aNamba 16:5

2 Timothy 2

Timoti kasahan buku ndramak ta bahun ta Jises Krais

Ya, Timoti, ou badeh, buku naduk, ta lahou ta Kindrei. Len marakon ou ahas hawe Krais Jises, ma ou ales boto-on na le tikisiy tan eme tataha. Ya, iri sahou marakon ou ndranuhun jo ndrasehek udu bolo iri lau, idoh ou andrei, ma ou asehek kili tiri lau rayah ja, iri katondrok kamwenen, ma iri winiyan leheya iri lau rayah ja ale. Ou ales boto-on are hawek, ma bwese maha-an, buku ndramak ta bahun ta Krais Jises, iy ales boto-on labai. Handru, ou asahan buku ndramak ta bahun. Ndramak ta bahun aso-ok tinan tan udu bwele-en kasekesek ta gok iy amekes, ya iy winiyan bateu gok rayah hawe gok tan ja bwe. Eme ma, ou a-en hamon le ta gok Kindrei ndratehei ndrawek tam, ma ou salelei sala le tiri lakou anya kariu ou. Ou asahan ale buku ndramak iy sakaliye ta nyorei. Ndramak sakaliye ta nyorei, iy badeh, ki-in hamon le ta sahou batanau ta nyorei. Buku bwe, iy winiyan bakohok ndramas doh bwe. Eme ma, ou atondrok koham kamwenen, ma ou a-en hamon le ta gok nane Laban ndratehei ndrawek minem, ma hamon kameh iy edeu ndramas ewek tam. Ou asahan ale buku ndramak atah bilin. Iy asa-ar labai ta atah ma ta atondrok bilin, ma iy amwenen badeh, akohok nyamon ere bwena tiri lau rayah. Eme ma, buku ou amekes gok laba tinan ta Laban Krais Jises, iy kameh edeu lakou mwasin ewek tam. Ou abudon kamwenen ta sahou jo asehek dah. Tasah, buku ou amekes i buku doh, Laban kameh bwidi budon tam mara-ei aleu, ma ou kameh atanam moso iri sahou marakon dah.

Len marakon jo aso-ok ou bwetenei gok ta Jises Krais mene amekes, ma idoh winiyan aseben ou ales boto-on, ma bwese iri maha-an. Jises badeh, badu boho kamen hawe kabin Debit, ma iy banoh ta bwese iri maha-an bwe. Iy mene imek, ano Kindrei mete-ei iy eme awas ja. Iri sahou mwasin dah, jo ndrasehek ndrala tiri lau. Ou bwetenei jo ale, ta ales boto-on ma bwese iri maha-an. Jo ndratiye sahou mwasin, eme ma, ta kandriyen le doh iri lau abudon anya jo ndramak ndra-in, ma iri atehei jo ili bolo asiu lulik. Arile, sahou ta Kindrei winiyan bala bado bolo asiu lulik barah bare gwek bwe. 10 Eme ma jo sekesek ta ato-ou iri maha-an mari ale asahan tek. Jo bwese iri maha-an ta aseben iri mwan ma badih marakon Kindrei ndrandromwei iri ndrala tan, ma jo anya, iri kameh kakohok kohan handru ta Jises Krais doh, ma iy kameh winiyan andrei iri ala ado hawen are kandrah ta are le buku doh.

11 Taha kales boto-on ta bwese iri maha-an, tasah sahou dah handru, ma iy asehek i buku doh:

“Buku taha amak hawe Krais,
taha kameh ado awas hawen ale.
12 Buku taha ales boto-on ta bwese maha-an marakon,
taha kameh asahan kabin tiri mwan ma badih are hawen.
Buku taha adeu kona taha ili tan,
iy kameh edeu konan eme tataha ale.
13 Buku taha anya, taha ka-en hamon tan, arile taha ba-en hamon ta sahou tataha amwenen bwe, ndri-iy ai,
iy ki-in hamon ta sahou tan le amwenen, ma iy kameh atehei taha a ta mada sahou.
Tasah, iy winiyan batubuni sahou tan amwenen bwe-en!”

Timoti kamekes gok boto-on buku ndramak handru ta lahou ta Kindrei

14 Len marakon, ou aliu budon tiri lau ta leheya sahou dah, jo mene edeu ndrawek tam. Ma ou asehek boto-on kili tiri ta mada Kindrei ki buku doh: Iri satebelese sala ta sahou batanau. Kandriyen ta sahou tebelese doh kameh winiyan baseben ari ndramak ta in hamon ta Kindrei bwe. Kandriyen doh, ta sokolowa budon tiri lau le ta anuhun sahou solo-an doh.

15 Ou abo gok boto-on handru ta asahan lohowan mwasin ta mada Kindrei, eme ma iy winiyan aso-ok gok tam. Buku ou asahan lohowan mwasin, bwilin winiyan bama ta gok tan bwe, tasah Kindrei anyolom ou, ma ou atiye sahou tan amwenen handru. 16 Bohom sala tiri sahou ndra-in, ari moson bwe. Tasah, iri sahou doh, iri lau amekes ta ariu lau a sola ala le san ta adeu kona iri ili ta Kindrei. 17 Sahou ndra-in tiri doh, i buku ndrana laba tinan ndra-in, iy aimon bada ndramak bilisiu ili ili ma andra-i mara-ei. Himeneyus uru Piletus badeh, badu bolo iri adeh, ta amekes sahou ndra-in doh. 18 Iri lau buku doh badeh, bado se mirihik bwai, ma iri teleya sahou handru. Iri asehek sahou i buku doh: “Kindrei badeh, ndramete-ei iri lau tan ja, ma taha an hamon kada-ah winiyan bamak bame awas ja bwe.” Eme ma, na sahou le doh, iri ndraruwiy ma ndrabolowani budon tiri mwan ma badih rayah handru.

19 Arile, sahou ta Kindrei kameh asahan buku iy mene ndratiye. Iri lau a-en hamon ta Kindrei, iri kameh a buku ndru, Kindrei ndratahiy, ma ales udu le ta atah asiu ili bwele-en. Ma udu ta ndru doh badeh, Kindrei torowenei sahou randra i buku doh:

“Laban badeh, ndratanan iri mwan ma badih tan.” a 
Ya,

“Are lau anya, iri ta Kindrei ma Kindrei atondrok iri, ya iri katehei kona iri kili ta kandriyen bamwenen bwe.”
20 Bolo iri asiu tinan badeh, bwekei solo-an solo-an udu aliy. Rayah iri amekes na bek nyikilikin ma silba, ma rayah ja iri amekes na kei ma ndren. Iri bwekei, nane amekes na bek nyikilikin ma silba, iri ta gok tinan le buku molak, tasou ha-un, kabek ma tukum ta nyamon tinan. Arile, bwekei iri amekes na kei ma ndren, badeh, ta amekes nyamon ili aliy ta gok nadu bwisik laleyah ta len marakon. 21 Eme ma, iri lau akahei kandriyen ndra-in udu ndrine iri eme len, ma asahan ha-un ja, iri lau doh badeh, buku bwekei iri amekes na bek nyikilikin ma silba, iri lau amekes nyamon i bolon ta gok mwasin ta molak le. Kindrei winiyan akohok iri lau rayah doh, ma iri winiyan amekes gok mwasin. Handru, iri alokou ta amekes iri gok rayah mwasin.

22 Ya, Timoti, buku ou anya asahan buku bwekei mwasin don eh, idoh badeh, ou atobwak a len labai ta iri kandriyen ta ndrine iri lau loweu aso-ok. Ma ou abo gok boto-on in le hamon ta kandriyen mwasin ma amwenen, ma hawe budon mwasin ta Kindrei, kandriyen ta aso-ok iri mwan ma badih rayah ja, kandriyen ta ndrine taha kudu mwasin. Ma ou amekes iri kandriyen doh, hawe iri mwan ma badih, ndrine iri ndraleu mara-ei, ma iri asolom ili ta Kindrei kaseben iri ka-en hamon tan le amwenen. 23 Ma ou adeu konam kili tiri sahou ari katin ma moson bwe. Tasah, ou tanam iri sahou doh badeh, ta amekes kandriyen ta tebelese asahan. 24 Arile, are lau handru amekes gok ta Laban, iy badeh, sasahan ndramak ta tebelese hawe iri lau rayah ja. Iy badeh, kamekes kandriyen mwasin kili tiri lau. Iy ale kasahan ndramak ta leheya, ma iy samekes bundruwe losen sala tiri lau, ma iy kasahan ndramak ta udu le udu. 25 Ma iy kaleheya iri lau nane amekes ndra-in ili tan, ma iy ale kamekes kamunum le ta amekes budon tiri lau nane tebelese hawen. Iy kamekes ki buku doh, tasah Kindrei kameh aseben iri, ma iri kameh winiyan tubuni ndrine iri, ma iri kameh winiyan atanan ta sahou handru, ma iri winiyan a-en hamon tan. 26 Ma iri ale kamani iri kandriyen tiri i buku kubwin ta balik amekes ta aturuk ma amekes iri i ndra-in mara-ei. Balik badeh, ta atamar iri lau ta ka-en hamon ta so-ok tan. Arile, buku iri ndratanan sahou handru, budon tiri kameh winiyan aleu amwenen ja, ma iri kameh winiyan ruwani kubwin ta balik.

Copyright information for `LID