2 Timothy 4

Timoti badeh, kabadok ta atiye sahou ta Kindrei

Krais Jises kameh eme hamon ja, ma iy asahan kabin ta atondrok iri mwan ma badih marakon. Ma iy ale kameh aleben iri lau are ndra awas ma iri lau ndramak bwena. Jo abudon ta aliy, ma Kindrei hawe Krais Jises, uru anyolom jo, eme ma jo tiye sahou boto-on ewek tam i buku doh: Ou atiye sahou ta Kindrei. Ya, ou abudon ta lakou doh kameh asahan, ma ou atiye sahou ta Kindrei kili. Buku iri lau alokou iri ta anuhun sahou, o, iri balokou iri bwe, ndri-iy ai. Len marakon ou abadok ta atiye sahou tan kili. Sahou tam badeh, korou ndrine iri ta asor iri ta tobolowe ndrine iri, ma karuwe kandriyen ndra-in. Ou suruni ndrine iri ta a-en hamon ta kandriyen ta Kindrei. Ou leheya iri ki buku doh, arile ou winiyan bandra-i hawe iri bwe. Ou abo gok le, ta leheya iri. Ou amekes ki buku doh, tasah hamon kameh iri lau winiyan baso-ok ta anuhun sahou mwasin bwe. Iri kameh a-en hamon ta so-ok tiri le amwenen, ma amekes kandriyen ndra-in. Eme ma, iri kameh akohok lau ta leheya solo-an labai, ma lau ta leheya doh kameh leheya iri mwan ma badih, ta lakou iri abasa labai ta anuhun. Ma, iri kameh adeu kona iri ili ta sahou handru, ma iri adeu ndranye iri ili ta anuhun iri kundruh laleyah. Arile, ou le amwenen winiyan bamekes buku doh bwe. Ou atondrok budon tam kamwenen na len mari, ma ou abadok ta bwese iri maha-an anya kewek bwele-em. Ou badeh, lohowan ta Kindrei, eme ma ou atiye sahou mwasin tan kili tiri mwan ma badih, ma ou amekes gok tam handru ta aseben iri lau.

Pol mirihik anya kimek

Ya, ou a-en hamon tiri lakou mene jo ndrasehek tam, tasah len tek ta imek badeh, ndrame mirihik labai. Ma ndrayek kameh amou i buku waen, iri lau ale adeu i ta Kindrei i nyara salom. Jo badeh, akeh lim mwasin labai, ma jo ndrabwidi nyorei doh badeh, ndrano mara-ei. Jo badeh, tawi budon mara-ei doh ihis labai. Ya, ndramas ari udu aliy abe-en jo. Ndramas doh i buku barak ari ta kandriyen mwasin labai jo ndramekes ta bolo nyorei. Laban badeh, anuhun sahou ta lau amwenen labai, ma udu ta len ta sahou, iy kameh edeu barak doh eme tek, ma i tare lau ja nane atehei budon tiri in ta anyolom iy eme hamon ja.

Timoti keme suwi kanyolom Pol

Ou asilah san tam, ta ame hawek suwi. 10 Demas badeh, atehei budon tan in tiri lakou mara-ei badu munyak, iy ndraruwani jo, ma iy ndra-au ndrala Tesalonaika. Ya Kresens badeh, ndra-au ndrala Galesiya. Ya Taitus ndrala Dalmesiya. 11 Luk le ari badeh, udu hawek kada-ah. Buku ou anya ame, ou andrei Mak, ah ma la-uh kame, tasah iy mwasin ta aseben jo ta gok tek dah. 12 Jo suni Tikikus ndrala Epesus.

13 Buku ou anya ame, ou andrei awin tek lawe-en mene jo ruwaniy udu hawe Kapus udu ndra Trowas. Ma balem samani iri buk tek, ma hawe iri buk tek rayah ale iri amekes na ku-i katin haka.

14 Balem kudu ta Aleksandra, iy ndramak ta amekes lakou i hayen, tasah iy mene amekes ndra-in solo-an labai eme tek. Laban kameh konohei iy, ta saba lakou iy amekes. 15 Eme, balem kudu tam ta ndramak doh. Tasah, iy mene ndratebelese boto-on labai hawe aso ta sahou ta Laban taha atiye.

16 Ma bwena handru jo ales udu ta sahou, ma asumon boho ndramak ta anuhun sahou badeh, ari ndramak bales bare hawek, ma aseben jo ta asumon sahou bwe-en! Iri lau marakon anoh, ma iri ruwani jo. Jo asalom ili ta Kindrei ta iy sabudon ta ndra-in iri amekes eme tek doh. 17 Arile, Laban ndrame ndrales ndrare hawek, ma iy atadau jo. Eme ma, jo mene winiyan atiye iri sahou mwasin marakon, ma iri lau badu leheleh marakon winiyan anuhun. Ma Kindrei mene aseben jo, ma iy andrei jo eme len ta sahou laba tinan doh. I buku iy ndraruwi jo ndrame len ta lihi layon. 18 Eme ma, jo tanan Kindrei kameh tolowei jo ta iri lakou marakon ndra-in iri lau dah anya kamekes keme tek, ma iy kameh andrei jo ili bolo tondrok tan udu kandrah. Ya, taha badeh, katudun nyaran kudu le buku doh. Handru!

Sahou sekesek ta Pol

19 Ou tiyani bada-an tek kili ta Prisila uru Akwila, ma kili ta lowa Onesiporus oro. 20 Erastus badeh, ere ndra Korin kahis. Ya, Tropimus badeh, sik udu tan, ma jo ruwani iy udu ndra Miletus. 21 Eme ma, jo aso-ok ou asilah san suwi ta ame. Kora-on len ta ur ma jor laba tinan kasahan.

Yubulus, Pudens, Linus, Klodiya, ma iri lau ta Kindrei are kada-ah badeh, anya bada-an tiri mwasin ewek tam.

22 Jo asolom ili ta Laban iy winiyan udu hawe malawim, ma aseben ou. Ma tikisiy ta Kindrei winiyan udu hawe aha lau ta Kindrei mari.

Copyright information for `LID