Acts 10

Koniliyus aloh Pita

Udu kon Sesariya doh badeh, ndramak ari nyaran Koniliyus udu aliy. Iy badeh, batun tinan ta atondrok lau ta bahun ma rinek (100) badu Rom. Iy ma hawe iri lau ta bahun tan badu rakum iri aloh lau ta bahun badu Itali. Koniliyus ma hawe lowan oro badu Juwis bwe, arile iy ma hawe oro mara-ei ado asiu tan badeh, atudun Kindrei le ai. Iy badeh, edeu lakou i tiri lau lakou bwe, ma amekes salom i ta Kindrei na bolo len mari. Eme na beyeh ari, mada an taloh badeh, iy amekes lele. Eme iy anyolom angelo ta Kindrei ari eme asahan hawen anya, “Koniliyus, ei!”

Eme Koniliyus anyolom ales i tan ma iy inoh, ma iy anya, “Laban tek, ou aso-ok sasah?”

Eme angelo dah anya, “Kindrei ndrasumon salom tam ma iy ndranyolom sasah ou anyohan i tiri lau lakou bwe, ya balen bamani ou bwe.
Abo, ou suni rayah lau kala Jopa kakuhi ndramak ari udu aliy nyaran Saimon keme, iri ale aloh iy Pita. Iy badeh, udu asiu ta liyen Saimon, ndramak ta asereh ku-i katin haka, ya asiu tan udu kabede ndras.”

Ano iy angelo nane asehek sahou i tan iu badeh, Koniliyus eme luhi uru lohowan tan ame ma hawe ndramak ari ta bahun. Iy ndramak ta bahun doh badeh, atehei budon tan handru in ta Kindrei. Ma iy badeh, ta lohowa Koniliyus na len mari. Koniliyus eme sihidi sahou mari ta angelo nane asehek i tan, ano i toro, ano iy tiye oro ala Jopa.

Pita amekes lele

Kon aleu, len ari ja, mada an udu le alih badeh, oro ma taloh ndradek ndrala mirihik ta san ili bolo kon tinan Jopa. Na len doh badeh, an nyarahan labai, Pita eme ili loken asiu ta Saimon ta akohok jor, ma iy anya kamekes salom kili ta Kindrei. 10 Eme Pita imeson handru en, ya eme iy aseken labai ta aimon nyamon.

Ya nyamon oro lowosa kahis le badeh, lele asahan tan.
11 Eme iy anyolom kandrah asak ya lakou i buku none ra-ei kolau tinan suwin ma hahuw udu kandrah eme munyak. 12 Udu bolon badeh, iri katin haka randrah randrah, ma hawe iri sasah ta seselek badu bwele-e munyak, hawe iri sirih badu reu, ado bolo lakou nane doh. 13 Ano sahou ari aloh i tan anya, “Ou are loken, adai iri lakou doh, ma ou aimon.”

14 Eme Pita anya, “Laban, bwe, bwe handru en! Jo badeh, baimon se ari nyamon ko-ak i buku doh bwena bwe le!”

15 Eme Kindrei aloh san rasan ja anya, “Ou badeh, saloh anya iri lakou, Kindrei sikinei ko-ak ndra-au, ya ou saloh ko-ak udu aliy ja ai, ndri-iy.”

16 Kindrei aloh i san tulusin ano, suwi labai kolau dah iu i kandrah ja.

17 Pita lomondra moso iri lakou nane iy anyolom kahis le badeh, oro lau nane Koniliyus suni oro ame ndratakalahei asiu nane Pita udu aliy. Ya, eme oro are rasi are madasan are gwek. 18 Eme oro aloh ma ndremenya anya, “Saimon, iri aloh Pita udu aliy deh bwe?”

19 Pita lomondra ta lele kahis le badeh, Malawin Ndrabun tiye i tan anya, “Saimon ei, lau taloh takaleh ou. 20 Ou suri ou, ya ou au ala andri. Ou sanoh ta ala andri hawe oro. Oro badeh, jo suni oro.”

21 Eme Pita ili andri tiye i toro anya, “Ado asilah jo, jo asah idah. Ado ame dah luwa sah?”

22 Eme oro lau anya, “Aso dah ado hawe Koniliyus ndramak batun tiri lau ta bahun badu Rom ame dah. Iy badeh, ndramak mwasin handru ma iy badeh, inoh Kindrei labai, ma iy badeh, iri lau mari badu Isra-el aso-ok iy tinan labai. Angelo ndrabun badeh, tiye tan ta ou ala asiu tan, ya eme iy kanuhun sahou badu bohom.” 23 Ano Pita kuhi oro ala asiu hawen amadin.

Pita udu asiu ta Koniliyus

Eme kon aleu badeh, Pita i hawe oro ma hawe nadu tinen oro rayah badu Jopa ala hawe oro ma oro adek au ala.
24 Ano i bada len ari ja badeh, iy isos Sesariya. Ya Koniliyus badeh, abe-en oro kameh asahan na len doh. Eme iy luhi oro kawas tan, hawe lowan oro badu mirihik tan ala hawen. 25 Eme Pita ili bolo asiu le badeh, Koniliyus asumon iy, ano iy i andri na bwili ndru-un ta sekesek iy. 26 Arile, Pita tiye iy ere loken ma tiye anya, “Jo dah badeh, ndramak laleyah labai.”

27 Pita asehek sahou hawen ano iy i bolon badeh, anyolom iri lau solo-an labai. 28 Eme iy tiye i tiri i buku doh, “Ado badeh, tanan idoh badeh, ba-en hamon ta batanau malen bwe, ta ahi lau badu Juwis winiyan ba-en bolo aha

bwe, ma ahi saselesen aha lau badu leheleh. Arile, Kindrei mene ndraleheyani ndrame tek, ta jo badeh, saloh ari ndramak ndra-in ta mada Kindrei.
29 Ya eme ado ala andrei jo eme dah, jo bandremenya ado ta aliy, bwe. Ya abo, sasah handru ado aseken?”

30 Eme Koniliyus anya, “Len hahuw mene ndra-au, na mada an taloh na beyeh badeh, jo udu asiu tek asolom. Nawin bwe badeh, ndramak ari asini awin belen nyikadin, ales udu bwena tek, 31 ma tiye eme tek i buku doh, ‘Kindrei badeh, ndranuhun salom tam ma hawe kandriyen mwasin tam, ta ou adeu lakou laleyah i tiri lau lakou bwe. 32 Ou suni ari ndramak kili Jopa kalelen ta ndramak ari nyaran Saimon Pita. Iy badeh, udu asiu ta liyen Saimon, ndramak ta asereh ku-i katin haka, udu kabede-e ndras.’ 33 Eme jo suni oro awek suwi ta atou ou, ma mwasin handru ta ou ame. Ya abo, aso mari kada-ah are mada Kindrei ta anuhun sasah Laban tiye ewek tam ta asehek eme taso.”

34 Ano Pita asehek anya, “Kabwai, na dah jo ndranyolom handru ta Kindrei badeh, baseken ndramak rayah le bwe. 35 Arile, iy badeh, aseken lau mari badu kon munyak tinan labai, buku ndramak ari ari anoh iy, ma amekes kandriyen mwasin le. 36 Ya idah badeh, ado tanan sahou mene Kindrei tiye i tiri lau badu Isra-el, ta iri katiye sahou mwasin ta amekes mondrei i san ta Jises Krais, iy le ari, Laban ta lau mari. 37 Ado badeh, ndratanan sasah mene asahan bolo Judiya in hamon ta Jon ta alomwa atiye sahou ta iri lau kanyuwi iri. Lakou doh asahan udu Galili bwena. 38 Ma ado ndratanan i san mene Kindrei atehei nyosowan ta Malawin Ndrabun hawe boto-on ili ta Jises badu Nasaret. Ma hawe iy edek ili eme ta amekes lahou mwasin hawe amekes iri lau mene are le bahandra boto-on ta balik. Tasah, Kindrei badeh, udu hawen.

39 “Aso dah badeh, anyolom na mada aso amwenen, ta lakou mari iy amekes udu kon munyak tinan tiri Juwis ma hawe Jerusalem. Iri badeh, adai iy ma atahi iy imek i bada kei tondreh. 40 Arile, Kindrei suri iy ta imek tan udu hamon ta len taloh ma leheyani iy i mada iri lau solo-an anyolom iy. 41 Iri lau mari badeh, banyolom iy bwe, arile Kindrei lebelei le aso lau le mene anyolom iy, ma aimon nyamon ma a-un gwa hawen, udu hamon ta iy amak eme loken ta imek. 42 Iy badeh, batanau boto-on labai ta aso katiye sahou kili tiri lau mari ma katiye, iy le badeh, Kindrei atehei lahou i tan ta aleben sahou tiri lau ndramak bwena, ma hawe iri

lau ma mulin kahis.
43 Iri propet badeh, tiye nyalan ale, buku none are lau atehei budon handru in tan badeh, karei ma lomondra ndra-in tan kameh, iy maniy i san ta nyaran.”

44 Pita asehek sahou doh kahis le badeh, Malawin Ndrabun eme bwele-e iri lau mari nane anuhun sahou dah. 45 Eme ma iri Juwis ta asan ku-i iri, atehei budon tiri in ta Jises, ado hawe Pita badeh, boho iri asak ta Malawin Ndrabun amou laleyah i tiri lau badu leheleh ale. 46 Tasah, oro anuhun iri badeh, asehek boho kon rakon labai ja, ma atudun Kindrei. Ano Pita anya, 47 “Are lau handru winiyan tawi oro lau doh, ta salomwa oro na gwa? Oro badeh, ndrakohok Malawin Ndrabun i le buku aso mene.” 48 Ya, eme iy tiye ta kalomwa oro na boto-on ta nyara Jises Krais. Ano oro tiye Pita udu hawe oro len sabe op.

Copyright information for `LID