei kalem tan amwenen eme tataha: Iy atehei Malawin Ndrabun eme ndrine taha. Ma Malawin Ndrabun doh i buku ari le tiri lakou Kindrei anya kedeu taha hamon. Eme ma taha winiyan atanan i buku doh: Handru labai, Kindrei kameh edeu iri lakou marakon, iy mene tandrakan ta aliy eme tataha.

Pol bala Korin suwi bwe

23 Kindrei tanan budon tek. Eme ma, buku jo kawendreya badeh, Kindrei winiyan nyowani wendreya tek doh, iri mwan ma badih kameh winiyan atanan ta aliy. Arile, jo bawendreya bwe. Jo asehek handru. Jo bwalek edeu maha-an tinan ewek taha, ma abolosen ewek taha ta kandriyen ndra-in mene asahan ndrokowa aha. Eme ma, jo mene bawek hamon bawek Korin ta anyolom aha ja bwe. 24 Na len jo asehek “Jo ibolosen ewek taha” jo basehek anya ahi atondrok budon taha bwe. Ahi tanan aha ales boto-on ta budon taha. Ahi abo gok le hawe aha, ta amekes aha kasekesek.

Copyright information for `LID