2 Corinthians 5

Asiu tataha handru udu kandrah

Ehe, taha atehei budon tataha ta lakou udu bolo kandrah. Tasah, taha ndratanan anya: Hamon, buku bada taha nane kada-ah kameh imek ma andra-i, Kindrei anya kedeu ari ja keme tataha. Idoh badeh, basahan ta kandriyen ta mwan ma badih tasou a-en hamon ta aliy bwe. Kindrei le amwenen kameh amekes udu bolo kandrah kodo-oh, ma iy kameh ta udu le buku don ai. Taha badeh, ndrawoyah ta bada taha nane kada-an ai. Eme ma, taha tikisiy labai ta anya kakohok bada taha badu kandrah doh, kasini kili bwele-e taha i buku ndramak isin awin in bwele-en. Tasah, taha amak badeh, taha baso-ok malawi bada taha ere laleyah. Handru labai, taha lau marakon badeh, bada taha i buku asiu balei. Taha aden, tasah ta maha-a iri sisi-in taha bwese. Taha bala bwale bada taha badu munyak nane dah bwe. Arile, taha badeh, aso-ok bada taha ari ja ha-un nane Kindrei ndratandrakan ta edeu eme tataha, tasah bada taha doh kameh imek ma tubuni iy ja, ma akohok kohan ta ere le buku doh, ma iy winiyan bamak ja bwe. Kindrei le ari badeh, ndralokowani taha ta akohok koha taha ha-un doh. Ma iy ndratehei Malawin Ndrabun ndrame tataha. Handru labai, Malawin Ndrabun, iy i buku sahou tandrakan ta Kindrei, ta iy kameh edeu iri lakou hamon, iy mene tiye ta edeu eme ta taha. Eme ma, ndri-iy ta saba lakou kameh asahan. Taha banoh ta aliy bwe. Taha tanan bada taha na idah i buku asiu taha ado aliy are kon munyak dah. Na bolo len dah, taha bado hawe Laban bare kon tan bwe. Ya, na idah badeh, taha ndratanan iri lakou marakon doh handru. Taha banyolom bwe le, arile taha atehei budon tataha tinan labai, iri atondrok taha are bolo kandrah. Eme ma, taha banoh ta amak bwe. Ta budon tataha, idoh mwasin. Tasah, buku taha amak ma ruwani bada taha doh, taha kameh are hawe Laban ado kati kon handru. Eme ma, buku taha ado hawen are kati kon handru, o, taha are len kahis le, ndri-iy ai; len marakon badeh, taha abudon boto-on labai ta amekes iri kandriyen marakon, Laban aso-ok. 10 Tasah taha tanan, hamon kameh taha marakon ales are ta mada sahou ta Krais, ma iy kameh tunuhun iri lakou marakon taha amekes bwena ndra-au. Eme, buku taha ndramekes kandriyen mwasin na bolo iri len doh, taha are ndra bada taha malen kahis, o taha mene amekes kandriyen ndra-in kahis, idah kameh taha ari, ari akohok sihine taha ili le winiya kandriyen nane taha amekes bwena ndra-au.

Gok tataha badeh, ta aseben iri mwan ma badih kasahan kawas ta Kindrei

11 Taha ndratanan, hamon kameh Krais aleben iri lakou marakon taha amekes mwena ndra-au. Eme ma taha anoh tinan labai, eme ma ahi amekes gok ta ariu budon tiri mwan ma badih katehei budon tiri kili le ta sahou mwasin. Kindrei badeh, tanan budon tataha ma iy tanan ndrine taha handru. Eme ma, ahi atehei budon tahi i buku doh: Aha mwan ma badih badu kon Korin tanan, ahi bamekes kandriyen ta wendreya bawek taha bwe. 12 Ta sahou dah badeh, ahi batudun nyara ahi ja bwe, ya aha winiyan abudon, ahi badeh, lau mwasin, bwe. Ahi torowenei iri sahou dah ta aha kasekesek ahi. Eme ma, aha kameh winiyan atanan ta ndremenya ta sahou tiri mwan ma badih asehek, “Ndramak ki konen, ma bohon ki boto-on ta asehek sahou nyaman handru.” Lau mwan ma badih abudon i buku doh, iri batehei budon tiri bala tiri kandriyen nane iri lau mwasin amekes bwe. 13 Buku jo ibo lolo-ou buku iri mwan ma badih rayah nane asehek, jo anya, ndri-iy ai, jo kamekes le gok ta Kindrei, ma jo kasahan lolo-ou! Arile, ahi lau mwasin, ma ahi amekes gok ta aseben aha ka-en hamon ta sahou mwasin ta Kindrei. 14 Iri lakou marakon ahi amekes badeh, ta aseben ahi bwe. Tasah, tikisiy hawe so-ok ta Krais badeh, tutuni ahi ta amekes gok tan. Tasah, ahi ndratanan ta lakou ari le dah: Ndramak ari le tubuni taha ma iy ndramak, ma idoh i buku taha marakon amak ta iri lakou taha amekes mwena. 15 Handru labai, iy ndratubuni taha marakon, ma iy imek. Iy amekes i buku doh, ta taha mwan ma badih kameh akohok koha taha nane ha-un doh, taha sabudon taha le amwenen, ma sa-en hamon ta so-ok tataha, na len taha are ndra kon munyak dah. Arile, taha katehei budon tataha kili ta Krais le ari, iy mene tubuni taha, ma iy imek, ano iy amak eme awas ja. Eme ma, taha ka-en hamon ta kandriyen, iy amwenen aso-ok.

16 Mwasin labai, na dah badeh, ahi ndrasahan lau ta Kindrei. Eme ma, ahi ba-en hamon ta kandriyen ta ndrine ahi malen mene ja bwai, ma ahi baleben koha ari mwan o badih an hamon ta budon tiri solo-an nane are kon munyak amekes, bwe. Handru labai, bwena mene ahi a-en hamon ta budon badu kon munyak dah, ma i buku taha tunuhun Krais. Arile, nadah badeh, ahi ndratanan, iy are lau handru, ma ahi bamekes ja bwai. 17 Ya, bolo len dah, are lau mwan o badih, atehei budon tiri mara-ei in ta Krais, badeh, Kindrei ndrabwidi iri ndrasahan ha-un labai. Eme ma, kandriyen malen bwena ndra-au mara-ei, ma kandriyen mwasin ha-un ndrasahan.

18 Kindrei le amwenen, kati iri lakou marakon doh. Bwena mene ahi ta amekes bahun i tan, arile na gok Krais amekes, Kindrei aseben ahi asahan mwasin hawen. Ma iy edeu gok dah eme tahi ta aseben iri mwan ma badih rayah ame asahan mwasin. 19 Sahou ahi asehek tiri i buku doh: Ta gok Krais ndrabwidiy, Kindrei ibo gok ta ariu iri mwan ma badih karuwani kandriyen ta bahun, ma kasahan kawas tan ma kamanyah mwasin. Eme ma, iy babudon ja ta iri ndra-in nane iri mwan ma badih amekes bwe. Ma iy edeu gok eme tahi ta atiye sahou tan dah, ma bwidi bahun kano, ma iri mwan ma badih kasahan mwasin ja hawen. 20 Eme ma, ahi akohok boho Krais ma atiye sahou tan. Idoh, i buku Kindrei le amwenen aloh ili tiri lau na boho ahi. Ahi badeh, asehek sahou ta Krais amwenen ili tiri mwan ma badih, ma tiye tiri i buku doh: “Mwasin ta aha karuwani kandriyen ta bahun ma aha kasahan kawas ta Kindrei.” 21 Iy Krais doh, iy tanan ta amekes kandriyen ndra-in bwe, arile Kindrei ndratukumwi kandriyen ndra-in tataha marakon ndrala le bwele-en, ma iy asahan i buku ari ndramak ndra-in handru. Iy amekes i buku doh, ta taha winiyan are hawe Krais, ma na le boto-on tan amwenen, taha winiyan asahan iri mwan ma badih mwasin ta mada Kindrei.

Copyright information for `LID