cJowel 2:28-32
dWari 16:8-11
fWari 110:1

Acts 2

Malawin Ndrabun eme andri na Pentikos

Eme len ta Pentikos
(2:1) Len ta Pentikos asahan len lomonoh (50) hamon ta len tinan iri aloh Pasoba. Ou anyolom buk ta Lebitikus kalan 23:15-22.
asahan badeh, oro mari atukum ame kon rasi le.
Eme nawin bwe badeh, nyaro lakou asahan i buku none nyaro siyer tinan atohou udu kandrah eme andri idih bolo asiu nane oro areu aliy dah. Eme oro anyolom jih anya eme andri, ma weleyaniy i la-u oro ari ari. Eme Malawin Ndrabun anyuhi ndrine oro, ma mesekei oro badeh, asehek boho kon randra doh, randra doh.

Ya udu Jerusalem badeh, iri Juwis ta atudun Kindrei badu kon mari manyah ado aliy. Eme iri anuhun kurutuwe lakou doh badeh, iri arou ame. Tasah, iri ari ari badeh, boho iri asak ta anuhun oro badeh, asehek sahou na boho kon tiri mari. Eme mani iri atur labai, ya iri lomondra ma anya, “Oro lau asehek sahou kede-eh badu Galili o? Arile, i buku sah ja to anuhun oro asehek sahou na boho kon ta to mari? To badeh, badu kon munyak tinan Partiya, Midiya, ma Elam. To ale badu kon munyak tinan Mesopotemiya, Judiya, Kapadosiya, Pontus hawe Esiya. 10 Ma to badeh, badu kon munyak tinan Prijiya, Pampiliya, Ijip, hawe kon rayah badu Libiya udu mirihik ta kon Sairini. Ma udu ndrokowa to badeh, iri lau badu Rom adek ame dah ale. 11 Ma to badeh, Juwis hawe oro lau badu leheleh ala a-en hamon ta leheya tiri Juwis; ma hawe to lau rayah badu busu Krit hawe badu kon munyak tinan Arabiya; badeh, to mari anuhun sahou nyarahan ta lahou tinan ta Kindrei oro asehek i boho kon ta to amwenen.” 12 Eme ya mani iri atur ma budon tiri bameles bwe, ma eme iri ndremenya anya, “Lakou dah, asahan i buku sah handru?”

13 Arile iri rayah badeh, bobose oro anya, “Oro kede-eh, a-un waen solo-an labai.”

Pita asehek sahou i tiri lau

14 Ano Pita suri iy ere loken hawe oro ma ronoh ari dah, aloh i tinan ma asehek sahou i tiri anya: “Ado nadu tine badu Juwis ma hawe ado lau mari areu Jerusalem dah, ndranye ado kasak, ya jo kasehek kaleu kewek tado. 15 Oro lau dah badeh, ba-un gwa boto-on bwe. I buku bale ado badeh, bwe. Kon mandraben kahis le oh, mada an barala ndro ari adeh!
(2:15) Pita asehek i buku doh, tasah kandriyen tiri Juwis iri winiyan ba-un gwa boto-on na mandraben bwe.
16 Arile, idoh lakou mene propet Jowel asehek nyala aliy:

17 “Kindrei anya, ‘Suniya len anya kano kameh,
jo kameh solowei Malawik i la-u lau mari badu kon munyak.
Ya iri nadu ado mwan ma badih kameh asehek sahou i buku iri propet,
ma iri lau loweu tado kameh amekes lele,
ma hawe oro lau tado ndrala bada ndramak kameh ameh solo-an.
18 Ma hawe oro lohowan tek mwan ma badih na len eme kameh,
jo kameh solowei Malawik i la-u oro,
ya oro kameh winiyan asehek sahou i buku iri propet.
19 Jo kameh leheya kalem udu bada kandrah loken,
ma udu bada munyak andri ale.
Idah kameh, ndra ma hawe jih ma hawe kasu-er hutuwen kameh asahan.
20 Ya an kameh amak ma kon ilik,
ma bun kameh asaram i buku ndra.
Ya lakou doh kameh asahan bwena op.
Ano len tinan ta lomadan ta Laban asahan.
21 Ya lau amekes salom na nyara Laban
ma ndremenya iy ta seben kameh, iy winiyan sebenei iri.’ c 
22 “Ado lau badu Isra-el kanuhun sahou doh. Jises Krais badu Nasaret mene, Kindrei suni iy ewek hawe ado. Ya iy mene amekes lahou tinan ma amekes kalem tinan na boto-on ta Kindrei edeu i tan udu ndrokowa ado. Ya ado tanan iy. 23 Bwena mene Kindrei ndratanan iri lakou kameh asahan hamon, ma iy bwidi iri lakou asahan na le tanan ma seken tan. Eme ma, ado badeh, atehei iy i mine iri lau ndra-in, ma iri atahi iy imek i bada kei tondreh. 24 Arile, Kindrei mete-ei iy amak eme awas ja ta imek; ma sebenei iy ta sisi-in ta imek. Tasah, imek badeh, winiyan batawi iy bwe. 25 Tasah, Debit mene asehek nyalan i buku doh:

‘Jo badeh, anyolom Kindrei udu madak na len mari.
Tasah, iy badeh, udu loboho lim salin hawek ya jo winiyan banoh bwe.
26 Eme bwidi ndrinek sekesek ma jo asehek ta aliy,
Ma jo ale atondrok ta lakou mwasin handru kameh asahan hamon.
27 Tasah, ou winiyan baruwani jo bamak bado bolo munyak dah bwe. Ma ou winiyan baruwani bada lau tam mwasin labai sabola sado bolo lek.
28 Ou badeh, ndraleheyani jo ta san mwasin ta akohok kohak handru ta udu le buku doh.
Ou kameh ado hawek ma atehei sekesek tinan labai eme tek.’ d 
29 “Ado nadu tine, jo katiye tado kamwenen. Tubu taha Debit mene imek ma ahi iy. Ya lek tan asah udu hawe to kahis le eme taku dah. 30 Iy badeh, propet ya iy tanan tandrakan ta Kindrei mene tandrakan iy. Kindrei badeh, tandrakan ta lundriyen oro ari kameh asahan kabin, i buku le

iy amwenen.
31 Debit ndratanan ta lakou doh, Kindrei anya kamekes hamon, ma iy ndratanan Krais
(2:31) Krais badeh, ndramak Kindrei ndraleheyani ta akohok taha ame hamon.
nane, iy kamak udu bolo lek tan keme awas ja. Eme ma iy tiye i buku doh, Kindrei kameh winiyan baruwani iy bado ndrahune iri lau amak ado aliy bwe, ma badan kameh winiyan babola bwe.
32 Kindrei badeh, mete-ei Jises amak eme awas ta imek. Eme ya aso dah badeh, asehek nyala lakou handru mene asahan. 33 Iy ales ili udu loboho lim salin ta Kindrei ma akohok Malawin Ndrabun udu mine taman mene tandrakan. Ma iy solowei Malawin Ndrabun eme, i buku none ado atou hawe anuhun dah. Lakou doh badeh, Jises edeu eme taso. 34 Ya Debit badeh, bala kandrah buku Jises bwe, arile iy anya,

‘Laban Kindrei tiye i ta Laban tek i buku doh:
“Ou ame manyah ado loboho minek salin,
35 winiya jo le baratehei iri lau ta amekes budon ndra-in i tam barado bahandra katim.” ’ f 
36 “Eme ya ado lau mari badu Isra-el ki tana ado kudu mwasin ta lakou doh: Kindrei badeh, ndrabwidi Jises, ado mene atahi iy i bada kei tondreh, iy ndrasahan Laban ma Krais.”

37 Eme iri lau anuhun sahou doh badeh, ndrine iri tikisiy handru ma tiye i ta Pita hawe oro aposel rayah ja anya, “Ado nadu tine aso, aso ka buku sah bah?”

38 Eme Pita asumon boho oro i buku doh, “Ado mari badeh, katubuni ndrine ado ma kanyu na nyara Jises Krais, ya idah karei ma lomondra ndra-in tado kameh sikine iu. Ma idah kameh, ado akohok Malawin Ndrabun i nyara ndramas ewek tado. 39 Ya tandrakan ta lakou doh badeh, i tado ma hawe i ta nadu ado oro, ma i toro lau badu len. Idoh i toro lau heh Kindrei aloh oro ame hawen.”

40 Pita asehek sahou batanau i toro ma indrek oro anya, “Ado badeh, katondrok ado kamwenen, kora-on ado kala bolo maha kameh eme la-u iri lau ndra-in ado munyak dah.” 41 Eme iri lau solo-an badeh, atehei budon tiri handru i ta sahou tan ma anyuwi oro. Ya kane iri lau mari nane doh, i buku none tuluwi (3,000) i bwele-e iri lau rayah na len doh.

Manyah udu ndrokowa iri lau ta Kindrei

42 Eme iri badeh, aso-ok labai ta a-en hamon ta leheya toro aposel ma atukum ta atudun

hawe abo-os jabi ramen
(2:42) Iri lau rayah ta tanan abudon kandriyen ha-un tiri lau ta Kindrei doh asahan, ya na len iri lau ta Kindrei atukum ta aimon nyamon, iri amekes kandriyen ta abudon bada Jises ma ndrayen.
ma asolom.
43 Iri mwan ma badih badeh, anyolom kalem hawe lahou tinan solo-an labai Kindrei amekes udu mine iri aposel, eme boho iri asak ta lahou iri aposel amekes, ma iri anoh. 44 Eme ya bolo iri mari badeh, ndrine iri i se, ya iri anyohan lakou i tiri ari ari. 45 Eme iri adeu lakou tiri hawe adeu nyamon tiri i ta sisih ma hawe anyohan iri lau lakou bwe. 46 Ma len mari badeh, iri atukum ala bolo asiu tinan ta Kindrei. Ma iri badeh, ado kon tiri abo-os jabi ramen ma aimon amunum le ma sekesek, 47 ma atudun Kindrei. Ma, iri badeh, mwasin labai udu mada iri lau ta kon doh. Eme ya udu bolo len mari badeh, kane iri lau asola ala hawe iri rayah mene, tasah Kindrei ibo gok ta akohok iri ame hamon.

Copyright information for `LID