aJenesis 1:3
bWari 116:10

2 Corinthians 4

Iri aposel badeh, a buku kun amekes na ndren

Kindrei mwasin, ma iy tikisi ahi, ma iy mene atehei gok ta atiye sahou mwasin dah eme tahi. Eme ma, ahi bawoyah ta amekes gok dah bwe. Ma ale, ahi badeh, bawendreya iri mwan ma badih, o tobolowe sahou ili randrah ja bwe. Ahi ba-en hamon tiri kandriyen ta adeu bwilima i ta nyara Kindrei bwe. Ahi badeh, atiye sahou handru ta Kindrei ili tiri mwan ma badih marakon, ma iri winiyan anuhun. Ta kandriyen doh, ahi leheya iri, kandriyen tahi mwasin, ma iri winiyan atanan gok ahi amekes dah, idoh ale mwasin udu mada Kindrei. Iri mwan ma badih rayah, iri abudon sahou mwasin ahi atiye doh, idoh boto-on labai ta atanan moson ta aliy. Sahou mwasin asahan i buku le, ta iri mwan ma badih anya kandrakak kala bolo jih. Tasah, kindrei ta wendreya badu munyak dah, iy mene wahei budon tiri mwan ma badih doh batehei budon tiri bala ta Kindrei bwe. Eme ma, sun ta sahou mwasin ma lomada Krais, idoh winiyan bala bolo budon ma ndrine iri bwe, ma iri winiyan akohok Krais bwe, konen i buku Kindrei amwenen.

Ehe, sahou dah handru, tasah ahi badeh, batiye sahou tahi bwe. Ahi atiye sahou i buku doh: Krais Jises, iy badeh, Laban tataha, ma ahi lau ta gok taha, tasah Jises aloh ahi ta amekes iri gok doh. Ehe, ahi atiye sahou ta Jises. Tasah, bwena mene Kindrei bwidi munyak dah anya,

“Sun kanya bolo lulik.” a 
Kindrei amwenen doh irek labai ta sun, ma iy akohok ahi ame hamon ja. Jises Krais, iy le sun doh udu ndrine ahi. Eme ma sun doh aseben ahi leheya iri mwan ma badih, Kindrei i buku sah handru.

Lakou mwasin doh badeh, udu bolo oda ahi mwan ma badih. Ma ahi badeh boto-on bwe, buku kun amekes na ndren. Arile, idoh iy mwasin, tasah iy leheyani iri mwan ma badih, ta boto-on ta sahou mwasin nane ahi atiye, idoh ta Kindrei ma boto-on tan sakalawi boto-on tiri lakou mara-ei ja. Ahi amwenen badeh, bwe. Udu bolo iri kon rakon, rakon maha-an badeh, asahan tahi, arile badi ahi bamak bwe. Lakou solo-an badeh, wahei budon tahi, arile budon tahi bala bwe. Iri lau laleyah badeh, atikah ahi ta amekes ndra-in eme tahi, arile Kindrei baruwani ahi bwe. Iri a-um ahi, ma adeu kandriyen ndra-in solo-an eme tahi, arile ahi bamak bwe. 10 Na len marakon, iri lakou abo gok ta adai ahi amak buku Jises mene imek. Arile, ahi bamak bwe le. Idoh leheya iri mwan ma badih buku Jises ale udu ndra awas kahis, ma atondrok ahi. 11 Ehe, ahi badeh, amekes gok ta Jises, ma ta iri len marakon ahi ado awas are kon munyak dah, iri mwan ma badih badeh, none ta adai ahi kamak. Arile, ahi bamak bwe le, ma idoh leheya iri mwan ma badih, buku koha Jises badeh, udu bolo oda ahi, oda ahi doh badu kon munyak le. 12 Handru, ta iri len marakon ahi atiye sahou mwasin, ma iri lau none ta adai ahi aposel kamak. Arile, lakou doh ja atehei kohan handru ta udu le buku doh ewek taha.

13 Udu bolo buk Wari ta bolo buk ndrabun, ndramak ari torowenei i buku doh,

“Jo atehei budon tek handru, Kindrei kameh in hamon le ta sahou tan. Eme ma, jo asehek iy ili tiri mwan ma badih.” b 
Ahi aposel ale, budon tahi i buku le ta ndramak doh. Eme ma, ahi badeh, atiye sahou mwasin ta Laban.
14 Tasah ahi badeh, ndratanan, Kindrei mene mete-ei Laban Jises imek udu bolo lek eme awas ja. Eme ma, iy kameh mete-ei ahi ale hawe Jises, ma tiyani ahi hawe aha ala kandrah, ma ado hawen. 15 Iri lakou ndra-in doh mene asahan tahi ta aseben aha. Udu hamon, so-ok ma tikisiy ta Kindrei andrei iri mwan ma badih solo-an labai ame hamon ja, iri kameh winiyan adeu wurah amwenen ili ta Kindrei, ma iri winiyan atudun nyaran.

16 Ahi abudon ta lakou doh kameh asahan. Eme ma, ahi bawoyah ta amekes gok ta Kindrei bwe. Idoh handru, oda ahi sudi boto-on ta nyamu iri, ma hamon kameh iri andra-i. Arile, ndri-iy ai, kohan mwasin Kindrei edeu eme tahi, iy bwidiy asahan ha-un mara-ei ta iri len ari, ari. 17 Iy i buku doh: Iri maha-an marakon badeh, abo gok ta sokoso-ou ahi, iri ta len ranah le, ma tinan handru bwe. Arile, lakou doh lokowani ahi ta akohok manyah mwasin udu kandrah. Ma manyah udu kandrah doh kameh udu bwele-en labai tiri maha-an marakon doh nane asahan tahi. 18 Eme ma, ahi babudon solo-an ta iri lakou marakon doh, ahi winiyan anyolom na mada ahi amwenen, bwe. Ahi atehei budon tahi ili tiri lakou ahi winiyan banyolom udu kandrah bwe. Tasah, iri lakou taha winiyan anyolom na mada taha, idoh kameh ano. Arile, iri lakou udu bolo kandrah, kameh ta udu le buku doh.

Copyright information for `LID