Acts 14

Udu kon Ikoniyum

Udu kon Ikoniyum badeh, Pol uru Banabas ala ndrahu tukum tiri Juwis i buku none uru ndramekes ndra-au ndra-au. Eme uru asehek sahou nyarahan labai, eme iri lau solo-an badu Juwis, hawe iri lau badu leheleh atehei budon tiri handru ihis. Arile, oro Juwis rayah batehei budon toro handru bwe badeh, sosokok budon tiri lau badu leheleh andra-i i bada iri lau ta Laban. Eme Pol uru Banabas are gwek luluwen sese, asehek sahou boto-on ta Laban. Eme Laban leheya sahou ta tikisiy tan, uru asehek i handru i san ta iy edeu boto-on i turu ta amekes kalem ma lahou tinan. Ma eme iri lau badu bolo kon tinan doh, apou iri i lumuk; iri rayah badeh, a-en hamon ta budon tiri Juwis, ya iri rayah badeh, a-en hamon ta budon tiri aposel. Ano, iri Juwis hawe iri lau badu leheleh ala atilik sahou hawe iri lau ta bwena tiri anya, kadai uru ma anya korou uru na bek. Arile, uru takalahei tanan tiri doh, ma eme uru atobwak au ala kon tinan Listra hawe Debi, udu kon tinan Likoniya, ma hawe uru ala loboho kon munyak doh ale. Eme uru atiye sahou mwasin ta nyala Kindrei ili tiri mwan ma badih udu loboho idoh.

Udu kon Listra hawe Debi

Eme udu Listra badeh, ndramak ari tinen atehei iy eme len badeh, katin imek. Iy badeh, badek bwe ma iy manyah udu le andri. Eme iy atehei ndranyen i ta Pol asehek sahou. Eme Pol anyolom amwenen i tan badeh, iy anyolom budon tan handru udu aliy ta iy winiyan asahan amwenen ja. 10 Ya eme Pol aloh, “Ou ales na katim are loken!” Eme ma ndramak dah sandroh eme loke ma iy edek ja.

11 Eme iri lau anyolom sasah nane Pol amekes badeh, ma iri aloh i boho kon Likoniya anya, “Iri kindrei badeh, ndrasahan ndrame awas hawe taha!” 12 Eme iri aloh Banabas badeh, Sus ya Pol badeh, iri aloh iy Hermes
(14:12) Iri Grik masiye nyam tiri solo-an i buku kindrei tiri. Sus doh badeh iri tiye anya iy doh badeh, kabin ta kon doh. Hermes doh badeh, nyara nyam tiri ari ja, iy ta atiye ma asehek sahou tiri nyam mari.
tasah iy ndramak tinan ta asehek sahou.
13 Ya pris ari ta kindrei Sus, asiu tan ta atudun badeh, udu manan mirihik ta madasan ta kon tinan. Iy kuhi iri bulumakau hawe kanyeu ili madasan ta asiu ta atudun. Tasah, iy ma hawe iri lau anya kamekes salom kili ta Banabas uru Pol.

14 Eme Banabas uru Pol anuhun le badeh, uru tarani awin ta la-u uru iu ma uru sakaliye ala bolo iri lau dah aloh anya, 15 “Ado lau, ado anya kamekes lakou badeh, ta sasah? Aru dah badeh, ndramak laleyah i buku le ado badeh. Aru dah badeh, atiye nyala ado ta sahou mwasin ta ado badeh, katubuni ndrine ado ta lakou ndra-in laleyah i buku badeh, ki ta Kindrei kohan handru udu aliy. Iy le adeh mesekei munyak ma kandrah, ndras ma hawe lakou mari udu bolon. 16 Bwena ndra-au mene iy alelei iri lau mara-ei badu kon munyak adek na seken tiri. 17 Arile, iy badeh, leheya mwasin tan eme lewan ta sasah iy amekes: Iy badeh leheya laban tan i san ta iy edeu ur undruk udu kandrah eme andri ma iy badeh, isan len ta nyamon uni ma akohok; ma iy edeu nado nyamon solo-an solo-an ma iy mesekei ndrine ado idih na sekesek.” 18 Buku, sahou doh uru asehek ai, arile boto-on labai, ta uru satobohei iri. Iri anya kasun salom i turu le ai.

19 Ano iri Juwis rayah badu Antiyok, ma badu Ikoniyum ame andresei iri anuhun boho oro. Eme iri orowei Pol na bek, ma anya deh, iy ndramak, ma aluwi iy eme manan ta kon tinan. 20 Arile, udu hamon ta iri lau atehei budon tiri handru in ta Kindrei awudi iy, ano badeh, iy suri iy eme loken edek iu ili hamon ja ili kon tinan. Ano len ari ja badeh, Pol uru Banabas au ala kon Debi.

Uru ala hamon ja ala Antiyok kon udu bolo Siriya

21 Uru asehek sahou udu bolo kon tinan doh badeh, ma aluwi iri lau solo-an labai atehei budon tiri handru i ta Kindrei. Ano uru ala hamon ala Listra, ano ala Ikoniyum ma ala Antiyok. 22 Oro ala badeh, batanau iri lau ta budon handru badeh, kabadok ta tanan handru ta bolo budon handru tiri. Eme uru anya, “Taha kameh bwese maha-an solo-an solo-an, ano taha barala baha tondrok ta Kindrei.” 23 Ano Pol uru Banabas atehei lau mwasin kasahan batun ta atondrok iri lau ta Kindrei badu kon rakon rakon. Eme iri abeles iri ta aimon nyamon, ma amekes salom i toro ma atehei oro a mine Laban ta lahou iri atehei i kani oro ta amekes. 24 Ya udu hamon ta uru ala loboho Pisidiya, badeh, uru ame bolo kon munyak tinan Pampiliya. 25 Ya eme uru atiye sahou mwasin i tiri lau ado kon tinan Pega, ano uru ala andri ala kon tinan Ataliya.

26 Ano udu kon Ataliya badeh, uru alakak ala hamon ala Antiyok. Kon tinan doh mene iri lau ta Kindrei suni uru ala a len, ta amekes lahou mene i kani uru i san ta tikisiy ta Kindrei. Uru ndramesekei lahou turu ndrano, ma uru ame hamon ame Antiyok ja. 27 Eme uru ala asos Antiyok badeh, uru nyuruwini iri lau ta Kindrei atukum, ma tiye i tiri ta lahou mari Kindrei ndramesekei na mine uru, ma i buku sah Kindrei ndrasihi san ndra tiri lau badu leheleh ta budon handru. 28 Eme uru ado hawe iri lau ta hamon ta Kindrei luluwen handru ado gwek.

Copyright information for `LID