aEksodus 16:18

2 Corinthians 8

Pol asehek ta nyala kandriyen ta tukumwi luk ta aseben iri lau rayah ja

Aha nadu tine aso i san ta Krais. Aso anya katiye tanan ta kandriyen mwasin ma tikisiy, Kindrei mene edeu ili tiri lau tan, mwan ma badih, are bada kon Masadoniya. Maha-an laba tinan labai asahan tiri ta none budon ma tekedek tiri. Arile, iri badeh, sekesek handru labai. Na bolo len dah badeh, tiri lakou bwe, ma iri asahan buku nadu nyohan. Arile, iri abudon iri lau ta Kindrei rayah, ma iri tukumwi luk solo-an labai, ta aseben iri lau rayah ja. Jo badeh, ndratanan, ma jo asehek amwenen ewek taha: Iri badeh, a-en hamon ta tanan ma so-ok tiri le ta adeu luk doh. Lakou tiri badeh, udu aliy, ta iri anya kadeu. Ehe, ma iri suriy labai, ma iri adeu ranah ili bwele-en ja. Iri abadok labai ta ndremenya ahi kaso-ok ta iri kabo gok hawe iri mwan ma badih ta atukum luk, ma aseben iri lau ta Kindrei are bada kon loboho Judiya mara-ei. Bwena badeh, ahi anya, iri kameh adeu rayah luk ta aseben iri lau ta Kindrei rayah badu Jerusalem. Ma iri bamekes bala buku aliy le bwe. Iri amekes kandriyen mwasin udu bwele-en labai ja. Ma bwena iri asehek ta sahou tandrakan ta iri ka-en hamon ta so-ok ta Laban ta lakou mara-ei. Ano, udu hamon ja, iri tiye ahi i buku doh, iri kameh a-en hamon ja tiri sahou ahi asehek tiri, ya iri amekes doh in hamon ta so-ok ta Kindrei le amwenen.

Bwena mene Taitus ewek orowei ndrine aha ta aha katukum luk, ma kaleheya tikisi taha ili tiri lau mwan ma badih ta Kindrei rayah ja. Eme ma, ahi abadok ta iy kewek hamon ja kaseben aha kabwidi iri gok doh kano mara-ei. Ta iri lakou mara-ei doh, aha badeh, amekes kandriyen mwasin labai. Ma aha atehei budon taha tinan labai in ta Kindrei. Aha badeh, amekes lahou boto-on labai ta atiye budon dah. Tanan taha solo-an labai, ma aha ale boto-on ta amekes gok ta Kindrei. Ma aha aso-ok ahi ale. Mwasin, aha badeh, ka-en le hamon ta kandriyen mwasin ta atukum luk, aha ndratehei katin bwena. Jo batiye ta aha katukum luk ma kadeu bwe. Jo asehek ta gok dah, iri lau ta Kindrei mwan ma badih badu kon tinan Masadoniya, iri sekesek ta amekes. Tasah, jo anya kanone aha, ma jo anya ki tanan tikisiy taha handru, o boho aha le.

Aha ndratanan Laban tataha Jises Krais, iy tikisi taha marakon tinan labai. Ma iy tawi lakou solo-an. Arile, ta aseben taha, iy ruwani iri lakou mara-ei doh, ma iy asahan buku ndramak laleyah tan ari lakou bwe. Ma iy asahan buku nadu nyohan, ta aseben aha akohok lakou solo-an, Kindrei anya kedeu kewek taha.

10 Ya, ta nyala luk ta salom, jo anya kasehek budon tek kewek taha. Na bolo jaha mene ndra-au on, aha badeh, atudun gok dah, ta atukum luk ta salom. Ma jo kasehek taha buku doh: Aha kabwidi gok dah kano mara-ei op. Tasah, aha badeh, asahan lau ma mwena handru are mwena ta budon ta gok dah, ma ta amekes. 11 Ya, nadah, aha kabwidi gok dah kano mara-ei. Aha ale kasekesek ta amekes gok dah kano mara-ei, i buku aha ma mwena mene sekesek ta atudun. I buku luk taha sabe udu aliy, mwasin, aha kakeh ki-in hamon ta so-ok ma tanan taha. 12 Buku aha aso-ok labai ta adeu lakou, mwasin, Kindrei aso-ok kandriyen badeh. Iy babudon ta lakou aha andriliu ta aliy, bwe. Iy abudon ta lakou badu bolo lokowa aha amwenen, ma iy sekesek le ta ndramas doh aha adeu.

13 Jo batiye ta edeu maha-an ewek taha ta aseben iri mwan ma badih rayah winiyan manyah ado mwasin bwe. Arile, na bolo len dah, aha bandriliu ta ari lakou bwe. Ya, iri lau ta Kindrei rayah badu Judiya badeh, iri ari lakou bwe mara-ei. Eme ma, idoh mwasin, buku hamon aha ado ndra-in, ya, iri ado mwasin ja; iri kameh winiyan abudon ma aseben aha ja. Ta kandriyen doh le, taha mara-ei kameh winiyan manyah ado mwasin. 15 Ya, buk ndrabun tiye i buku doh:

“Iri lau ale atukum nyamon solo-an, niri nyamon kameh solo-an bwe. Ya, iri lau atukum nyamon solo-an bwe, niri nyamon kameh solo-an labai.” a 

Pol tiye iri lau kala kaseben iri Korin katukum luk kili ta salom

16 Jo edeu wurah i ta Kindrei. Iy bwidi ndrine Taitus ato-ou ma iy abudon buku le ahi. Iy ale aso-ok ta aseben aha. 17 Eme ma, iy anya “mwasin” udu bada ahi ndremenya iy ta ewek atou aha. Iy abudon boto-on labai ta ewek, ma iy alokou iy ta ndremenya, buku ahi kaso-ok ta iy kewek. 18 Ahi tiye lau ta Kindrei ari ta ewek hawe Taitus ale. Ta bolo iri lau ta Kindrei mara-ei badeh, nadu tine taha ari le doh, iy nyaran udu aliy ta atiye sahou mwasin. 19 Idoh handru, arile sahou solo-an kahis. Iri mwan ma badih ta Kindrei kada-ah, atehei iy ta edek hawe ahi, ma aseben ahi ta amekes gok ta atukum luk ta salom. Ahi amekes gok dah ta atudun nyara Laban, ma ta leheya iri mwan ma badih ta Kindrei, budon tahi badeh, tinan labai ta aseben iri. 20 Ahi baso-ok ari mwan o badih aluhe kandriyen nane ahi amekes ta atondrok ndramas laba tinan dah, ja bwai. Eme ma, ahi atehei nadu tine taha ari doh, ewek hawe Taitus. 21 Tasah, ahi anya kamekes kandriyen mwasin, Laban aso-ok, ma iri mwan ma badih badu kon munyak mara-ei kanyolom ale.

22 Ahi atehei nadu tine taha lau ta Kindrei ari
(8:22) Taha bala tanan nyara lau ma la-uh ta Kindrei doh bwe. Uru anya kala hawe Taitus ala Korin. Ou anyolom kalan 8:18-20 ma hawe kalan 8:22.
ewek hawe uru ale. San solo-an ahi none iy ta iri gok mara-ei, ma ahi anyolom iy boto-on handru ta amekes iri gok doh. Nadah badeh, iy atehei budon tan boto-on handru, buku aha kameh amekes kandriyen mwasin ma atukum luk. Eme ma, iy abadok labai ta ewek hawe uru ta aseben uru ma ta amekes gok dah ale.

23 Ya, oro lau ma taloh kameh awek atou aha. Taitus badeh, aha tanan iy ai. Iy badeh, badu hawek handru en, ma aru amekes gok randra le, ta aseben aha. Ma nadu tine taha uru nane badeh, badu dah amwenen. Aha kameh winiya atanan uru ale. Uru badeh, amekes gok tiri mwan ma badih ta Kindrei badu kon dah, ma uru atudun nyara Krais na gok uru amekes. 24 Eme ma, aha kaleheya oro buku aha aso-ok oro tinan labai. Aha katondrok oro ma kaseben oro. Eme ma, iri lau ta Kindrei badu dah kameh winiyan anuhun ma atanan, aha aso-ok oro handru. Ma aha aso-ok nadu tine taha iri mwan ma badih ta Kindrei badu kon mara-ei. Ma iri kameh atanan ahi ta asehek sahou laleyah, ma sekesek laleyah ta gok aha amekes, bwe.

Copyright information for `LID