aDutoronomi 19:15

2 Corinthians 13

Iri mwan ma badih badu Korin badeh, katondrok budon tiri kamwenen

Idah, ili asahan san tulusin ai, ta jo anya kewek katou aha. Buk ndrabun asehek i buku doh,

“Buku lau la-uh o taloh asehek anya, oro anyolom ari ndramak amekes kandriyen ndra-in, mwasin ta aha kasehek sahou hawen.” a 
Iri mwan ma badih amekes kandriyen ndra-in bwena, ma aha mwan ma badih rayah ale, aha ndranuhun batanau tek udu bolo len mene jo udu hawe aha. Jo asehek taha ta kandriyen jo anya kamekes, ma nadah badeh, jo udu len labai taha. Arile, jo anya kasehek taha ja: Buku jo ewek atou aha ja, jo winiya balelek iri mwan ma badih nane amekes kandriyen ndra-in ja bwai. Jo kameh ikoh udu bwele-e iri le kabwe. Tasah, aha anya katanan handru, Krais amekes sahou na bohok o bwe. Mwasin, aha kameh winiya atanan amwenen ta lakou mara-ei doh. Krais badeh, bamunyau bwe le, iy ibo gok boto-on labai ta aseben aha. Handru, Krais mene asahan ndramak le, ma iy nyamun handru bwe. Eme ma, iri tatahi iy i bada kei tondreh, ma iy imek. Arile, nadah ja bwe. Na boto-on ta Kindrei laba tinan labai, bwidi iy amak eme awas ja. Ahi aposel badeh, ahis hawe Krais, ma ahi ale lau laleyah, ma ahi nyamu ahi bwe. Arile, na le boto-on ta Kindrei, ahi ale ado hawe Krais. Eme ma, ahi kameh adek bolo aha ta amekes ndrokowa aha kudu mwasin na boto-on dah.

Aha katona ndrine aha ma katanan kamwenen, sebwe, aha atehei budon taha handru in ta Jises o bwe. Sebwe, aha ndratanan, Krais Jises badeh, udu ndrine aha. Buku bwe eh, budon taha ndrataras nadeh? Handru, hamon kameh aha winiya atanan ahi aposel handru, ma ahi atehei budon tahi mara-ei in ta Krais. Ma, ahi asalom ili ta Kindrei, ta iy kaseben aha, ma aha samekes ari kandriyen ndra-in. Jo amekes sahou dah ta Kindrei winiya leheya aha, ahi aposel handru. Ahi aso-ok aha kameh kamekes le kandriyen mwasin; iri lau abudon ahi aposel handru o bwe. Aha tanan, taha badeh, winiya bamekes ari lakou ta aturuk o tubuloh sahou mwasin ja bwe. Taha kaseben le ta sahou mwasin dah kabadok boto-on. Aliy, ahi nyamu ahi o bwe, arile, buku aha ales boto-on ta budon taha kahis, ahi kameh sekesek labai. Ma, len mara-ei kameh ahi asalom ili ta Kindrei, ta aha winiya asahan lau tan boto-on labai. 10 Katin ta jo udu ndra len atorou la-ukei ewek taha dah, i buku doh: Jo aso-ok aha kasehek nyala manyah taha op. Buku jo ewek asahan hawe aha, jo bwalek ta tone boto-on ta gok nane Laban edeu eme tek, bwe. Iy atehei eme tek dah, ta atadau aha; ta amekes aha andra-i bwe.

Pol anya aha ndrado ai, bale aha kudu taha

11 Aha nadu tine mwan ma badih, aha ndrado ai, ma bale aha kudu taha. Jo aso-ok aha kabadok ta asahan lau ta Kindrei handru. Aha kanuhun sahou tek, ma katawiy kihis kudu budon taha, ma ndrine aha mara-ei kameh udu mwasin. Kindrei aso-ok aha lau mwan ma badih mara-ei, ma aseben ndrine aha udu mwasin. Iy amwenen kameh udu hawe aha. 12 Ta kandriyen ta taha mwan ma badih ta Kindrei, aha ari, ari badeh, kateu lim hawe nadu tinem mwan ma badih rayah ja. 13 Iri lau mwan ma badih ta Kindrei mara-ei are kada-ah adeu bada an tiri mwasin owek taha. 14 Jo asalom, buku Laban Jises Krais kameh amekes kandriyen mwasin handru owek taha, ma Kindrei kameh aso-ok aha labai, ma Malawi Ndrabun ale kameh ihis udu ndrine aha mara-ei.

Copyright information for `LID